အစိမ်းရောင်သယ်ယူပို့ဆောင်ရေးစနစ်တည်ထောင်ရာတွင် ဗီယက်နမ်သည် အားသွင်းရုံ ကွန်ယက်များတည်ဆောက်ရန်အတွက် အမေရိကန်ဒေါ်လာ ၁၄ ဘီလီယံနီးပါးလိုအပ်လိမ့်မည်ဟု အတွင်းလူများကပြောကြားခဲ့ကြောင်း သိရပါသည်။ ထိုအချက်သည် ဖန်လုံအိမ်ဓာတ်ငွေ့ ထုတ်လွှင့်မှုကိုလျှော့ချနိုင်ပြီး လျှပ်စစ်မော်တော်ယာဉ်ဈေးကွက်အတွက် ကြီးမားသောအခွင့်အလမ်းများကို ဖန်တီးပေးနိုင်ရန်မျှော်လင့်ရကြောင်း သိရပါသည်။ လျှပ်စစ်မော်တော်ယာဉ် အသွင် ကူးပြောင်းမှုသည် ဗီယက်နမ်၏ကာဗွန်ထုတ်လွှင့်မှု သုညထိလျှော့ချရေးနှင့် သဘာဝ ပတ်ဝန်းကျင် ကာကွယ်ရေးအတွက် ကြီးမားသောအားထုတ်မှုဖြစ်သကဲ့သို့ ရေနံတင်သွင်းမှု ကုန်ကျစရိတ်များ လျှော့ချနိုင်ကာ အလုပ်အကိုင်သန်းပေါင်းများစွာကို ဖန်တီးပေးနိုင်မည် ဖြစ်သောကြောင့် နိုင်ငံစီးပွားရေးကို အရှိန်မြှင့်တင်ပေးနိုင်မည်ဟု သိရပါသည်။ လျှပ်စစ်မော်တော်ယာဉ်အတွက် ကမ္ဘာ့ဘဏ်၏ထုတ်ပြန်ချက်အရ ပထမဆုံးကားဝယ်ယူသူများကြားတွင် အားသွင်း ရုံစနစ်သည် အဓိကကဏ္ဍတွင် ရှိနေကြောင်း သိရပါသည်။ အားသွင်းရုံကွန်ယက်အတွက် နိုင်ငံသည် ၂၀၃၀ တွင် ခန့်မှန်းအမေရိကန်ဒေါ်လာ ၂.၂ ဘီလီယံ၊ ၂၀၄၀ တွင်အမေရိကန်ဒေါ်လာ ၁၃.၉ ဘီလီယံနှင့် ၂၀၅၀ တွင်အမေရိကန်ဒေါ်လာ ၃၂.၆ ဘီလီယံလိုအပ်မည်ဖြစ်ကြောင်း သိရပါသည်။ လျှပ်စစ် မော်တော်ယာဉ် နည်းပညာ လျှင်မြန်စွာဖွံ့ဖြိုးတိုးတက်လာမှုနှင့်အတူ အစိမ်းရောင် သယ်ယူပို့ဆောင်ရေးစနစ်ဆီသို့ ဦးတည်လာသည့်အတွက် အနာဂတ်တွင် ထိုမော်တော်ယာဉ် အမျိုးအစား အတွက် ဝယ်လိုအားမြင့်တက်ရန် မျှော်လင့်ရကြောင်း သိရပါသည်။ အကယ်၍ အားသွင်းရုံ ကွန်ယက်ဖွံ့ဖြိုးတိုးတက်မှုအရှိန်မြင့်လာပါက လျှပ်စစ်မော်တော်ယာဉ်သုံးစွဲမှုသည် ၂၀၂၄ မှ၂၀၃၅ ကြားတွင် အစီးရေ ၂.၈ သန်းကျော်နှင့် ၂၀၃၆ မှ၂၀၅၀ ကြားတွင် နောက်ထပ် ၃ သန်း ထိရှိလာရန် ခန့်မှန်းရကြောင်း သိရပါသည်။ VinFast အစရှိသည့် များစွာသော ထုတ်လုပ်သူများသည်လည်း ၎င်းတို့ကိုယ်တိုင်ရင်းနှီးမြှုပ်နှံရုံသာမက အားသွင်းရုံကွန်ယက် ဖွံ့ဖြိုးတိုးတက်ရေးတွင်လည်း ရှေ့ပြေးအဖြစ်ဆောင်ရွက်ပေးလျက်ရှိကြောင်း သိရပါသည်။ အားသွင်းရုံများအတွက် ရင်းနှီးမြှုပ်နှံမှုများ ရှာဖွေရာတွင် Public-Private မိတ်ဖက်ဖွဲ့မှုစီမံကိန်းကလည်း အဓိကနေရာတွင် ရှိနေကြောင်း သိရပါသည်။ လျှပ်စစ်ကုမ္ပဏီများ၊ လောင်စာဖြန့်ဖြူးသူများနှင့် အားသွင်းရုံ ဝန်ဆောင်မှုတွင်ကျွမ်းကျင်သူများကလည်း ထိုစီမံကိန်းတွင်ပူးပေါင်း ပါဝင်နိုင်ကြောင်း သိရပါ သည်။ ထို့ပြင် ဗီယက်နမ်အစိုးရကလည်း ပုဂ္ဂလိကကဏ္ဍနှင့် စေ့စပ်ညှိနှိုင်းရာတွင် လွယ်ကူချောမွေ့စေရေးအတွက် သင့်လျော်ပြီးရှင်းလင်းသောမူဝါဒများ ပိုင်ဆိုင်ထားရန် လိုအပ်ကြောင်း လုပ်ငန်းအတွင်းလူ၏ပြောကြားချက်အရ သိရပါသည်။
Vietnam Plus
DOCA(ရန်ကုန်)