မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံကို တစ်နှစ်ပတ်လုံးစိုက်ပျိုးကြပါသည်။ စိုက်ပျိုးသောသီးနှံများအနက်မှဝယ်လိုအားရှိပြီး မိသားစုတစ်နိုင်တစ်ပိုင်မှသည် စီးပွားဖြစ်ဝင်ငွေတိုးသော ပဲမြစ်သီးနှံကိုလည်း တောင်သူဦးကြီးများက တိုးချဲ့စိုက်ပျိုးလာကြပါသည်။ ယခုဆောင်းတွင်းပိုင်းအချိန်တွင် သီးနှံများဖြိုင်ဖြိုင်ထွက်ပေါ်လျက်ရှိရာ ပဲစောင်းလျားသီးများလည်း ထွက်ပေါ်လျက်ရှိပါသည်။ ပဲမြစ်ညွန်များပေါ်ချိန်တွင်လည်း ဈေးကောင်းရရှိခဲ့သလို ယခု ပဲမြစ်သီးခေါ်ပဲစောင်းလျားသီးဈေးမှာလည်း ယခင်နှစ်တွင် (၁၀)တောင့်ပါတစ်စီးလျှင် (၃၀၀)ကျပ်ဖြင့်ရောင်းဝယ်ခဲ့ပြီး ယခုနှစ်(၁၀)တောင့် ပါတစ်စီးလျှင် (၅၀၀)ကျပ်အထိရောင်းဝယ်လျှက်ရှိပါသည်။ပဲမြစ်စိုက်ပျိုးမှုအနေဖြင့်(၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၈၀၀၀၀၀-၉၀၀၀၀၀)ကျပ်ခန့် ကုန်ကျ ကြောင်း၊ ပဲမြစ်ညွန် များပေါ်ချိန်တွင်(၁)ဧကလျှင် (၄၀၀၀၀)ကျပ် ရရှိခဲ့ကြောင်း၊ပဲမြစ်သီးခေါ် ပဲစောင်းလျားသီးခူး၍ ရောင်းချပါက( ၅၀၀၀၀ -၆၀၀၀၀)ကျပ်အထိ ရရှိနိုင်ကြောင်း၊ ပဲစောင်းလျားသီးကို အခင်းထဲအရောက်လာရောက်၍ အခင်းပြတ်ဝယ်ယူသူများရှိသလို ကိုယ်တိုင်ခူး၍ မြို့ပေါ်ရှိကုန်စိမ်းဒိုင်များသို့လည်းသွားရောက် ရောင်းချကြကြောင်း၊ ပဲစောင်းလျားသီးကို အိမ်ရှင်မများမှ ပြုတ်၍သုပ်စားကြသလို တို့စားမြုပ်စားကြပါသည်။ အချို့မှာ ငါးကလေးများဖြင့်ရော၍ အိုးကပ်ချက်စားကြသလို အချဉ်ရည်ဟင်းများထဲတွင်လည်းထည့်၍ ချက်ပြုတ်စားသောက်ကြကြောင်း၊ ယခုအချိန်တွင် ပဲစောင်းလျားသီးများ ပိုမိုအရောင်းသွက်ကြောင်း၊ ပဲမြစ်စိုက်ပျိုးပြီး ကိုယ်တိုင်ခူး၍ရောင်းချသော တောင်သူတစ်ဦး၏ ပြောကြားချက် အရသိရှိရပါသည်။
DOCA(မန္တလေး)