အင်ဒိုနီးရှားနိုင်ငံစီးပွားရေးနှင့်စက်မှုလုပ်ငန်းအသင်း (Kadin) ၏ဥက္ကဌဖြစ်သူ Anindya Bakrie က အစားအစာဖူလုံရေး၊ စွမ်းအင်ဖူလုံရေး၊ ကျန်းမာရေးနှင့် ကာကွယ်ရေးတို့သည် ပါကစ္စတန်နှင့်ပူးပေါင်းဆောင်ရွက်ရန်အတွက် အဓိကဦးစားပေးကဏ္ဍ ၄ ခုဖြစ်ကြောင်း အင်ဒိုနီးရှားနိုင်ငံဆိုင်ရာ ပါကစ္စတန်သံအမတ်ကြီးဖြစ်သူ Ameer Khurram Rathore နှင့် ပြုလုပ် ခဲ့သည့် အစည်းအဝေးတွင် ပြောကြားခဲ့ကြောင်း သိရပါသည်။ Bakrie က ၎င်းတို့သည်နှစ်နိုင်ငံ အကြား အနီးကပ်အလုပ်လုပ်ကြရန်နည်းလမ်းများကို ဆွေးနွေးခဲ့ကြောင်းနှင့် ပါကစ္စတန်သည် မူစလင်နိုင်ငံတစ်နိုင်ငံဖြစ်ပြီး ကာကွယ်ရေး၊ ကျန်းမာရေး၊ စိုက်ပျိုးမွေးမြူရေးနှင့် စွမ်းအင်ကဏ္ဍ တို့တွင် အားကောင်းသောကြောင့် ထိုကဏ္ဍများတွင် ပူးပေါင်းဆောင်ရွက်မှုမြှင့်တင်ရန် လိုအပ် ကြောင်းပြောကြားခဲ့ပါသည်။ ထိုအစည်းအဝေးတွင် သံအမတ်ကြီးက သြဂုတ်လတွင် နှစ်နိုင်ငံ ကြား ကုန်သွယ်ရေးဆောင်ရွက်မှုများနှင့် ကုန်စည်ပြပွဲများပြုလုပ်မည်ဟု ပြောကြားခဲ့ကြောင်း သိရပါသည်။ ထို့ကြောင့် Kadin သည် ပါကစ္စတန်မှစီးပွားရေးအသင်းအဖွဲ့များနှင့် အပြန်အလှန် ကုန်သွယ်မှု အရှိန်မြှင့်တင်ရန် အနီးကပ်ပူးပေါင်းဆောင်ရွက်သွားမည်ဟု သိရပါသည်။ Bakrie က နှစ်နိုင်ငံစလုံးသည်ဖွံဖြိုးဆဲနိုင်ငံများဖြစ်ကြာင်း၊သက်ဆိုင်ရာစီးပွားရေးသာမက ကုန်သွယ်ရေး တိုးတက်ရန် ဆောင်ရွက်ရမည်ဖြစ်ကြောင်း၊ အင်ဒိုနီးရှားသည် ပါကစ္စတန်အပါအဝင် ဈေးကွက် လမ်းကြောင်းသစ်များ ရှာဖွေလျှက်ရှိကြောင်းနှင့် နှစ်နိုင်ငံစီးပွားရေး ပူးပေါင်းဆောင်ရွက်မှု မြှင့်တင်ခြင်းသည် ကြီးမားသောလုပ်ငန်းများသာမက MSME လုပ်ငန်းများအတွက်ပါ အကျိုးရှိစေ မည်ဖြစ်ကြောင်း ပြောကြားခဲ့ပါသည်။ သံအမတ် Rathore ကလည်း အင်ဒိုနီးရှား နှင့်ပါကစ္စတန် တို့သည် ဘာသာရေးနှင့် ယဉ်ကျေးမှု ဆက်နွယ်မှုအားကောင်းကြောင်း၊ Kadin ဥက္ကဌ၏ ဦးဆောင်မှုနှင့်အတူ နှစ်နိုင်ငံကြားကုန်သွယ်ရေးချိတ်ဆက်မှု ပိုမိုဖွံ့ဖြိုးတိုးတက်လာ နိုင်ကြောင်း ပြော ကြားခဲ့ပါသည်။ အင်ဒိုနီးရှားနိုင်ငံ အထွေထွေစာရင်းအင်းအေဂျင်စီး၏ အဆိုအရ အင်ဒိုနီးရှားနိုင်ငံ သည် ပါကစ္စတန်နိုင်ငံထံမှ ကုန်သွယ်ရေးပိုငွေရရှိလျှက်ရှိကြောင်း သိရပါသည်။ ၂၀၂၄ ခုနှစ် ဇန်နဝါရီလမှ နိုဝင်ဘာလအတွင်း အင်ဒိုနီးရှားနိုင်ငံသည် ပါကစ္စတန်နိုင်ငံသို့ အမေရိကန်ဒေါ်လာ ၃.၀၄ ဘီလီယံတန်ဖိုး တင်ပို့ခဲ့ပြီး အမေရိကန်ဒေါ်လာ ၅၂၉ သန်းတန်ဖိုးပြန်လည် တင်သွင်း ခဲ့ကြောင်း သိရပါသည်။
DOCA(ရန်ကုန်)