ဖိလစ်ပိုင်၏ ၂၀၂၄ ခုနှစ် ဆန်တင်သွင်းမှု တန်ချိန် ၄.၇၈ သန်းဖြင့် စံချိန်တင်မြင့်တက်

ဖိလစ်ပိုင် စိုက်ပျိုးရေးလုပ်ငန်းဗျူရို၏ နောက်ဆုံးအကြိမ် ပြင်ဆင်ထုတ်ပြန်ခဲ့သော စာရင်း များအရ ၂၀၂၄ ခုနှစ်တွင်  ဖိလစ်ပိုင်နိုင်ငံအနေဖြင့် ဆန်တန်ချိန် ၄.၇၈ သန်းကို စံချိန်တင် တင်သွင်း နိုင်ခဲ့ကြောင်း သိရှိရပါသည်။

          အဆိုပါဗျူရိုသည် ၂၀၂၄ ခုနှစ် နိုဝင်ဘာနှင့် ဒီဇင်ဘာလတို့တွင် တင်သွင်းခဲ့သည် စာရင်းများ ပြန်လည်စိစစ်ပြီးနောက် အစောပိုင်းကာလ၌ ထုတ်ပြန်ခဲ့သည့် ပမာဏ တန်ချိန် ၄.၆၈၄ သန်းထက်   ၂ ရာခိုင်နှုန်းခန့် ပိုမိုလျက် ၂၀၂၄ ခုနှစ်အတွင်း စုစုပေါင်း ဆန်တန်ချိန် ၄.၇၈ သန်းကို တင်သွင်းခဲ့ သည်ဟု ထုတ်ပြန်ခဲ့ခြင်းဖြစ်သည်။ ၎င်းထုတ်ပြန်ချက်အရ ဒီဇင်ဘာလအတွက် ယခင်ဖော်ပြခဲ့ သော ပမာဏထက် ၉၅၃၉၈ တန် ပိုမိုလျက် ဆန်တန်ချိန် ၄၅၄၈၀၂ တန်ရောက်ရှိ တင်သွင်းခဲ့ ကြောင်း၊ နိုဝင်ဘာလအတွက် ဆန်တင်သွင်းမှုစာရင်း၌လည်း  ယခင်ဖော်ပြခဲ့သည့် ပမာဏထက် ၅၄၀ တန်ပိုမိုပြီး ဆန်တန်ချိန် ၄၅၇၅၁၅.၅၀၈  တင်သွင်းခဲ့ခြင်းဖြစ်ကြောင်းသိရှိရသည်။

          စိုက်ပျိုးရေးလက်ထောက်အတွင်းဝန် Arnel de Mesa က ၂၀၂၄ ခုနှစ် ဒီဇင်ဘာလ၏ နောက်ဆုံးနေ့ရက် အနည်းငယ်အတွင်းမှာပင် ဆန်တင်သွင်းမှု သိသိသာသာတိုးတက်ခဲ့ခြင်းဖြစ် သည်ဟု ပြောကြားထားပါသည်။

          ဆန်တင်သွင်းခွင့်ရရှိသူများနှင့် ကုန်သည်များအနေဖြင့် ၂၀၂၄ ခုနှစ်အတွင်း သွင်းကုန် ဆိပ်ကမ်းရှင်းလင်းမှုဆိုင်ရာ အစားအစာလုံခြုံစိတ်ချရမှုနှင့် အပင်ပိုးမွှားကင်းရှင်းမှု အသိအမှတ်ပြု လက်မှတ်စောင်ရေ ၉၇၉၅ ခုကို လျှောက်ထားရယူခဲ့ပြီး ၎င်းတို့အနက် ၆၆.၁၃ ရာခိုင်နှုန်းဖြစ်သော ၆၄၇၇ စောင်အား အသုံးပြုခဲ့သည်။ လက်ရှိ စည်းကမ်းသတ်မှတ်ချက်များအရ အဆိုပါ အသိ အမှတ်ပြုလက်မှတ်ကို ထုတ်ပေးသည့်နေ့မှ ရက်ပေါင်း ၆၀ အတွင်းသာ အသုံးပြုနိုင်ကြောင်း သိရှိရသည်။

          အစိုးရ အနေဖြင့် ၂၀၂၄ ခုနှစ် ပထမနှစ်ဝက်တွင်ဖြစ်ပေါ်ခဲ့သည့် ရာသီဥတုဆိုးဝါးမှုများ ကြောင့် ပြည်တွင်းဆန်လိုအပ်ချက်ကို ပိုမိုဖြည့်ဆည်းနိုင်ရေးအတွက် ဆန်တင်သွင်းမှုများကို တိုးမြှင့်ခဲ့ခြင်းဖြစ်သည်။ သမ္မတ Marcos ၏ အတည်ပြုချက်ဖြင့် ထုတ်ပြန်ခဲ့သည့် ဥပဒေကဲ့သို့ အာဏာတည်သော အမိန့်အမှတ် ၆၂ အရ ဆန်တင်သွင်းမှု အခွန်နှုန်းအား ၃၅ ရာခိုင်နှုန်းမှ ၁၅ ရာခိုင်နှုန်းအထိ လျော့ချခဲ့ရာ ပုဂ္ဂလိကလုပ်ငန်းရှင်များအား ပြည်ပမှ ဆန်ပိုမိုဝယ်ယူတင်သွင်းရန် တွန်းအားပေး ဖြစ်စေခဲ့ပါသည်။

          ဆန်‌ဈေးနှုန်းဖောင်းပွမှုသည် ၂၀၂၄ ခုနှစ် မတ်လ၌ ၂၄.၄ ရာခိုင်နှုန်းဖြင့် အမြင့်ဆုံးအနေ အထားရှိရာမှ ကျဆင်းမှုလမ်းကြောင်းပေါ်သို့ ရောက်ရှိလာပြီး ဒီဇင်ဘာလတွင် ၀.၈ ရာခိုင်နှုန်းဖြင့် တည်ငြိမ်ခဲ့ကြောင်း၊ သို့ရာတွင် နှစ်အလိုက် ပျမ်းမျှဆန်‌ဈေးနှုန်းဖောင်းပွမှုမှာ ၂၀၂၃ ခုနှစ်၌ ၈.၁ ရာခိုင်နှုန်းရှိရာမှ ၂၀၂၄ ခုနှစ်တွင် ၁၅.၈ ရာခိုင်နှုန်းသို့ မြင့်တက်ခဲ့ကြောင်းသိရှိရပါသည်။

Source : The Philippine Star, January 14, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)