ဈေးနှုန်းအာမခံချက်ပေးရန် ထိုင်းတောင်သူများ၏ တောင်းဆိုမှု ဆန်စပါးကော်မတီ ပယ်ချ

          ထိုင်းလယ်သမားများ၏ စပါးဈေးနှုန်း အာမခံချက်ပေးရန် သို့မဟုတ် ထောက်ပံ့ကြေးနှင့် နစ်နာမှု လျော်ကြေးငွေများ ပေးအပ်ရန် တောင်းဆိုမှုသည် ၂၀၂၃ ခုနှစ် နိုဝင်ဘာလ ၂၁ ရက်နေ့၌ ချမှတ်ခဲ့သော ထိုင်းအစိုးရအဖွဲ့၏ ဆုံးဖြတ်ချက်နှင့် ဆန့်ကျင်လျက်ရှိသဖြင့် ဆန်စပါးမူဝါဒ ဆပ်ကော်မတီသည် ၎င်းတို့၏ အရေးဆိုမှုကို ပယ်ချလိုက်သည်ဟု ထိုင်းပြည်တွင်းကုန်သွယ်ရေး ဦးစီးဌာနမှ ညွှန်ကြားရေးမှူးချုပ် Wittayakorn Maneenet က ပြောကြားခဲ့သည်။

          ဆန်စပါးမူဝါဒဆပ်ကော်မတီအနေဖြင့် လယ်သမားများအား ကူညီပံ့ပိုးရန်အတွက် အစီအမံ ၃ ရပ်ကို ချမှတ်ထားပြီးဖြစ်ကြောင်း၊ ၎င်းတို့အနက် တောင်သူများအနေဖြင့် ၎င်းတို့၏ စပါးများကို ကိုယ်ပိုင်စပါးကျီများတွင်ဖြစ်စေ၊ သမဝါယမအသင်းများထံ၌ဖြစ်စေ ၅ လကြာအထိ သိုလှောင် ထားရှိခြင်းအတွက် စပါး ၁ တန်လျှင် ဘတ် ၁၅၀၀ နှုန်းဖြင့် ထောက်ပံ့ခြင်းကို တိုးချဲ့ဆောင်ရွက်မှု လည်း ပါဝင်ကြောင်း၊ ထို့အပြင် ကုန်သည်များက တောင်သူများထံမှ စပါးများကို တိုက်ရိုက်ဝယ်ယူ နိုင်စေရေးအတွက် စပါးဈေးကွက်များကိုလည်း ဖွင့်လှစ်ပေးထားပြီးဖြစ်ကြောင်း၊ ထိုကဲ့သို့ စပါး များကို ကုန်သည်များက ဝယ်ယူသိုလှောင်ရာ၌ ကျသင့်မည့် အတိုးနှုန်းအတွက် ထောက်ပံ့ကြေး များကိုလည်း အစိုးရက ပေးအပ်လျက်ရှိကြောင်း၊ ၎င်းတို့ ဦးစီးဌာနအနေဖြင့် ဆန်စပါးကုန်သည် အသင်း၊ ခေတ်မီကုန်သွယ်ရေးအရောင်းဆိုင်များနှင့် ပူးပေါင်းလျက် အသင့်ထုပ်ပိုးပြီး ဆန်များကို စားသုံးသူများထံသို့ သက်သာသောဈေးနှုန်းဖြင့် ရောင်းချပေးလျက်ရှိကြောင်း Mr. Wittayakorn က ပြောဆိုခဲ့သည်။

          ထိုင်းအစိုးရသည် အဆိုပါ အစီအမံ ၃ ရပ်ကို အကောင်အထည်ဖော်ရန်အတွက် ဘတ်ငွေ ၁.၈ ဘီလီယံခန့်ကို သုံးစွဲမည်ဖြစ်ပြီး အသစ်ရိတ်သိမ်းထွက်ရှိလာမည့် သီးထပ်စပါး တန်ချိန် ၃.၅ သန်းခန့်ကို သိုလှောင်ထားရှိမည်ဖြစ်သည်။ ထိုသို့ဆောင်ရွက်ခြင်းက ဈေးကွက်အတွင်း စပါးများ ရောင်းလိုအား ပိုလျှံမှု မဖြစ်စေပဲ စပါးဈေးနှုန်းများ ထပ်မံကျဆင်းမည့်အရေးကို ထိန်းကျောင်းနိုင် မည်ဖြစ်ကြောင်း သိရှိရသည်။

Source: Thai PBS World, 23 Feb 2025 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)