ပြည်တွင်းရှိ တောင်သူလယ်သမားများသို့ အထောက်အပံ့ဖြစ်စေရန်အတွက် အင်ဒိုနီးရှား အစိုးရသည် ပီလောပီနံထုတ်ကုန်များ တင်သွင်းခြင်းကို ပမာဏကန့်သတ် ဆောင်ရွက်မည်ဖြစ် ကြောင်း Antara သတင်းဌာနက ဖော်ပြပါသည်။
စားနပ်ရိက္ခာရေးရာ ပူးပေါင်းဆောင်ရွက်ရေးဝန်ကြီး Zulkifli Hasan က ၎င်းတို့ ဝန်ကြီး ဌာန အနေဖြင့် တင်သွင်းခွင့်ပြုမည့်ပမာဏကို အတည်ပြုခြင်းမပြုမီ တောင်သူများ၏ ပီလောပီနံ ရိတ်သိမ်းထွက်ရှိမှု ပမာဏနှင့် လက်ရှိပြည်တွင်း၌ ကုန်စည်မည်မျှ ပြတ်လပ်မှုရှိမည်ကို အချက် အလက်များ တောင်းခံဆောင်ရွက်မည်ဖြစ်ကြောင်း၊ ယခုကဲ့သို့ လုပ်ဆောင်ခြင်းသည် ပြည်ပမှ တင်သွင်းသည့် ပီလောပီနံထုတ်ကုန်များကြောင့် ဒေသခံတောင်သူများအပေါ် ဆိုးကျိုးသက် ရောက်ခြင်းကို ကာကွယ်ပေးမည်ဖြစ်ကြောင်း၊ စိုက်ပျိုးရေးဝန်ကြီးဌာနထံမှ အချက်အလက်များ ရရှိပြီးပါက ကုန်သွယ်ရေးဝန်ကြီးဌာနထံသို့ ဆက်လက်၍ အစီရင်ခံစာပေးပို့မည်ဖြစ်ပြီး ထိုမှတစ် ဆင့် ဝန်ကြီးဌာနဆိုင်ရာ လုပ်ထုံးလုပ်နည်းများအတိုင်း လုပ်ဆောင်လိမ့်မည်ဖြစ်ကြောင်း ဇန်နဝါရီ ၃၁ ရက်နေ့၌ ပြောကြားခဲ့သည်။
စိုက်ပျိုးရေးဝန်ကြီးဌာန၊ ဒုတိယဝန်ကြီး Sudaryono ကလည်း ပြည်တွင်းကုန်ထုတ်လုပ် မှုကို အကာအကွယ်ပေးရန်အတွက် ပီလောပီနံထုတ်ကုန်များ တင်သွင်းမှုပမာဏကို ကြပ်မတ် ဆောင်ရွက်ရမည်ဖြစ်ကြောင်း၊ အလားတူ ဒေသခံတောင်သူများ၏ အကျိုးစီးပွားအတွက် ဂျုံတင် သွင်းခြင်းကိုလည်း ကြပ်မတ်သင့်ကြောင်း၊ အင်ဒိုနီးရှားနိုင်ငံသားအားလုံးအတွက် ပြည်ပမှ တင် သွင်းခြင်းမပြုပဲ ရိက္ခာထောက်ပံ့ပေးနိုင်အောင် လုပ်ဆောင်နိုင်ရန် လိုအပ်ကြောင်းဖြင့် ဇန်နဝါရီ ၂၉ ရက်နေ့တွင် မှတ်ချက်ပြု ပြောဆိုထားသည်။
အစောပိုင်းကာလများ၌ ကိုယ်ပိုင်စားနပ်ရိက္ခာဖူလုံရေး တွန်းအားပေးဆောင်ရွက်ချက်၏ တစ်စိတ်တစ်ဒေသအဖြစ် ၂၀၂၅ ခုနှစ် ကုန်ဆုံးချိန်တွင် ဆန်၊ ပြောင်းနှင့် ဆားတို့ကို တင်သွင်းမှု ရပ်ဆိုင်းနိုင်အောင် အစိုးရက ကြိုးပမ်းမည်ဟု သမ္မတ Prabowo Subianto က ထပ်လောင်း အတည်ပြု ပြောကြားထားခဲ့သည်။ ၎င်း၏ အစိုးရအဖွဲ့သည် တစ်နိုင်ငံလုံး စားနပ်ရိက္ခာ ဖူလုံမှုကို ၄ နှစ်တာ ကာလအတွင်း ကိုယ်ပိုင်ထုတ်လုပ်နိုင်စွမ်းဖြင့် ဖြည့်ဆည်းနိုင်ရေး ရည်မှန်းချက် ချမှတ် ထားကြောင်း သိရှိရသည်။
Source: Antara News, 31 Jan 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)