စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ဌာနနှင့် ပတ်သက်၍ လုပ်ငန်းရှင်များအပါဝင် စားသုံးသူပြည်သူတစ်ရပ်လုံးအား နည်းလမ်းများစွာဖြင့် အသိပညာပေးလျက်ရှိရာ (၉.၁.၂၀၂၅)ရက်နေ့၊ နေ့လည် ၁၄:၀၀ နာရီ အချိန်တွင် မြင်းခြံခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူးရုံး၌ ခရိုင်အသေးစားစက်မှုလက်မှု လုပ်ငန်းဦးစီးဌာနမှ ကျင်းပပြုလုပ်နေသည့် တန်ဖိုးမြှင့်စားသောက်ကုန်နည်းပညာသင်တန်းတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ အသိ ပညာပေးဆောင်ရွက်ခဲ့ပါသည်။
အဆိုပါသင်တန်းတွင် တက်ရောက်နေသော သင်တန်းသူ/သင်တန်းသားများနှင့် နည်းပြ ဆရာ/ဆရာမများအား စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူး ဦးသန်းစိုး(လက်ထောက် ညွှန်ကြားရေးမှူး)မှ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ အဓိပ္ပာယ်နှင့် တာဝန်များအကြောင်းကိုလည်းကောင်း၊ ကုန်အညွှန်းအမှတ်အသားများဖော်ပြခြင်းများနှင့် စပ်လျဉ်း ၍ စီးပွားရေးလုပ်ငန်းရှင်များသည် ကုန်စည်အမျိုးအစားအလိုက် ကုန်စည်၏ အမှတ်တံဆိပ်၊ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့်သက်တမ်း ကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ကျန်းမာရေးဆိုင်ရာဘေးထွက်ဆိုးကျိုး(သို့) ဓာတ်မတည့်ကြောင်းဖော်ပြချက်၊ ကြိုတင်သတိပေး ချက်များ စသည့်ဥပဒေပါပြဌာန်းချက်များကို အကျယ်တဝင့်ရှင်းလင်းဟောပြော ဆွေးနွေးခဲ့ပါ ကြောင်းနှင့် အဆိုပါသင်တန်းတွင် သင်တန်းသား/သင်တန်းသူနှင့်သင်တန်းနည်းပြဆရာ/ ဆရာမ များ စုစုပေါင်း(၂၀)ဦးတက်ရောက်ခဲ့ကြောင်း သိရသည်။
DOCA(မန္တလေး)