၂၀၂၄ ခုနှစ်တွင် ဗီယက်နမ်သည် လတ်ဆတ်သောအုန်းသီးတင်ပို့မှုမှတစ်ဆင့် ဝင်ငွေ အမေရိကန်ဒေါ်လာ သန်း ၃၉၀ ရရှိခဲ့ပြီး ၂၀၂၃ ခုနှစ်ကထက် ၆၁ ရာခိုင်နှုန်းမြင့်တက်ခဲ့ကြောင်း ဗီယက်နမ်နိုင်ငံအကောက်ခွန်အထွေထွေဦးစီးဌာန၏ ထုတ်ပြန်ချက်အရ သိရပါသည်။ စုစုပေါင်း ဆိုပါက နိုင်ငံ၏ လတ်ဆတ်သောအုန်းသီးနှင့် အုန်းသီးထုတ်ကုန်များတင်ပို့မှုမှ ဝင်ငွေ အမေရိကန် ဒေါ်လာ ၁.၁ ဘီလီယံနီးပါး ရရှိခဲ့ပြီး ၂၀၂၃ ခုနှစ်ကထက် ၂၀ ရာခိုင်နှုန်းကျော် မြင့်တက်ခဲ့ကြောင်း သိရပါသည်။ ၎င်းတန်ဖိုးသည် ဗီယက်နမ်အတွက် အုန်းသီးမှတစ်ဆင့် အမေရိကန်ဒေါ်လာ ဘီလီယံတန်ဖိုးရရှိသည့် ပထမဆုံးအကြိမ်ဖြစ်ကြောင်း သိရပါသည်။ ဗီယက်နမ်နိုင်ငံ စိုက်ပျိုး မွေးမြူရေးနှင့် ကျေးလက်ဒေသဖွံ့ဖြိုးတိုးတက်ရေးဝန်ကြီးဌာနထံမှ အချက်အလက်များအရ လတ်တလောတွင် ဗီယက်နမ်၌ အုန်းပင်စိုက်ခင်း ဟတ်တာ ၂၀၀၀၀၀ ဧရိယာ ရှိပြီး နှစ်စဉ် အုန်းသီး တန်ချိန် ၂ သန်းထုတ်လုပ်နိုင်စွမ်းရှိကြောင်း သိရပါသည်။ ထိုဧရိယာ၏ သုံးပုံတစ်ပုံသည် အမေရိကန်နှင့် ဥရောပမှ အော်ဂဲနစ်စံနှုန်းနှင့် ကိုက်ညီမှု ရှိကြောင်း သိရပါသည်။ အုန်းသီး ထုတ်လုပ်ခြင်းနှင့် ပြုပြင်ထုတ်လုပ်ခြင်းတို့တွင် စီးပွားရေး လုပ်ငန်း ၆၀၀ ကျော်ပါဝင်ခြင်းနှင့်အတူ ဗီယက်နမ်၏အုန်းသီးလုပ်ငန်းသည် နိုင်ငံတကာဈေးကွက် တွင် ယှဉ်ပြိုင်နိုင်စွမ်းရှိကြောင်း သိရ ပါသည်။ ဗီယက်နမ်သည် အုန်းသီးတင်ပို့မှုတွင် အာရှ-ပစိဖိတ်၌ နံပတ် ၄ ကမ္ဘာပေါ်တွင် နံပါတ် ၅ နေရာတွင် ရပ်တည်နေကြောင်း သိရပါသည်။ တရုတ်နိုင်ငံသည် ဗီယက်နမ်၏ အုန်းသီးတင်ပို့မှု အတွက် အကြီးမားဆုံးဈေးကွက်အဖြစ် ရပ်တည်နေပြီး နိုင်ငံ၏ စုစုပေါင်းတင်ပို့မှုတန်ဖိုး၏ ၂၅ ရာခိုင်နှုန်းရှိကြောင်း သိရပါသည်။ ၂၀၂၄ ခုနှစ် ဩဂုတ်လတွင် တရားတင်လမ်းကြောင်းမှ အုန်းသီးတင်ပို့မှုအတွက် နှစ်နိုင်ငံကြား လက်မှတ်ရေးထိုးခဲ့သည့် သံတမံခင်းညှိနှိုင်းချက်က ဗီယက်နမ်အုန်းပင်စိုက်ပျိုးသူများနှင့် ထုတ်လုပ်သူများအတွက် သိသာထင်ရှားသောအခွင့်အလမ်း များရရှိစေခဲ့ကြောင်း သိရပါသည်။ ဗီယက်နမ်သည် လတ်တလောတွင် တရုတ်၏ တတိယ အကြီးမားဆုံးအုန်းသီး တင်သွင်းသူ ဖြစ်ပြီး ဈေးကွက်ဝေစု၏ ၂၀ ရာခိုင်နှုန်းရှိကြောင်း သိရပါသည်။ တရုတ်အပြင် ၎င်းတို့၏ ယှဉ်ပြိုင်နိုင်စွမ်း ရှိသောဈေးနှုန်းနှင့် ကောင်းမွန်သည့်အရသာကြောင့် ဗီယက်နမ်အုန်းသီးများ သည် ဥရောပသမဂ္ဂ၊ အမေရိကန်၊ ကနေဒါနှင့် တောင်ကိုရီးယားတို့ ပါဝင် သည့် ဈေးကွက်များ တွင်လည်း သဘောကျနှစ်သက်မှုရရှိလျှက်ရှိကြောင်း သိရပါသည်။ ထိုသို့ အုန်းသီးတင်ပို့ရာမှ ဘီလီယံဒေါ်လာဝင်ငွေရရှိခဲ့သော်လည်း ထိုတန်ဖိုးပမာဏသည် ဗီယက်နမ် အုန်းသီးလုပ်ငန်း နယ်ပယ်၏ အလားအလာနှင့်အခွင့်အလမ်းကို အပြည့်အဝရောင်ပြန်မဟပ်သေး ကြောင်း သက်ဆိုင်သည့်တာဝန်ရှိသူများ၏ အဆိုအရသိရပါသည်။ ဗီယက်နမ်အုန်းသီးအသင်း၏ အထွေထွေ အတွင်းရေးမှူးဖြစ်သူ Cao Ba Dang Khoa က များစွာသောလတ်ဆတ်သောအုန်းသီး မှာယူမှုများသည် ၂၀၂၄ ခုနှစ် တတိယနှင့် စတုတ္ထသုံးလပတ်ကျော်တွင် အပင်စိုက်ပျိုးခြင်း သတ်မှတ်စံနှင့် ထုတ်ပိုးမှုသတ်မှတ်စံမလုံလောက်မှု၊ မတည်ငြိမ်သောကုန်ကြမ်းပစ္စည်း အရင်း အမြစ်တို့ကြောင့် နှောင့်နှေးမှုများနှင့် ရင်ဆိုင်ခဲ့ရကြောင်း ပြောကြားခဲ့ပါသည်။ ထို့ကြောင့် အုန်းသီးအသင်းသည် ဗီယက်နမ်အာဏာပိုင်များအား တင်ပို့မှုပိုမိုလွယ်ကူအဆင်ပြေစေရန် အတွက် အပင်စိုက်ပျိုးမှုသတ်မှတ်စံ ထပ်တိုးထုတ်ပြန်ပေးရန် တရုတ်အာဏာပိုင်များနှင့် ညှိနှိုင်းဆွေးနွေးပေးရန် တောင်းဆိုခဲ့ကြောင်း သိရပါသည်။
DOCA(ရန်ကုန်)