ကျူးဘားနိုင်ငံတွင် ၁၉၅၉ ခုနှစ်နောက်ပိုင်း၌ ပထမဆုံးအကြိမ် နိုင်ငံခြားသားပိုင်လုပ်ငန်း သို့ စိုက်ပျိုးရေးလုပ်ကိုင်ရန် မြေယာအသုံးချခွင့်ပေးအပ်မှုအဖြစ် ဗီယက်နမ်ကုမ္ပဏီ တစ်ခုသည် Pinar del Río ပြည်နယ်တောင်ပိုင်းတွင် မြေဧရိယာ ၃၀၈ ဟက်တာ (၇၅၁ ဧကခန့်) ကို ကနဦး လုပ်ကိုင်ခွင့်ရရှိခဲ့သည်ဟု ကျူးဘားအစိုးရပိုင် Granma သတင်းဌာနက ဇန်နဝါရီ ၈ ရက်နေ့၌ ဖော်ပြပါသည်။
မြေငှားရမ်းအသုံးချမှုပုံစံဖြင့် မြေယာလွှဲပြောင်းပေးအပ်မည်ဟု သိရှိထားခြင်း မရှိခဲ့သော် လည်း အဆိုပါ စိုက်ပျိုးရေးစီမံကိန်း ဆောင်ရွက်မည့် အစီအစဉ်ကို ၂၀၂၄ ခုနှစ် နိုဝင်ဘာလကပင် ကြေညာထားခဲ့ခြင်းဖြစ်သည်။
ရိုက်တာသတင်းဌာန၏ ဖော်ပြချက်အရ ယခုကဲ့သို့ လုပ်ကိုင်ခွင့်ပြုခြင်းသည် ရုရှားကုမ္ပဏီ များသို့ မြေအသုံးချခွင့်ပြုမည်ဟု ၂၀၂၃ ခုနှစ်တွင် ကျူးဘားအစိုးရက ကတိပြုထားမှုနှင့် အလား သဏ္ဌာန် တူညီကြောင်း၊ ရုရှားကုမ္ပဏီများသို့ နှစ် ၃၀ အထိ ကာလရှည် မြေငှားရမ်းသုံးစွဲခွင့် ကမ်းလှမ်းချက်နှင့်အတူ လယ်ယာသုံး စက်ကိရိယာများအား အကောက်ခွန်လွတ် တင်သွင်းခွင့်၊ လုပ်ငန်းမှရရှိသည့် အကျိုးအမြတ်များအား နိုင်ငံခြားငွေဖြင့် လွှဲပြောင်းခွင့်နှင့် အခြားသော သက်သာခွင့်များ ပါဝင်ကြောင်း၊ ရုရှားကုမ္ပဏီများအနေဖြင့် ကျူးဘားနိုင်ငံ၏ ဗျူရိုကရက်တစ် အတားအဆီးများကို လျှော့ချပေးမည့်အခြေအနေအား စောင့်ဆိုင်းလျက်ရှိကြောင်းဖြင့် ကျူးဘား-ရုရှား စီးပွားရေးကောင်စီ၏ ဥက္ကဋ္ဌ Boris Titov က ပြောကြားခဲ့သည်။
ဗီယက်နမ်ကုမ္ပဏီအတွက် လုပ်ကိုင်ခွင့်ပြုသည့် အသေးစိတ်အချက်အလက်များကို ဖော်ပြ ထားခြင်းမရှိသော်လည်း ၎င်းကုမ္ပဏီသည် ဟာဗားနားမြို့တော်၏ တောင်ဘက် ကီလိုမီတာ ၁၀၀ အကွာအဝေးတွင် တည်ရှိသော Los Palacios မြူနီစီပယ်နယ်မြေ၌ ၃ နှစ်ကာလအထိ စပါးစိုက် ပျိုးမှုကို လုပ်ကိုင်မည်ဖြစ်သည်။ ၂၀၂၅ ခုနှစ် ပထမလများအတွင်း စပါးစိုက်ဧရိယာကို ဟက်တာ ၁၀၀၀ အထိ စိုက်ပျိုးရန်နှင့် နောက်ပိုင်းတွင် ဟက်တာ ၅၀၀၀ အထိ တိုးချဲ့ရန် အဆိုပါ ကုမ္ပဏီက စီစဉ်ထားကြောင်း၊ ၎င်းပမာဏသည် အေးမြသည့်ရာသီကာလ၌ စိုက်ပျိုးရန်အတွက် စဉ်းစားသင့် သည့် ဧရိယာပမာဏဖြစ်ကြောင်း၊ Los Palacios ဒေသမှ ဟက်တာ ၃၅၀၀ စိုက်ပျိုးရန် အဆိုပြု ထားကြောင်း နိုင်ငံပိုင် Granma သတင်းစာက ဖော်ပြထားသည်။
ဗီယက်နမ် ကုမ္ပဏီအုပ်စုသည် ၎င်းတို့၏ စိုက်ပျိုးရေးကျွမ်းကျင်သူများကို ခေါ်ဆောင်လာ မည် ဖြစ်သည့်အပြင် ဓာတ်မြေဩဇာ၊ ပေါင်းသတ်ဆေး၊ ပိုးသတ်ဆေးနှင့် စိုက်ပျိုးထုတ်လုပ်ရာတွင် လိုအပ်သည့် အခြားသောအရင်းအမြစ်များကို ထောက်ပံ့မည်ဖြစ်သည်။ သမားရိုးကျအားဖြင့် စပါး တစ်ဟက်တာ စိုက်ပျိုးရန်အတွက် မျိုး ၁၅၀ ကီလိုဂရမ်သုံးစွဲရမှုကို ၃၀ ကီလိုဂရမ်အထိ လျှော့ချ သုံးစွဲနိုင်မည့် စပ်မျိုးစပါးများကိုလည်း ဗီယက်နမ်နိုင်ငံမှ ယူဆောင်လာမည်ဖြစ်သည်။ ပထမနှစ် စိုက်ပျိုးထုတ်လုပ်ရာတွင် အထွက်နှုန်း တစ်ဟက်တာလျှင် စပါး ၇ မက်ထရစ်တန်ထွက်ရှိရန်နှင့် ဒုတိယနှစ် စိုက်ပျိုးချိန်၌ တစ်ဟက်တာလျှင် စပါး ၈ မက်ထရစ်တန်အထိ အထွက်နှုန်းရရှိရန် မျှော်မှန်းထားကြောင်း သိရှိရသည်။
ကျူးဘားနိုင်ငံတွင် နှစ်ကာလကြာရှည်စွာ စပါးအထွက်နှုန်း ကျဆင်းနေမှုကို မြှင့်တင်နိုင် ရန်နှင့် ထုတ်လုပ်မှုတိုးတက်ရန်အတွက် ဗီယက်နမ်ထံမှ တင်သွင်းသည့် စပ်မျိုးစပါးအား စမ်းသပ် စိုက်ပျိုးခြင်းကို နိုင်ငံတစ်ဝန်း နယ်မြေဒေသများစွာရှိ မြေဟက်တာပေါင်း ၁၅၀၀၀ ကျော်၌ ၂၀၂၄ ခုနှစ် အောက်တိုဘာလကပင် နမူနာစိုက်ပျိုး ဆောင်ရွက်ခဲ့သည်။ ကျူးဘားပြည်တွင်း၌ နှစ်စဉ် စားသုံးရန် ဆန်လိုအပ်ချက်မှာ မက်ထရစ်တန်ချိန် ၇၀၀၀၀၀ ခန့်ရှိသော်လည်း တရားဝင် စာရင်း ဇယားများအရ ၂၀၂၃ ခုနှစ်၌ ထုတ်လုပ်နိုင်မှုမှာ မက်ထရစ်တန် ၃၀၀၀၀ အောက်သာရှိခဲ့သည်။
နှစ်စဉ် လူတစ်ဦး ပျမ်းမျှဆန်စားသုံးမှု ၆၀ ကီလိုဂရမ်ကျော်ရှိသည့် ကျူးဘားနိုင်ငံအတွက် ဗီယက်နမ်သည် အဓိက ဆန်တင်သွင်းရာ အရင်းအမြစ်ပင်ဖြစ်သည်။ ယခုကဲ့သို့ ကျူးဘားနိုင်ငံ၌ စပါးစိုက်ပျိုးထုတ်လုပ်ရန် ဗီယက်နမ်၏ ပူးပေါင်းဆောင်ရွက်မှုမှာ ပထမဦးဆုံးအကြိမ် မဟုတ် ကြောင်း၊ ၂၀၂၂ ခုနှစ်တိုင်အောင် Sancti Spíritus ပြည်နယ်ရှိ La Sierpe မြူနီစီပယ်ဒေသတွင် စပါးစိုက်ပျိုးမှု ပူးပေါင်းဆောင်ရွက်ရန် စီစဉ်ခဲ့သော်လည်း ကျူးဘားနိုင်ငံဘက်မှ ထိရောက်စွာ စွမ်းဆောင်နိုင်စွမ်းမရှိသဖြင့် စီမံကိန်းပယ်ဖျက်ခဲ့ရကြောင်း၊ အခြေခံစားနပ်ရိက္ခာများ တင်သွင်းမှု အတွက် နှစ်စဉ် ဒေါ်လာ ၂ ဘီလီယံခန့် သုံးစွဲနေရသော ကျူးဘားနိုင်ငံသို့ မကြာသေးမီ နှစ်ကာလ များမှစ၍ ဗီယက်နမ်နှင့် တရုတ်နိုင်ငံတို့သည် ဆန်များ ပေးပို့လှူဒါန်းခဲ့ကြကြောင်း သိရှိရသည်။
Source: Havana Times, 12 Jan 2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)