ပြည်မြို့နယ်ရှိ ဈေးကွက်များတွင် ဒေသထွက်ပန်းဂေါဖီမျိုးများ စတင်ရောင်းချနေပြီဖြစ်ကြောင်းသိရသည်။ ပန်းဂေါ်ဖီသည် အေး၍စိုစွတ်သော ရာသီဥတုကို ကြိုက်နှစ်သက်သဖြင့် မြေပြန့်ဒေသများတွင် စက်တင်ဘာလနှင့် အောက်တိုဘာလတို့တွင် စိုက်ပျိုးကြပါသည်။ မြေပြန့်ဒေသများတွင် စိုက်ပျိုးပြီး ရက် (၉၀)အကြာ နိုဝင်ဘာ၊ ဒီဇင်ဘာလတွင် စတင်ဆွတ်ခူးကြကြောင်းသိရပါသည်။ ပြည်မြို့နယ်အနေဖြင့် ပန်းဂေါ်ဖီကို စီးပွားဖြစ်စိုက်ပျိုးကြကြောင်းသိရသည်။ စိုက်ပျိုးသည့်ကျေးရွာများမှာ မှော်ဇာကျေးရွာ၊ ပြည်မြို့အနီးတစ်ဝိုက်ရှိ ကျေးရွာများနှင့် ပေါင်းတလည်မြို့ရှိ ခွေးရဲကျေးရွာတို့တွင် စိုက်ပျိုးကြပြီး ထွက်ရှိလာသောပန်းဂေါ်ဖီများကို ပြည်မြို့အတွင်းရှိ ဈေးများအပြင် ရန်ကုန်မြို့သို့လည်း တင်ပို့ရောင်းချကြပါသည်။ ပန်းဂေါ်ဖီဈေးနှုန်းများမှာ ပေါ်စအချိန်တွင် တစ်ပွင့်လျှင် (၂၀၀၀-၂၅၀၀)ကျပ် ဖြင့်ဈေးကောင်းရ၍ ယခုအချိန်ဖြစ်သော ဒီဇင်ဘာလဆန်းပိုင်းတွင် ပုတီးကုန်း၊ သဲကုန်း၊ ရွှေတောင်မြို့များမှ ပန်းဂေါ်ဖီများဝင်ရောက်လာသဖြင့် အထွက်လှိုင်လာသောကြောင့် တစ်ပွင့်လျှင် (၁၅၀၀-၁၈၀၀)ကျပ်ဖြင့်သာ ရောင်းဝယ်လျက်ရှိ၍ ဈေးအနည်းငယ်ကျဆင်းလာခဲ့သဖြင့် သက်သာသောဈေးနှုန်းဖြင့် ဝယ်ယူစားသုံးကြရမည်ဖြစ်ကြောင်းသိရှိရသည်။
DOCA(ပဲခူး)