ငါးနှစ်အတွင်း အင်ဒိုနီးရှားနိုင်ငံ၏ မော်တော်ကားလုပ်ငန်းသို့ ရင်းနှီးမြှုပ်နှံမှုဝင်ရောက်မှု ၄၂ ရာခိုင်နှုန်းထိ မြင့်တက်

           အင်ဒိုနီးရှားနိုင်ငံ ရင်းနှီးမြှုပ်နှံမှုဝန်ကြီးဌာနက လွန်ခဲ့သည့်ငါးနှစ်အတွင်း မော်တော်ကား လုပ်ငန်းသို့ ရင်းနှီးမြှုပ်နှံမှုဝင်ရောက်မှုသည် ၄၃ ရာခိုင်နှုန်းမြင့်တက်ခဲ့ကြောင်း သိရပါသည်။ Investment Deregulation ၏ ညွှန်ကြားရေးမှူးဖြစ်သူ Dendy Apriandi က ၂၀၂၄ ခုနှစ် စက်တင်ဘာလအထိတွင် ၎င်း၏ဝန်ကြီးဌာနသည် စံချိန်တင်ရင်းနှီးမြှုပ်နှံမှု  ရူပီး ၃၁.၇ ထရီလီယံ ရရှိခဲ့ပြီး ၂၀၁၉ ခုနှစ်ကရရှိခဲ့သည့် ရူပီး ၁၁.၀၄ ထရီလီယံထက် ၄၃ ရာခိုင်နှုန်းမြင့်တက်ခဲ့ကြောင်း ပြောကြားခဲ့ပါသည်။ ထိုစုစုပေါင်းတန်ဖိုး ရူပီး ၃၁.၇ ထရီလီယံတွင် ပြည်ပရင်းနှီးမြှုပ်နှံမှု ရူပီး ၂၈.၁၅ ထရီလီယံနှင့် ပြည်တွင်းရင်းနှီးမြှုပ်နှံမှု ရူပီး ၃.၆ ထရီလီယံ ပါဝင်ကြောင်း သိရပါသည်။ ကြီးထွားလာသည့်လုပ်ငန်းများတွင် ဘက်ထရီလုပ်ငန်း၊ လေးဘီးမော်တော်ယာဉ်လုပ်ငန်းနှင့် နှစ်ဘီးမော်တော်ယာဉ်လုပ်ငန်းတို့ပါဝင်ပြီး ၁၅ ရာခိုင်နှုန်း၊ ၇၃ ရာခိုင်နှုန်းနှင့် ၁၁ ရာခိုင်နှုန်း အသီးသီးရှိကြောင်း သိရပါသည်။ ထို ၂၀၁၉-၂၀၂၄ ကာလအတွင်း ဂျပန်သည် မော်တော်ကား ကဏ္ဍ၌ ရူပီး ၇၅ ထရီလီယံ ရင်းနှီးမြှုပ်နှံထားပြီး ၎င်း၏နောက်တွင် တောင်ကိုရီးယား (ရူပီး ၄၄.၂၅ ထရီလီယံ)၊ စင်ကာပူ (ရူပီး ၅.၅ ထရီလီယံ)၊ ဟောင်ကောင်( ရူပီး ၃.၅၉ ထရီလီယံ) နှင့် တရုတ် (ရူပီး ၁.၀၄ ထရီလီယံ) တို့ရပ်တည်နေကြောင်း သိရပါသည်။ ထိုကာလအတွင်း မော်တော်ယာဉ်လုပ်ငန်းသို့ ရူပီး ၁၀၇ ထရီလီယံဖြင့် ရင်းနှီးမြှုပ်နှံမှုအားကောင်းစွာဝင်ရောက်ခဲ့ပြီး နှစ်ဘီးနှင့်သုံးဘီး မော်တော်ယာဉ်လုပ်ငန်းသို့ ရူပီး ၁၆.၇ ထရီလီယံနှင့် ဘက်ထရီလုပ်ငန်းသို့ ရူပီး ၂၂.၁ ထရီလီယံ ဝင်ရောက်ခဲ့ကြောင်း သိရပါသည်။ Apriandi က ၎င်း၏ဝန်ကြီးဌာနသည် မော်တော်ကားရင်းနှီးမြှုပ်နှံမှုများကို ဆွဲဆောင်ရန် များစွာသော မဟာဗျူဟာများကို အကောင် အထည်ဖော်လျှက်ရှိကြောင် ပြောကြားခဲ့ပါသည်။ ၎င်းတို့တွင် ဈေးကွက်အခြေအနေနှင့်ကိုက်ညီ သည့် လူသားအရင်းအမြစ်များရရှိရန် သက်မွေးဝမ်းကြောင်းပညာရေးပရိုဂရမ်များနှင့် လျှပ်စစ် မော်တော်ယာဉ်များအတွက် ယှဉ်ပြိုင်နိုင်စွမ်းရှိသည့် ရင်းနှီးမြှုပ်နှံမှုမက်လုံးများ ပါဝင်ကြောင်း သိရပါသည်။ ထို့ပြင် လျှပ်စစ်မော်တော်ယာဉ်လုပ်ငန်း ရင်းနှီးမြှုပ်နှံမှုအတွက် သွင်းကုန်အခွန် လွတ်ငြိမ်းခွင့်များနှင့် အကောက်ခွန်ခွင့်ပြုချက်များ ပါဝင်ရန်ရှိကြောင်း သိရပါသည်။

DOCA(ရန်ကုန်)