စစ်ကိုင်းတိုင်းဒေသကြီး၊ ရွှေဘိုခရိုင်အနေဖြင့် မိုးစပါးစိုက်ပျိုးရာတွင် နှစ်စဉ်ရွှေဘို ပေါ်ဆန်းစပါးများကို စိုက်ပျိုးခဲ့ရာ ၂၀၁၂-၂၀၁၃ခုနှစ်မှစတင်၍ စိုက်ဧက(၃)သိန်းခန့်မှ (၄)သိန်း နီးပါးထိ စိုက်ပျိုးခဲ့ကြပါသည်။ ရွှေဘိုပေါ်ဆန်းစိုက်ပျိုးမှုများပြီး အရည်အသွေးလည်းကောင်းသဖြင့် ရွှေဘိုပေါ်ဆန်း(G.I)ရရှိရေးအတွက် ပြင်သစ်နိုင်ငံ GREAT Myanmar ၏ ထောက်ပံ့ ကူညီမှုဖြင့် ဆောင်ရွက်လျက်ရှိရာ ရွှေဘိုပေါ်ဆန်းစိုက်ပျိုးသည့် အကျိုးဆောင်တောင်သူ ဦးကြီးများ၊ ကြိတ်ခွဲထုတ်လုပ် တင်ပို့ရောင်းချသည့် ဆန်စက်၊ ပွဲရုံ၊ ကုန်သည်လုပ်ငန်းရှင်များနှင့် ချိတ်ဆက်ဆောင်ရွက်ရာတွင် အဆင်ပြေလွယ်ကူစေရန် Admin Officer (၁)ဦးနှင့် Extension Officer(၂)ဦး ခန့်အပ်ထားကြောင်း သိရှိရပါသည်။
ယခုလက်ရှိအချိန်တွင် ရွှေဘိုပေါ်ဆန်း(G.I)ရရှိရေး ဆောင်ရွက်မှုအနေဖြင့် ဧပြီလမှ မေလအတွင်း ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်းမှ တာဝန်ရှိသူ များနှင့် GREAT Myanmar မှ ခန့်အပ်ထားသည့် ဝန်ထမ်းများ ပူးပေါင်းကာ ရွှေဘိုခရိုင်၊ ရွှေဘိုမြို့နယ်အတွင်းရှိ အောင်ချမ်းသာကျေးရွာ၊ ညောင်ပင်သာကျေးရွာ၊ တောင့်တင်းကျေးရွာ၊ ပေါက်တုန်ကျေးရွာ၊ ဇီးကုန်းလေးကျေးရွာ၊ ပန်းတောင်းကျေးရွာနှင့် ခင်ဦးမြို့နယ်အတွင်းရှိ တပင်ကောင်းကျေးရွာများသို့ သွားရောက်ကာ (G.I)အကြောင်းသိကောင်းစရာနှင့် အကျိုး ကျေးဇူးများအကြောင်း၊ ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်း၏ (G.I)ရရှိရေးအတွက် ချိတ်ဆက်ဆောင်ရွက်နေမှုအကြောင်းများ၊ (G.I)ရရှိရေးတွင်အရေးပါသည့် ရွှေဘိုပေါ်ဆန်း အရည်အသွေးမှတ်တမ်း (BOS) Book Of Specifications ရေးဆွဲခြင်း အကြောင်းများ၊ ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်းမှ တာဝန်ယူလည်ပတ်နေသည့် အဆင့်မြင့် SATAKE မျိုးသန့်စင်စက်ရုံ Seed Center (Type-A)အကြောင်း၊ (G.I)ရရှိလာပါက ရွှေဘိုပေါ်ဆန်းစိုက်ပျိုးသည့် အကျိုးဆောင်တောင်သူ ဦးကြီးများ၊ ကြိတ်ခွဲ ထုတ်လုပ်တင်ပို့ရောင်းချသည့် ဆန်စက်၊ ပွဲရုံ၊ ကုန်သည်လုပ်ငန်းရှင်များ ရရှိလာနိုင်မည့် အကျိုးကျေးဇူးအကြောင်းနှင့် (G.I)ရရှိရေးအတွက် ပူးပေါင်းပါဝင်ဆောင်ရွက်ရမည့် လုပ်ငန်းစဉ်များအကြောင်းတို့ကို ကျယ်ကျယ်ပြန့်ပြန့်သိရှိနိုင်စေရန် ဆွေးနွေးခြင်းများ ဆောင်ရွက်ခဲ့ပြီး ပူးပေါင်းပါဝင်ဆောင်ရွက်နိုင်ရန်အတွက် အသင်းဝင်ရန်ဖိတ်ခေါ်ခြင်းများ ဆောင်ရွက်ခဲ့ကြောင်း သိရပါသည်။
ဆက်လက်၍လည်း ရွှေဘိုပေါ်ဆန်း အရည်အသွေးမှတ်တမ်း (BOS) Book Of Specifications Version-0 to 1 အား ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်းနှင့် အတည်ပြုနိုင်ရန် Workshop ပြုလုပ်မည်ဖြစ်ကြောင်းနှင့် မကြာမီတွင် ရွှေဘိုပေါ်ဆန်း Product Logo ပြိုင်ပွဲပြုလုပ်ကာ ဆုချီးမြှင့်မည့် အစီအစဉ်များလည်းရှိကြောင်း သတင်းရရှိပါသည်။
DOCA(စစ်ကိုင်း)