ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့တွင် ၂၀၂၄ခုနှစ်၊ နိုဝင်ဘာလတွင် ပေါင်းတည်မြို့၊ စားသုံးသူရေးရာဦးစီးဌာနမှ ဝန်ထမ်းများသည် ပေါင်းတည်မြို့၊ နတ်ပုတီးကျေးရွာမှ တောင်သူတစ်ဦးနှင့်သွားရောက်တွေ့ဆုံပြီး ငရုတ်သီးစိမ်းစိုက်ပျိုးမှုကိုမေးမြန်းခဲ့ပါသည်။
ထိုသို့သွားရောက်တွေ့ဆုံရာတွင် ငရုတ်စိုက်ပျိုးသူတောင်သူများအနေဖြင့် ငရုတ်တစ်ဧကစိုက်ပျိုးရာတွင် အပင်ရေ(၁၆၀၀၀)ခန့်စိုက်ပျိုးရကြောင်း၊ ကိုယ်တိုင်မျိုးကြဲစိုက်ပျိုးခြင်းဖြစ်ကြောင်း၊ စတင်စိုက်ပျိုးသည့်အချိန်မှစ၍ ငရုတ်ခူးဆွတ်ပြီးသည်အထိ စုစုပေါင်းကုန်ကျစရိတ် (၁၇၀၀၀၀၀) ကျပ်ခန့်ရှိပြီး ငရုတ်စတင်ထွက်ရှိသည့်အချိန်မှစ၍ တစ်ပါတ်တစ်ခါ ခူးဆွတ်ရပြီး အနည်းဆုံးကာလ ဆယ်ပတ်ခန့်အထိခူးဆွတ်ရကြောင်း၊ တစ်ဧကတွင် ငရုတ်ကောင်းလျှင် ပိဿာ(၁၀၀၀)ခန့်ထွက်ရှိပြီး အလယ်အလတ်ထွက်လျှင် ပိဿာ(၆၀၀)ခန့်ထွက်ရှိကြောင်း၊ ငရုတ်ဈေးမှာ တစ်ပိဿာလျှင် (၆၀၀၀)ကျပ်မှ (၆၅၀၀)ကျပ်နှုန်းတို့ဖြင့်ရောင်းချရပြီး ငရုတ်သီးဈေးကောင်းလျက်ရှိကြောင်း ထွက်ရှိလာသောငရုတ်သီးကို ဝက်ပုတ်မြို့ကုန်စည်ဒိုင်နှင့် ပေါင်းတည်မြို့ကုန်စည်ဒိုင်များသို့ပို့ရပြီး ထိုမှတစ်ဆင့် ရန်ကုန်၊ မကွေး၊ ဧရာဝတီတိုင်းများသို့ တင်ပို့လျက်ရှိကြောင်းသိရှိရပါသည်။
DOCA(ပဲခူး)