ကမ္ဘောဒီးယားနိုင်ငံနှင့်တရုတ်နိုင်ငံတို့အကြား ကုန်သွယ်မှု ပမာဏသည် ၂၀၂၄ ခုနှစ်၊ ဇန်နဝါရီလမှ ဒီဇင်ဘာလအတွင်း အမေရိကန်ဒေါ်လာ ၁၅ ဘီလီယံကျော်အထိမြင့်တက်ခဲ့ပြီး ၂၀၂၃ ခုနှစ်၊ အလားတူကာလထက် ၂၃ ရာခိုင်နှုန်းတိုးလာခဲ့ကြောင်း အကောက်ခွန်နှင့်အခွန် ကြီးကြပ်မှုဦးစီးဌာန(GDCE) မှ မကြာသေးမီကထုတ်ပြန်ခဲ့သော အစီရင်ခံစာအရသိရသည်။ (GDCE) ၏ကုန်သွယ်မှု အချက်အလက်များအရ တရုတ်နိုင်ငံသို့ ကမ္ဘောဒီးယား၏ ပို့ကုန် တန်ဖိုး မှာ ကန်ဒေါ်လာ ၁.၇၅ ဘီလီယံရှိပြီး ၂၀၂၃ ခုနှစ်အလားတူကာလနှင့်နှိုင်းယှဉ်ပါက ၁၈.၄ ရာခိုင်နှုန်းတိုးလာခဲ့ပြီး တရုတ်မှကမ္ဘောဒီးယားသို့ သွင်းကုန်တန်ဖိုးမှာ ကန်ဒေါ်လာ ၁၃.၄၃ ဘီလီယံရှိကာ ၂၄.၆ ရာခိုင်နှုန်းမြင့်တက်ခဲ့သည်။ ကမ္ဘောဒီးယား-တရုတ် ကူးသန်းရောင်းဝယ် ရေးအသင်း ဒုတိယဥက္ကဋ္ဌ Lor Vichet က ကမ္ဘောဒီးယားနိုင်ငံသည် အထည်၊ ကြယ်သီးနှင့် ဇစ်ပါ များကဲ့သို့သော ကုန်ကြမ်းပစ္စည်းများတင်သွင်းလျက်ရှိပြီး စက်မှုလုပ်ငန်းများအတွက် စက်ယန္တရား များတင်သွင်းမှုမှာ အဓိကတင်သွင်းမှုဖြစ်သည်ဟု ပြောကြားခဲ့သည်။ ကမ္ဘောဒီးယားနိုင်ငံသည် ၎င်း၏စက်ရုံများကို ထောက်ပံ့ရန်အတွက် ဈေးနှုန်းချိုသာစွာဖြင့် ကမ္ဘောဒီးယားမှကုန်ကြမ်းများ ကို အဓိကတင်သွင်းခြင်းကြောင့် တင်သွင်းမှုမြင့်မားနေကြောင်း နှင့် တရုတ်နိုင်ငံသို့ ပို့ကုန် တိုးမြှင့်ရန်အတွက် ကမ္ဘောဒီးယားအနေဖြင့် လယ်ယာထွက်ကုန်များ ပိုမိုတင်ပို့နိုင်ရန် အာရုံစိုက် သင့်ကြောင်း Lor Vichet ကဆက်လက်ပြောကြားခဲ့သည်။ ကမ္ဘောဒီးယားကုန်သည်ကြီးများ အသင်း ဒုတိယဥက္ကဋ္ဌ Lim Heng က ကမ္ဘောဒီးယား-တရုတ်လွတ်လပ်သောကုန်သွယ်မှု သဘောတူညီချက်(CCFTA)နှင့် RCEP တို့သည် ကမ္ဘောဒီးယား နှင့် တရုတ်နိုင်ငံတို့အကြား နှစ်နိုင်ငံကုန်သွယ်မှုအတွက် ရင်းနှီးမြှုပ်နှံမှုအသစ်များကို တိုးလာ စေကြောင်းပြောကြားခဲ့သည်။ တရုတ်နိုင်ငံသည် ကမ္ဘောဒီးယားနိုင်ငံ၏ အကြီးဆုံးနိုင်ငံခြား တိုက်ရိုက်ရင်းနှီးမြှုပ်နှံမှု အရင်းအမြစ်ဖြစ်ပြီး ၂၀၂၃ ခုနှစ်က စုစုပေါင်းရင်းနှီးမြှုပ်နှံမှုပမာဏ၏ ၅၀ ရာခိုင်နှုန်းရှိကြောင်း ကမ္ဘောဒီးယားဖွံ့ဖြိုးတိုးတက်ရေးကောင်စီ (CDC) ၏ နှစ်ပတ်လည် အစီရင် ခံစာအရသိရသည်။
DOCA(ရန်ကုန်)