ယူကေသည် ၁၄.၁၂.၂၀၂၄ ရက်နေ့ (စနေနေ့) က Comprehensive and Progressive Agreement for Trans-Pacific Partnership (CPTPP) သို့တရားဝင်ပူးပေါင်းခဲ့ပြီး အာရှ-ပစိဖိတ် ကုန်သွယ်ရေးအဖွဲ့တွင် ပထမဆုံးပူးပေါင်းပါဝင်သော ဥရောပနိုင်ငံတစ်နိုင်ငံဖြစ်လာခဲ့သည်။ နိုင်ငံပေါင်း ၁၂ နိုင်ငံ၏ ကုန်သွယ်မှုသဘောတူညီချက်သည် ရေရှည်တွင် ဗြိတိန်စီးပွားရေးကို ပေါင် ၂ ဘီလီယံ ( အမေရိကန်ဒေါ်လာ ၂.၅၂ ဘီလီယံခန့်) မြှင့်တင်ပေးနိုင်ရန်မျှော်မှန်းထားကြောင်းသိရ သည်။ယူကေ၏ CPTPP သို့ ဝင်ရောက်ပူးပေါင်းခြင်းသည် စီးပွားရေးတိုးတက်မှုနှင့်အိမ်ထောင်စု ဝင်ငွေများမြင့်မားလာစေရန် ရည်ရွယ်သည့်အစိုးရ၏ အပြောင်းအလဲအတွက်အုတ်မြစ်ဖြစ်ကြောင်း ဌာနက ၎င်း၏ဝက်ဘ်ဆိုဒ်တွင် မှတ်ချက်ပြုခဲ့သည်။ နိုင်ငံတွင်းရှိဒေသများအားလုံး အတွက်အကျိုးရှိစေပြီး တစ်နှစ်လျှင်အိမ်ထောင်စုလုပ်ခ ပေါင် ၁ ဘီလီယံ(အမေရိကန်ဒေါ်လာ ၁.၂၆ ဘီလီယံ) မြှင့်တင်ပေးနိုင်ရန်စီစဥ်ထားကြောင်းသိရသည်။ ထိုကဲ့သို့သဘောတူညီချက်များသည် ကုန်သွယ်မှုကိုမြှင့်တင်ပေးပြီး နိုင်ငံခြားရှိ ယူကေကုမ္ပဏီများအတွက် အခွင့်အလမ်းများစွာကို ဖန်တီးပေးနိုင်ပြီး အလုပ်အကိုင်များ ပံ့ပိုးပေးနိုင်ကြောင်း လုပ်ခလစာများ တိုးမြင့်ပေးနိုင်ပြီး နိုင်ငံတစ်ဝှမ်း ရင်းနှီးမြှုပ်နှံမှုများကိုလည်း တွန်အားပေးနိုင်ကြောင်း ဗြိတိန်စီးပွားရေးနှင့်ကုန်သွယ်ရေးဝန်ကြီး Jonathan Reynolds မှ ပြောကြားခဲ့သည်။HSBC UK ၏ CEO ဖြစ်သူ Ian Stuart က ကုန်သွယ်ရေးအစုအဖွဲ့၏ အရေးပါမှုကိုအလေးပေးပြောကြားခဲ့ပြီး ၂၀၂၃ ဇူလိုင်တွင် ယူကေ၏ ဝင်ရောက်မှုကို ကြေညာပြီးကတည်းက CPTPP စျေးကွက်များနှင့် ယူကေအကြား ငွေပေးချေမှု ပိုမိုတိုးမြင့်လာခဲ့ပြီး ၎င်းတိုးမြင့်လာမှုအား ဆက်လက်တည်ရှိနေရန်လည်း မျှော်လင့်ကြောင်း ပြောကြားခဲ့သည်။
Source : Xinhua
DOCA(ရန်ကုန်)