တရုတ်နိုင်ငံ၏ သကာရည်တင်သွင်းမှု ပိတ်ပင်ခြင်းက ထိုင်းကုမ္ပဏီများအား ဘတ်ငွေ ၂ ဘီလီယံ အထိ ဆုံးရှုံးစေ

          တရုတ်နိုင်ငံမှ သကာရည် တင်သွင်းခွင့်ကို တားမြစ်ထားမှုကြောင့် ထိုင်းကုမ္ပဏီများ အနေ ဖြင့် ယခင်ခန့်မှန်းထားသည်ထက် နှစ်ဆပိုများသည့် ဘတ်ငွေ သန်းနှစ်ထောင်ခန့် ဆုံးရှုံးနေရကာ လာမည့်လမှစ၍ လုပ်ငန်းများ ပိတ်သိမ်းရတော့မည်ဖြစ်ပြီး အဆိုပါတားမြစ်မှုကို ရုတ်သိမ်းရန် အတွက် ထိုင်းအရာရှိများဘက်မှ ညှိနှိုင်းဆွေးနွေးမှုများ ပြုလုပ်ခဲ့သော်လည်း မည်သည့်အကျိုး သက်ရောက်မှုမျှ မရှိခဲ့ကြောင်း ထိုင်းသကာရည်နှင့် သကြားလုပ်ငန်းနယ်ပယ်မှ တာဝန်ရှိသူ တစ်ဦးက ပြောကြားခဲ့သည်။

          စက်ရုံများ၏ ကျန်းမာသန့်ရှင်းမှုဆိုင်ရာ စိုးရိမ်ဖွယ်အချက်များကြောင့် တရုတ်နိုင်ငံသည် ကမ္ဘာ့ဒုတိယအကြီးဆုံး သကြားတင်ပို့သည့် ထိုင်းနိုင်ငံထံမှ သကာရည်နှင့် သကြားကြိုတင် ရောနှောပါဝင်သည့် ထုတ်ကုန်များ တင်သွင်းခွင့်ကို ၂၀၂၄ ခုနှစ် ဒီဇင်ဘာလတွင် ယာယီရပ်ဆိုင်း ခဲ့ခြင်းဖြစ်သည်။ ယခုတားမြစ်မှုကို ရုတ်သိမ်းရန်အတွက် ဆွေးနွေးမှုများ မစတင်မီ ထိုင်းနိုင်ငံ အနေဖြင့် စက်ရုံပေါင်းများစွာကို စစ်ဆေးရန် တရုတ်အစိုးရဘက်မှ တောင်းဆိုခဲ့ကြောင်း ယခင် လ၌ ထိုင်းအရာရှိများက ပြောကြားခဲ့သည်။

          ထိုင်းသကြားထွက်ကုန်အသင်းမှ ဥက္ကဋ္ဌ Todsaporn Ruangpattananont က ယခုအခါ မည်သည့်စက်ရုံကမျှ သကြားကြမ်းကို ဝယ်ယူနေခြင်းမျိုး မရှိတော့ပဲ လုပ်ငန်းများ ရပ်နားထားရ သည်မှာ ၂ လကျော် ရှိပြီဖြစ်ကြောင်း၊ ၎င်းစက်ရုံများသည် ပုံမှန်အားဖြင့် တစ်နှစ်လျှင် သကြား တန်ချိန် ၁ သန်းခန့် ဝယ်ယူလေ့ရှိကြောင်း၊ မတ်လတိုင်အောင် ဖြေရှင်းနိုင်မည့် နည်းလမ်းများ မရှိပါက လုပ်ငန်းများ ပိတ်သိမ်းရဖွယ်ရှိကြောင်း ပြောကြားခဲ့ပါသည်။

          ထိုင်း အစားအစာနှင့် ဆေးဝါးကွပ်ကဲရေးဌာန၏ ထောက်ခံချက်ရရှိထားသည့် စက်ရုံများ စာရင်းနှင့် အစားအစာ ဘေးကင်းလုံခြုံရေး စည်းမျဉ်းစည်းကမ်းများ၏ အသေးစိတ် အချက် အလက်များကို ဇန်နဝါရီ ၁၄ ရက်နေ့၌ ထိုင်းနိုင်ငံမှ တရုတ်နိုင်ငံသို့ ပို့ပေးခဲ့သော်လည်း တရုတ် နိုင်ငံဘက်မှ အကြောင်းပြန်လာမှု မရှိသေးကြောင်း၊ ထိုင်းနိုင်ငံအနေဖြင့် တရုတ်နိုင်ငံဘက်မှ တောင်းဆိုသည့်အတိုင်း စစ်ဆေးသည့်စနစ်ကို ပြင်ဆင်ဖွဲ့စည်းရန် ပြင်ဆင်နေကြောင်း ထိုင်း အစိုးရ အရာရှိနှစ်ဦးက ရိုက်တာသတင်းဌာနသို့ ပြောကြားခဲ့သည်။

          တရုတ်နိုင်ငံ၏ ဆိပ်ကမ်းများသို့ ပို့ဆောင်ခဲ့သည့် သကာရည်နှင့် သကြားအမှုန့် ကြိုတင် ရောနှောပါဝင်သည့် ထုတ်ကုန် စုစုပေါင်း တန်ချိန် ၄၀၀၀၀ ခန့်ကို ထိုင်းနိုင်ငံသို့ ပြန်ပို့ခဲ့ကြောင်း၊ ကုန်ပစ္စည်းသင်္ဘောတင်ခ၊ သယ်ယူပို့ဆောင်ခ၊ တရုတ်နိုင်ငံ ဆိပ်ကမ်းများတွင် ဒဏ်ငွေများ ပေး ဆောင်ရခြင်းနှင့် ရောင်းချသည့်ဈေးနှုန်းများ နိမ့်ကျခြင်းတို့ကိုပါ ထည့်သွင်းတွက်ချက်လိုက်ပါက ထိုင်းကုမ္ပဏီများတွင် ဘတ်ငွေ သန်းနှစ်ထောင်ကျော် သို့မဟုတ် ယခင်ခန့်မှန်းထားသည်ထက် ငွေကြေးဆုံးရှုံးမှု နှစ်ဆဖြစ်ခဲ့ရကြောင်းဖြင့် တရုတ်နိုင်ငံသို့ အဓိကထောက်ပံ့ပေးနေသည့် သကြား စက်ရုံ ၄၂ ခုကို ကိုယ်စားပြုသော ထိုင်းသကြားထွက်ကုန်အသင်းမှ Mr. Todsaporn က ပြောကြား ခဲ့သည်။

          ထောက်ပံ့ပို့ဆောင်ရေး ဝန်ဆောင်မှုကုမ္ပဏီဖြစ်သည့် Czarnikow ၏ အဆိုအရ ထိုင်းနိုင်ငံ သည် ယခင်နှစ်၌ တရုတ်နိုင်ငံသို့ သကာရည်အဓိက ထောက်ပံ့ပေးသည့်နိုင်ငံဖြစ်ခဲ့ပြီး တန်ချိန် ၁.၂ သန်းကျော် တင်ပို့ခဲ့သည်ဟု သိရှိရပါသည်။

          တရုတ်နိုင်ငံနှင့် ဂျပန်နိုင်ငံများသို့ သကာရည်နှင့် သကြားအမှုန့် ကြိုတင်ရောနှောပါဝင် သည့် ထုတ်ကုန်များ တင်ပို့နေသော SMC Food Thailand နှင့် Hefty Food Thailand တို့၏ အကြီးတန်းအမှုဆောင်အရာရှိဖြစ်သူ Mr. Thammasorn Nawilaijaroen က ၎င်း၏ကုမ္ပဏီ ၂ ခု သည် သကာရည်တင်သွင်းမှု ပိတ်ပင်ခြင်းကြောင့် ဘတ်ငွေ သန်း ၁၀၀ ခန့် ဆုံးရှုံးမှု ကြုံတွေ့ခဲ့ရ ကြောင်း၊ သကာရည်ကို တရုတ်နိုင်ငံတစ်ခုတည်းကိုသာ တင်ပို့သော Hefty Food ကုမ္ပဏီသည် သကာရည် တန်ချိန် ၁၂၀၀၀၀ ခန့်ကို ယခင်နှစ်က တင်ပို့ခဲ့ပြီး ယခုအချိန်တွင် ထုတ်လုပ်မှုကို ရပ်နားထားရကြောင်း၊ ပြန်လည်သယ်ယူလာရသည့် ကုန်သေတ္တာ ၃၀၀ ရှိပြီး ၎င်းတို့အနေဖြင့် အဆိုပါ ကုန်စည်များ မည်သူ့ထံသို့ ရောင်းချရမည်ကို မသိရှိနိုင်သေးကြောင်း ပြောကြားခဲ့သည်။

Source: Bangkok Post, 25 Feb 2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)