အီသီယိုးပီးယား-ဂျီဘူတီ မီးရထားလမ်းသည် အီသီယိုးပီးယား၏ ထောက်ပံ့ပို့ဆောင်ရေး ကဏ္ဍကို ချောမွေ့စေပြီး နိုင်ငံ၏သွင်းကုန်-ပို့ကုန် ကုန်သွယ်မှုအတွက် အရေးပါသော လမ်းကြောင်းတစ်ခု အဖြစ် လုပ်ဆောင်နေကြောင်း အီသီယိုးပီးယား အကြီးတန်းအရာရှိများက ပြောကြားခဲ့သည်။ အီသီယိုးပီးယား၏ သယ်ယူပို့ဆောင်ရေးနှင့် သွင်းကုန်-ပို့ကုန် ထောက်ပံ့ ပို့ဆောင်ရေးကဏ္ဍတွင် ပါဝင် ပတ်သက်သူများနှင့် တာဝန်ရှိသူများက စနေနေ့တွင် တွေ့ဆုံစဉ်ယင်းကဲ့သို့ မှတ်ချက်ပြုခဲ့ခြင်းဖြစ် သည်။ ဆွေးနွေးပွဲတွင် အီသီယိုးပီးယား သယ်ယူပို့ဆောင်ရေးနှင့် ထောက်ပံ့ပို့ဆောင်ရေးဝန်ကြီး Alemu Sime က အရှေ့အာဖရိကနိုင်ငံ သည် ၎င်း၏ သယ်ယူပို့ဆောင်ရေးနှင့် ထောက်ပံ့ပို့ဆောင်ရေး ကဏ္ဍကိုခေတ်မီအောင် ကြိုးပမ်းဆောင်ရွက်လျက်ရှိပြီး သွင်းကုန်-ပို့ကုန်ကုန်သွယ်မှုကို အသွင်ပြောင်းရန် အမျိုးသား ရေးရည်မှန်းချက်၏ တစ်စိတ်တစ်ပိုင်းအဖြစ် ပြောကြားခဲ့သည်။ ၇၅၂ ကီလိုမီတာ ရှည်လျားသော အီသီယိုးပီးယား-ဂျီဘူတီ မီးရထားလမ်းသည် ဤအမျိုးသားရေး ရည်မှန်းချက် တွင် အလွန်လိုအပ်နေသော အရှိန်အဟုန်တစ်ခုဖြစ်ပြီး သယ်ယူပို့ဆောင်ရေးနှင့် ထောက်ပံ့ ပို့ဆောင်ရေး ဝန်ဆောင်မှုများ၏ ထိရောက်မှုနှင့် လက်လှမ်းမီနိုင်မှုတို့ကို မြှင့်တင်ရန် အရေးကြီးကြောင်း ၎င်းက ပြောကြားခဲ့သည်။ ဘက်စုံထောက်ပံ့ပို့ဆောင်ရေး အော်ပရေတာ တစ်ခုအနေဖြင့် တရုတ်မှ တည်ဆောက်ထားသော အီသီယိုးပီးယား-ဂျီဘူတီရထားလမ်းသည် ၂၀၁၈ ခုနှစ် ဇန်နဝါရီလတွင် စတင်လည်ပတ်ပြီးကတည်းက ဝန်ဆောင်မှုအမြန်နှုန်းနှင့် ယုံကြည် စိတ်ချရမှု သိသိသာသာတိုးတက်လာကြောင်း အစည်းအဝေးတွင် သွင်းကုန်-ပို့ကုန်ကဏ္ဍမှ ကျွမ်းကျင်သူများနှင့် မူဝါဒချမှတ်သူများက ပြောကြားခဲ့သည်။ Ethio-Djibouti Standard Gauge Railway Share Company (EDR) မှ အမှုဆောင်အရာရှိချုပ် Takele Uma က လျှပ်စစ်ရထားလမ်းသည် နှစ်နိုင်ငံလုံး၏ လူမှုစီးပွား ဖွံ့ဖြိုးတိုးတက်မှုကို အထောက်အကူ ဖြစ်စေပြီး သွင်းကုန်-ပို့ကုန်ကုန်သွယ်မှုတွင် ပါဝင်သော စီးပွားရေးလုပ်ငန်းများအတွက် လျင်မြန်စွာဦးစားပေး သယ်ယူပို့ဆောင်ရေးစနစ် ဖြစ်လာကြောင်း ပြောကြားခဲ့သည်။ ၂၀၁၈ ခုနှစ်စတင်ဖွင့်လှစ်ချိန်မှစ၍ ရထားလမ်းသည်ကုန်စည် ပို့ဆောင်ရေး ဈေးကွက် ဆက်လက်ဖွံ့ဖြိုး တိုးတက်လာခဲ့ပြီး အရည်အသွေးမြင့်ဝန်ဆောင်မှုများဖြစ်သည့် ကွင်းဆက် သယ်ယူပို့ဆောင်ရေး၊ ခရီးသွားရထားနှင့် အထူးရထားများ အပါအဝင် ၎င်း၏ဝန်ဆောင်မှုများကို တိုးချဲ့ခဲ့သည်။
DOCA(ရန်ကုန်)