ကမ္ဘောဒီးယားနိုင်ငံ၊ ဖွံ့ဖြိုးတိုးတက်ရေးကောင်စီ(CDC) ၏ ဥက္ကဋ္ဌ Sun Chanthol သည် Japan External Trade Organization(JETRO) ၏ ဒါရိုက်တာ Wakabayashi Kohei ဦးဆောင်သော ဂျပန်စီးပွားရေးကိုယ်စားလှယ်အဖွဲ့အား ဖနွမ်းပင်မြို့တွင် ၅-၃-၂၀၂၅ ရက်နေ့က လက်ခံတွေ့ဆုံခဲ့သည်။ Sun Chanthol က ကမ္ဘောဒီးယားနိုင်ငံ၏ မျှော်မှန်းချက် “Cambodia Vision 2050” ကိုရရှိရန် ရင်းနှီးမြှုပ်နှံမှုများအား ဆွဲဆောင်ခြင်းနှင့် စီးပွားရေးကဏ္ဍကွဲပြားခြင်း ဆိုင်ရာမူဝါဒများကို ဂျပန်ကိုယ်စားလှယ်အဖွဲ့အား ရှင်းလင်းတင်ပြခဲ့သည်။ ပုဂ္ဂလိက ရင်းနှီးမြှုပ်နှံမှုများနှင့် အထူးစီးပွားရေးဇုန်များကို စီမံခန့်ခွဲရန်အတွက် လုပ်ငန်းတာဝန်များ၊ မျှော်မှန်းချက်နှင့် ရည်မှန်းချက်တို့ကို CDC မှ ကြိုးပမ်းဆောင်ရွက်လျက်ရှိပြီး စီးပွားရေးနှင့် ရင်းနှီးမြှုပ်နှံမှုကို မြှင့်တင်ပေးရာတွင် အထူးသဖြင့် များပြားသည့် ဝန်ဆောင်မှုများပေးရာတွင် ဒစ်ဂျစ်တယ်အသွင်ကူးပြောင်းရေး၊ ရင်းနှီးမြှုပ်နှံသူများကို အင်တာနက်မှတဆင့် အချိန်/နေရာ မရွေး လွယ်ကူချောမွေ့စွာလျှောက်ထားနိုင်ရန် Cambodia Investment Project Management System (cdcIPM) ကို မိတ်ဆက်ပေးခဲ့သည်။ Sun Chanthol က ကမ္ဘောဒီးယားနိုင်ငံ၌ ရင်းနှီး မြှုပ်နှံမှုများအတွက် နိုင်ငံရေးတည်ငြိမ်မှု၊ မက်ခရိုစီးပွားရေးတည်ငြိမ်မှု၊ လုပ်သားအင်အား၊ အစိုးရ၏ပံ့ပိုးကူညီမှု၊ လိုက်လျောညီထွေမှုရှိသော ရင်းနှီးမြှုပ်နှံမှုဥပဒေ၊ တိုးတက်ကောင်းမွန် သော အခြေခံအဆောက်အအုံများ၊ အနာဂါတ်တွင်ဒေသတွင်းထောက်ပံ့ပို့ဆောင်ရေး အချက် အချာဖြစ်လာရန်မျှော်မှန်းထားသည့် ပထဝီဝင်တည်နေရာတို့ကို ထည့်သွင်းစဉ်းစားသင့်ကြောင်း ဆက်လက်ပြောကြားခဲ့သည်။ ထို့အပြင် စက်မှုလုပ်ငန်းများ၊ အခြေခံအဆောက်အအုံများ၊ စိုက်ပျိုးရေးနှင့် စက်မှုလုပ်ငန်းများ၊ Green Energy၊ အထူးစီးပွားရေးဇုန်များဖွံ့ဖြိုးတိုးတက်ရေး၊ အသေးစားနှင့် အလတ်စားစီးပွားရေးလုပ်ငန်းများ(SMEs) နှင့် ဝန်ဆောင်မှုအမျိုးမျိုးတို့ အပါ အဝင် ရင်းနှီးမြှုပ်နှံမှုဆိုင်ရာဖြစ်နိုင်ခြေများကို နားလည်ရန်လေ့လာသင့်ကြောင်း ပြောကြားခဲ့ သည်။ စီးပွားရေးကိုယ်စားလှယ်အဖွဲ့သည် အစိုးရအပြင် CDC ကိုယ်တိုင် ရင်းနှီး မြှုပ်နှံပြီး ၎င်းတို့၏လုပ်ငန်းလည်ပတ်ဆောင်ရွက်နေသော ရင်းနှီးမြှုပ်နှံသူများကို ပံ့ပိုးကူညီရာတွင် အစိုးရနှင့် CDC တို့၏ ကြိုးပမ်းအားထုတ်မှုများအတွက်ကျေးဇူးတင်ရှိကြောင်း ပြောကြားခဲ့ သည်။
DOCA(ရန်ကုန်)