ကမ္ဘောဒီးယားနိုင်ငံတွင် စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန၏ ပြောရေးဆို ခွင့်ရှိသူ Im Rachna က ဖနွမ်းပင်မြို့ အရှေ့မြောက်ဘက် ကီလိုမီတာ ၃၅၀ ခန့်အကွာ Kratie ပြည်နယ်ရှိ တောင်သူများသို့ သွားရောက်တွေ့ဆုံစဉ်၌ လာမည့်စိုက်ပျိုးရာသီတွင် ပြည်ပ စပါးမျိုး များအစား ကမ္ဘောဒီးယား၏ Sen Kra Ob (SKO) စပါးမျိုးကို ပြောင်းလဲစိုက်ပျိုးကြရန် တိုက်တွန်း အကြံပြုခဲ့ပါသည်။
နိုင်ငံတကာ ဈေးကွက်များတွင် Sen Kra Ob ဆန်သည် ၎င်း၏တန်ဖိုးမြင့်မားမှုနှင့် ဈေးနှုန်း တည်ငြိမ်မှုအရ လူသိများကြောင်း တောင်သူများအား Im Rachna က ပြောကြားခဲ့သည်။ ယင်း ဒေသတွင် စိုက်ပျိုးသည့် လူကြိုက်များ၊ အထွက်နှုန်းကောင်းသော နိုင်ငံခြားမျိုးစိတ်ဖြစ်သည့် OM စပါးမျိုးသည် တစ်ဟက်တာလျှင် ၅ တန်ခန့် ထွက်ရှိသော်လည်း ၎င်းဆန် တစ်ကီလိုဂရမ်ကို အမေရိကန် ဒေါ်လာ ၀.၂၀ သာရရှိကြောင်း၊ SKO စပါးမျိုးသည် တစ်ဟက်တာလျှင် ၃.၅ တန်ခန့် ထွက်ရှိပြီး ဆန်တစ်ကီလိုဂရမ်ကို အမေရိကန်ဒေါ်လာ ၀.၃၀ ခန့် ရရှိသည့်အတွက် စီးပွားရေးအရ အလားအလာ ကောင်းနိုင်ကြောင်း သိရသည်။
စိုက်ပျိုးရေးပညာရှင်များ၏ လမ်းညွှန်မှုနှင့် ပံ့ပိုးမှုဖြင့် Sen Kra Ob ကို စမ်းသပ်စိုက်ပျိုးရန် အတွက် အစုအဖွဲ့များဖွဲ့စည်းထားရန် Kratie ပြည်နယ်အာဏာပိုင်များက လယ်သမားများသို့ အကြံပြုထားသည်။ Sen Kra Ob ၏ စပါးအထွက်နှုန်းမှာ တစ်ဟက်တာလျှင် ၃ တန်ခန့်ထွက်ရှိပြီး အခြားမျိုးကွဲ ၅ တန် ထွက်ရှိမှုထက် ဝင်ငွေပိုရရှိနိုင်ကြောင်း ဒေသခံတောင်သူတစ်ဦးဖြစ်သူ Kong Samuen က ပြောကြားခဲ့သည်။
SKO ဆန်သည် ပေါ့ပါးမှုရှိပြီး နူးညံ့ချောမွေ့မှုနှင့်အတူ ပြင်းပြသော ရနံ့ရှိသည့် ဆန်လုံးရှည် ဖြစ်ကြောင်း သိရပါသည်။ ကမ္ဘောဒီးယား စိုက်ပျိုးရေးသုတေသနနှင့် ဖွံ့ဖြိုးတိုးတက်ရေးသိပ္ပံသည် ၂၀၁၉ ခုနှစ်တွင် တော်ဝင်စိုက်ပျိုးရေးတက္ကသိုလ်၊ ကမ္ဘောဒီးယားဆန်စပါးအသင်းချုပ်၊ နိုင်ငံတကာ ဘဏ္ဍာရေး ကော်ပိုရေးရှင်း (International Finance Corporation) နှင့် ကမ္ဘောဒီးယား စိုက်ပျိုးရေး တန်ဖိုးကွင်းဆက်အစီအစဉ်တို့နှင့် ပူးပေါင်း၍ အဆိုပါ စပါးမျိုးကို ဖန်တီးခဲ့ကြခြင်း ဖြစ် ပါသည်။
၂၀၂၃ ခုနှစ် နှောင်းပိုင်းတွင် SKO ဆန်သည် ၎င်း၏ အရည်အသွေး၊ အနံ့နှင့် အရသာတို့ အတွက် ရွှေတံဆိပ်ဆုကို တရုတ်နိုင်ငံမှ ချီးမြှင့်ခြင်း ခံခဲ့ရပါသည်။ SKO သည် ရာသီဥတုဒဏ် ခံနိုင်ပြီး ရာသီမရွေး စိုက်ပျိုးနိုင်သော ဆန်စပါးအမျိုးအစားဖြစ်ပြီး စိုက်ပျိုးထုတ်လုပ်မှု ရက်ပေါင်း ၁၁၀ မှ ၁၁၅ ရက်ရှိကြောင်း၊ ၎င်းသည် ကမ္ဘောဒီးယား၏ တင်ပို့သည့်ဆန်များအနက် Phka Rumduol ဆန်၏နောက်တွင် လူကြိုက်အများဆုံး ဆန်အမျိုးအစားဖြစ်ကြောင်း သိရပါသည်။
Source: Khmer Times, 14 Jan 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)