လာမည့်ဧပြီလတွင် အကောက်ခွန်တိုးမြှင့်နိုင်ချေရှိနေသော်လည်း အိုင်ယာလန်မှ အမေရိကန်သို့တင်ပို့မှုမှာ ဆက်လက်မြင့်တက်လျှက်ရှိကြောင်း သိရပါသည်။ ဇန်နဝါရီလတွင် အိုင်ယာလန်မှ အမေရိကန်သို့တင်ပို့မှုမှာ အမေရိကန်ဒေါ်လာ ၁၂ ဘီလီယံတန်ဖိုးရှိပြီး ၂၀၂၄ ခုနှစ် ဇန်နဝါရီလထက် ၈၀ ရာခိုင်နှုန်းမြင့်တက်ခဲ့ကြောင်း သိရပါသည်။ ထိုအချက်သည် အကောက်ခွန်သစ်များမတိုင်မီ အမေရိကန်သို့ ကုန်ပစ္စည်းများအထူးသဖြင့်ဆေးဝါးများ တင်ပို့မှုမြင့်တက်ခြင်းကို ရောင်ပြန်ဟပ်ကြောင်း သိရပါသည်။ အမေရိကန်သမ္မတဒေါ်နယ်ထရမ့် သည် ဧပြီလ ၂ ရက်နေ့တွင် အကောက်ခွန်နှုန်းများတိုးမြှင့်မည်ဟု ကြေညာထားကြောင်း သိရပါ သည်။ ထရမ့်က ထိုသို့ လုပ်ဆောင်မှုသည် ၎င်းတို့နိုင်ငံက အခြားနိုင်ငံများကို ရူးသွပ်စွာပေးအပ်ခဲ့ သည့် ကြွယ်ဝမှုများကို ပြန်လည် ရယူရန်ရည်ရွယ်ကြောင်းပြောကြားခဲ့ပါသည်။ ပြည်ပမှ ကုန်ပစ္စည်းများ ပြည်တွင်းသို့ တင်သွင်းသည့်လုပ်ငန်းများသည် အစိုးရကို အကောက်ခွန် ပေးရမည်ဟု သိရပါသည်။ အစိုးရအနေဖြင့် စားသုံးသူများအတွက် ဈေးနှုန်းကြီးမားမှုကို ဖြစ်ပေါ် စေနိုင်သည့် နိုင်ငံတကာယှဉ်ပြိုင်မှု များထံမှ ပြည်တွင်းစက်မှုလုပ်ငန်းများကို ကာကွယ်ရန် အကောက်ခွန်များကို အသုံးပြုသွားမည် ဟုသိရပါသည်။ ထရမ့်သည် ကုန်သွယ်ရေးပိုငွေဟု အဓိပ္ပါယ်ရသည့် အိုင်ယာလန်က အမေရိကန် ထံမှဝယ်ယူသည်ထက် ပိုမိုရောင်းချနေမှုအပေါ် မကျေမနပ်ဖြစ်နေကြောင်း သိရပါသည်။ လွန်ခဲ့သည့်လက အိုင်ယာလန်ဝန်ကြီးချုပ်နှင့် အစည်းအဝေးတွင် ကုန်သွယ်ရေးမညီမျှမှုသည် အလွန် ကြီးမားသည်ဟု ပြောကြားခဲ့ကြောင်း သိရပါသည်။ ထရမ့်က ၎င်းတို့အနေဖြင့် ထိုကိစ္စကို အကောင်းမွန်ဆုံးနည်းလမ်းဖြင့်ဖြေရှင်းရန် အလိုရှိကြောင်းနှင့် အတူတကွလုပ်ဆောင်သွားမည် ဖြစ်ကြောင်း ပြောကြားခဲ့သည်ဟု သိရပါ သည်။ ၂၀၂၄ ခုနှစ်တွင် အိုင်ယာလန်က အမေရိကန်သို့ တင်ပို့မှုတန်ဖိုးမှာ အမေရိကန်ဒေါ်လာ ၆၀.၄ ဘီလီယံရှိခဲ့ပြီး ပြန်လည်တင်သွင်းမှုမှာ အမေရိကန် ဒေါ်လာ ၁၈.၇ ဘီလီယံသာရှိသည့် အတွက် အိုင်ယာလန်က ကုန်သွယ်ရေးပိုငွေ အမေရိကန် ဒေါ်လာ ၄၁.၆ ဘီလီယံ ရရှိနေကြောင်း အိုင်ယာလန်ဗဟိုစာရင်းအင်းရုံးထံမှ အချက်အလက်များအရ သိရပါသည်။ အိုင်ယာလန်က ကုန်သွယ်ရေးပိုငွေပြသည့် အဓိကအကြောင်းအရင်းမှာ လတ်တလောတွင် ၎င်းတို့၏ ဆေးဝါး ထုတ်လုပ်သူများက ထုတ်ကုန်အများစုကို အမေရိကန်သို့ တင်ပို့ခြင်းကြောင့်ဖြစ်ကြောင်း သိရပါသည်။ စာရင်းအင်းရုံးက ၂၀၂၄ ခုနှစ်တွင် စုစုပေါင်းဆေးနှင့် ကျန်းမာရေးထုတ်ကုန်များ တင်ပို့မှုမှာ အမေရိကန်ဒေါ်လာ ၂၂.၄ ဘီလီယံ မြင့်တက်ခဲ့ကြောင်း ပြောကြားခဲ့ပါသည်။ ထိုထုတ်ကုန်များသည် အိုင်ယာလန်ကုန်ပစ္စည်းတင်ပို့မှု၏ ၄၅ ရာခိုင်နှုန်း ရှိကြောင်း သိရပါသည်။ အမေရိကန်ဆေးဝါးကုမ္ပဏီများသည်လည်း အကောက်ခွန်နှုန်းနည်းပါးမှု ကြောင့် အိုင်ယာလန်တွင်ထုတ်လုပ်နေကြောင်း သိရပါသည်။ ထရမ့်က အိုင်ယာလန်အား အမေရိကန် ဆေးဝါးလုပ်ငန်းတစ်ခုလုံးကို ဆုပ်ကိုင်အသုံးချထားကြောင်း ပြောကြားခဲ့ကြောင်း သိရှိရပါသည်။
BBC News
DOCA(ရန်ကုန်)