ထိုင်းနိုင်ငံတွင် ကော်ဖီစေ့ဈေးနှုန်းများ မြင့်တက်လျက်ရှိမှုနှင့်အတူ စိုက်ပျိုးထုတ်လုပ်မှု ဧရိယာကို တိုးချဲ့လျက်ရှိသော်လည်း အထွက်ပမာဏ သိသာစွာကျဆင်းလျက် ကော်ဖီစေ့ပြတ် လပ်မှုနှင့် ကြုံတွေ့နေရသဖြင့် ၂၀၂၅ ခုနှစ်တွင် ကော်ဖီစေ့၊ အသင့်သောက်သုံးနိုင်သောကော်ဖီနှင့် အခြားသော ကော်ဖီထုတ်ကုန်များ အပါအဝင် ကော်ဖီတန်ချိန် ၈၀၀၀၀ ခန့်အထိ တင်သွင်းရဖွယ်ရှိ သည်ဟု အစိုးရ အဆင့်မြင့်အရာရှိတစ်ဦးက မတ်လ ၁၈ ရက်နေ့၌ ပြောဆိုကြောင်း The Nation Thailand သတင်းဌာနက ဖော်ပြပါသည်။
လယ်ယာထွက်ကုန် စီးပွားရေးရာရုံးမှ ဒုတိယ အထွေထွေအတွင်းရေးမှူးချုပ် Thantita Boonyamaneekul က ၂၀၂၃ ခုနှစ်တွင် ထိုင်းနိုင်ငံ၏ ကော်ဖီစေ့ထုတ်လုပ်မှုမှာ စုစုပေါင်း တန်ချိန် ၁၅၆၅၁ တန်ရှိပြီး အာရေးဗီးကာ ကော်ဖီ ၁၀၆၈၂ တန်နှင့် ရိုဘတ်စတာကော်ဖီ ၄၉၆၉ တန် ပါဝင် ကြောင်း၊ ၎င်းပမာဏသည် ယခင်နှစ်ထုတ်လုပ်မှုနှင့် နှိုင်းယှဉ်ပါက ၉၇၂ တန် လျော့နည်းလျက်ရှိ ကြောင်း၊ ကော်ဖီစိုက်ဧရိယာများကို တိုးချဲ့လျက်ရှိနေသော်လည်း ထုတ်လုပ်မှုမှာ ကျဆင်းလျက်ရှိ ကြောင်း၊ ပြည်တွင်း၌ နှစ်စဉ် ကော်ဖီစေ့သုံးစွဲမှုမှာ တန်ချိန် ၉၅၅၀၀ ခန့်ရှိသဖြင့် ယခုနှစ်တွင် ပြည်တွင်းဝယ်လိုအားကို ဖြည့်ဆည်းနိုင်ရန်အတွက် အနည်းဆုံး ကော်ဖီတန်ချိန် ၈၀၀၀၀ ခန့်ကို တင်သွင်းရန် လိုအပ်ကြောင်း၊ ကော်ဖီဈေးနှုန်းများ မြင့်တက်လျက်ရှိမှုအရ ကော်ဖီစိုက်ခင်းများကို ဆက်လက် တိုးချဲ့စိုက်ပျိုးမှုရှိနေမည်ဖြစ်ကြောင်း ပြောကြားခဲ့သည်။
ထိုင်းနိုင်ငံ၌ ၂၀၂၄ ခုနှစ် မတ်လအထိ အာရေးဗီးကာ ကော်ဖီစိုက်ဧရိယာ ၁၃၉၉၉၈ ရိုင်နှင့် ရိုဘတ်စတာကော်ဖီ စိုက်ဧရိယာ ၈၀၅၅၅ ရိုင်တို့ကို တောင်သူများက စိုက်ပျိုးထားပြီးဖြစ်ကြောင်း၊ ယခင်နှစ် ကာလတူနှင့် နှိုင်းယှဉ်ပါက ၄၀၃၆ ရိုင် တိုးတက်လာခဲ့ကြောင်း သိရှိရသည်။ (၁ ရိုင်သည် ၀.၃၉၅၃၆၉ ဧကနှင့် ညီမျှသည်။)
ထိုင်းဈေးကွက်တွင် မတ်လ၌ ဖြစ်ပေါ်လျက်ရှိသော ကော်ဖီစေ့ ပျမ်းမျှဈေးနှုန်းများမှာ အာရေးဗီးကာကော်ဖီစေ့ ၁ ကီလိုဂရမ်လျှင် ၁၆၃ ဘတ်ရှိပြီး ၅ နှစ်တာကာလ ပျမ်းမျှဈေးနှုန်း ဘတ် ၁၆၀ ၏ အထက်တွင်ရှိနေသည်။ ရိုဘတ်စတာကော်ဖီစေ့ ၁ ကီလိုဂရမ်၏ ပျမ်းမျှဈေးနှုန်းမှာမူ ၁၈၈ ဘတ်နှုန်းအထိရှိပြီး ၅ နှစ်တာကာလ ပျမ်းမျှဈေးနှုန်းဖြစ်သော ၁ ကီလိုဂရမ်လျှင် ဘတ် ၈၀ နှုန်း ထားထက် နှစ်ဆကျော် မြင့်မားလျက်ရှိကြောင်း သိရှိရသည်။
Source: The Nation Thailand, 18 Mar 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)