ကမ္ဘောဒီးယားနိုင်ငံသည် ၂၀၂၄ ခုနှစ်တွင် ဆန် ၆၅၁,၅၂၂ တန် တင်ပို့ခဲ့ပြီး စုစုပေါင်း ၀င်ငွေ အမေရိကန်ဒေါ်လာ ၄၉၁ သန်း ရရှိခဲ့ကြောင်း ကမ္ဘောဒီးယား ဆန်စပါးအသင်းချုပ် (CRF) ၏ ၁၁.၁.၂၀၂၅ ရက်နေ့ သတင်း ထုတ်ပြန်ချက်တွင် ဖော်ပြထားသည်။ ကုမ္ပဏီပေါင်း ငါးဆယ့်ခုနစ်ခု သည် ၂၀၂၄ ခုနှစ်တွင် နိုင်ငံနှင့် ဒေသပေါင်း ၆၈ နိုင်ငံသို့ ဆန်တင်ပို့ခဲ့ပြီး တရုတ်နိုင်ငံသည် ကုန်စည်၏ အဓိကဝယ်ယူသူများအနက်မှ တစ်ခုအဖြစ် ဆက်လက်တည်ရှိနေသေးကြောင်း သတင်းထုတ်ပြန် ချက်တွင် ဖော်ပြထားသည်။ အရှေ့တောင်အာရှနိုင်ငံသည် ၂၀၂၄ ခုနှစ်တွင် တရုတ်နိုင်ငံသို့ ဆန် ၁၁၇၉၂၅ တန် တင်ပို့ခဲ့ပြီး ဝင်ငွေဒေါ်လာ ၇၅ ဒသမ ၆ သန်းရရှိခဲ့ကြောင်း သတင်း ထုတ်ပြန်ချက်တွင် ဖော်ပြထားသည်။ “ဆန်တင်ပို့မှုရဲ့ ၇၆ ဒသမ ၁၅ ရာခိုင်နှုန်းက ဆန်မွှေး၊ ၁၈ ဒသမ ၇ ရာခိုင်နှုန်းက ဆန်ဖြူ၊ ၃ ဒသမ ၁ ရာခိုင်နှုန်းက ပြုတ်ဆန်၊ ၁ ဒသမ ၇၈ ရာခိုင်နှုန်းက အော်ဂဲနစ်ဆန်ဖြစ်ပြီး ၀.၂၇ ရာခိုင်နှုန်းက တခြားဆန်အမျိုးအစားတွေ ဖြစ်ပါတယ်” ဟု CRF အထွေထွေအတွင်းရေးမှူး Lun Yeng က ပြောသည်။ ကမ္ဘောဒီးယား စိုက်ပျိုးရေး၊ သစ်တောနှင့် ငါးလုပ်ငန်း ဝန်ကြီးဌာန၏ လက်ထောက် အတွင်းဝန်နှင့် ပြောရေးဆိုခွင့်ရှိသူ Im Rachna က တရုတ်နိုင်ငံသည် ကမ္ဘောဒီးယား၏ စိုက်ပျိုးရေး ထွက်ကုန်များအတွက် အဓိကစျေးကွက်တစ်ခုဖြစ်ကြောင်း တရုတ်နှင့်တခြားမိတ်ဆွေနိုင်ငံများမှ နိုင်ငံ၏ စိုက်ပျိုးရေးထွက်ကုန်များအား ဝယ်ယူမှုသည် ကမ္ဘောဒီးယားနိုင်ငံ၏ စိုက်ပျိုးရေးဖွံ့ဖြိုး တိုးတက်မှုကို သိသိသာသာ အထောက်အကူဖြစ်စေပြီး ပြည်သူများ အထူးသဖြင့် တောင်သူ လယ်သမားများအတွက် အကျိုးကျေးဇူးများစွာရရှိစေကြောင်း ၎င်းက ဆင်ဟွာသို့ ပြောကြားခဲ့သည်။
DOCA(ရန်ကုန်)