ကြောင်ပန်းပင်သည် မြန်မာနိုင်ငံအနှံအပြားတွင် ပေါက်ရောက်သောအပင်တစ်မျိုးဖြစ်သည်။ ကြောင်ပန်းကြီးနှင့် ကြောင်ပန်းငယ်ဟုအမျိုးအစား (၂)မျိုးရှိပြီး အရွက်ကို ခွဲ၍သတ်မှတ်နိုင်ပါသည်။ အရွက် ၅ ရွက်စုထွက်လျှင် ကြောင်ပန်းကြီးဖြစ်၍ အရွက်ချွန်ပြီး အညိုရောင်ဖြစ်သည်။ အရွက် ၃ ရွက်ထွက်ပါက ကြောင်ပန်းငယ်ဖြစ်၍ အရွက်ခပ်ဝိုင်းဝိုင်း ပုံသဏ္ဍာန်ရှိသည်။ မန္တလေးတိုင်းဒေသကြီး၊ ငါန်းဇွန်မြို့နယ်၊ အောင်ချမ်းသာကျေးရွာရှိ တောင်သူတစ်ဦးမှာ ကြောင်ပန်းပင်များကို လွန်ခဲ့သည့် (၁၀)နှစ်ဝန်းကျင်ခန့်မှစ၍ ဧကဝက်ခန့်စိုက်ပျိုးခဲ့ပြီး ယခုအခါကြောင်ပန်းစေ့ဈေးကောင်းလာသောကြောင့် (၃)ဧကခန့် တိုးချဲ့စိုက်ပျိုးလာခဲ့ကြောင်းသိရှိရသည်။ကြောင်ပန်းပင်များကို ကိုင်းဖြတ်၍ အပင်ပျိုး စိုက်ပျိုးကြောင်းသိရသည်။ကြောင်ပန်းသီးများမှာ ဇွန်လနှင့်ဇူလိုင်လ များတွင် အထွက်နှုန်းပိုများပြီး အောက်တိုဘာလနှင့် နိုဝင်ဘာလများတွင် အထွက်နှုန်းလျော့နည်းကြောင်း သိရှိရသည်။ ကြောင်ပန်းပင် သည် ရေသွင်းစိုက်ပျိုးလျှင် တစ်နှစ်လုံးနီးပါး အသီးသီးကြောင်း သိရှိရပြီး (၁)နှစ်သားအရွယ်တွင် အများအပြားခူးဆွတ်နိုင်ပြီ ဖြစ်ကြောင်းသိရသည်။ကြောင်ပန်းသီးများကို နေပူတွင်(၂)ရက်ခန့်လှန်းရပြီး ပြန်လည်သန့်စင်ရကြောင်း၊ အစေ့အပြင်ခူးဆွတ်ရာတွင် ရောနှော ပါဝင်လာသော အရွက် (အခြောက်) များကိုလည်း ရောင်းချနိုင်ကြောင်းသိရှိရသည်။ ကြောင်ပန်းဈေးကွက်အနေဖြင့် မန္တလေးမြို့သို့တင်ပို့ ရောင်းချကြောင်းသိရသည်။ဈေးနှုန်းအနေဖြင့် ဇန်နဝါရီလအတွင်း ကြောင်ပန်းစေ့အခြောက် တစ်ပိဿာ လျှင်(၂၀၀၀၀)ကျပ်ခန့်၊ကြောင်ပန်းရွက်အခြောက် တစ်ပိဿာလျှင် (၁၃၀၀-၁၅၀၀) ကျပ်ခန့် ရောင်းချရသဖြင့် ကြောင်ပန်းစိုက်တောင်သူများအတွက် မိသားစုအပိုဝင်ငွေရရှိကာ ပိုမိုအဆင်ပြေလာကြောင်း သိရှိရပါသည်။
DOCA(မန္တလေး)