ကမ္ဘောဒီးယားသည် အစိုးရ၏ မဟာဗျူဟာများနှင့် အားကောင်းသောရင်းနှီးမြုပ်နှံမှု မူဝါဒများကြောင့် ရင်းနှီးမြှုပ်နှံသူများ၏ ယုံကြည်မှုတွင် သိသာထင်ရှားစွာ မြင့်တက်လာသည်ကို မြင်တွေ့နေရကြောင်း ကမ္ဘောဒီးယား ဖွံ့ဖြိုးတိုးတက်ရေးကောင်စီ (CDC) ၏ ကမ္ဘောဒီးယား ရင်းနှီးမြှုပ်နှံမှု ဘုတ်အဖွဲ့ အတွင်းရေးမှူးချုပ် Chea Vuthy က ၃၁-၃-၂၀၂၅ ရက်နေ့က ပြောကြားခဲ့သည်။ ၂၀၂၅ ခုနှစ်၊ ပထမသုံးလပတ်တွင် CDC မှ ရင်းနှီးမြှုပ်နှံမှု စီမံကိန်း ၁၇၂ ခုကို အတည်ပြုခဲ့ပြီး ယင်းတို့အနက် အတည်ပြုထားသည့် တရုတ်ရင်းနှီးမြှုပ်နှံမှုစီမံကိန်းများသည် ပရောဂျက်စုစုပေါင်း၏ ၈၀ ရာခိုင်နှုန်းအထိရှိကြောင်း၊ အရင်းအနှီးများ ဝင်ရောက်လာခြင်း အထူးသဖြင့် တရုတ်နိုင်ငံမှ နိုင်ငံတော်၏စီးပွားရေး အလားအလာအပေါ် ခိုင်မာသော ရင်းနှီးမြှုပ်နှံသူများ၏ ယုံကြည်မှုကိုပေါ်လွင်စေသည်ဟု Chea Vuthy က ပြောကြားခဲ့သည်။ စီမံကိန်းများသည် ကုန်ထုတ်လုပ်မှု၊ အခြေခံအဆောက်အအုံ၊ စိုက်ပျိုးရေးနှင့် ခရီးသွားလာရေး အပါအဝင် ကဏ္ဍအသီးသီးကို လွှမ်းခြုံထားပြီး ကွဲပြားသော ရင်းနှီးမြှုပ်နှံမှု အခင်းအကျင်းကို ညွှန်ပြပါသည်။ ရင်းနှီးမြှုပ်နှံမှု ပရောဂျက်များ သိသိသာသာ တိုးလာခြင်းသည် ဒေသတွင်းနှင့် ကမ္ဘာလုံးဆိုင်ရာ ခေတ်ရေစီးကြောင်းများကို ထင်ဟပ်စေရုံသာမက ကမ္ဘောဒီးယားတွင် ရင်းနှီးမြှုပ်နှံသူများ၏ ယုံကြည်မှုကိုလည်း ပြသနေသည့်အပြင် အထူးသဖြင့် ကမ္ဘောဒီးယားတွင် စီးပွားရေးနှင့် ရင်းနှီးမြှုပ်နှံမှု အခြေအနေများပိုမိုကောင်းမွန်လာစေရန် တော်ဝင်အစိုးရ၏ ကတိကဝတ်များ၏ ရလဒ်ဖြစ်ကြောင်း Chea Vuthy က ဆက်လက်ပြောကြားခဲ့သည်။ ကမ္ဘောဒီးယား ကုန်သည်ကြီးများအသင်း ဒုတိယဥက္ကဌ Lim Heng က ကမ္ဘောဒီးယားတွင် နိုင်ငံခြားတိုက်ရိုက်ရင်းနှီးမြှုပ်နှံမှု(FDI) များ တိုးလာခြင်းသည် အာဆီယံအဖွဲ့အတွင်း ကမ္ဘောဒီးယား၏ ပထဝီဝင်နေအထား၊ တည်ငြိမ်သော နိုင်ငံရေး၊ နိုင်ငံခြားရင်းနှီးမြုပ်နှံမှုများကို လွယ်ကူချောမွေ့သော လုပ်ထုံးလုပ်နည်းများနှင့် အစိုးရ၏ ကြိုးပမ်းအားထုတ်မှုများအပါအဝင် အကြောင်းအချက်များစွာကြောင့်ဖြစ်သည်ဟု ပြောကြားခဲ့သည်။ ၂၀၂၄ ခုနှစ်တွင် CDC မှ အထူးစီးပွားရေးဇုန်များ အတွင်းနှင့် ပြင်ပတွင် ရင်းနှီးမြှုပ်နှံမှု စီမံကိန်းစုစုပေါင်း ၄၁၄ ခုကို အတည်ပြုခဲ့ပြီး စုစုပေါင်း ရင်းနှီးမြှုပ်နှံမှု အရင်းအနှီး ခန့်မှန်းခြေ အမေရိကန်ဒေါ်လာ ၆.၉ ဘီလီယံရှိကြောင်း သိရသည်။ ၂၀၂၃ ခုနှစ်နှင့် နှိုင်းယှဉ်ပါက ရင်းနှီးမြှုပ်နှံမှု စီမံကိန်း အရေအတွက်မှာ ခန့်မှန်းခြေ ၅၄ ရာခိုင်နှုန်း တိုးလာပြီး ရင်းနှီးမြှုပ်နှံမှု အရင်းအနှီးမှာ ၄၀ ရာခိုင်နှုန်းခန့် တိုးမြင့်လာခဲ့သည်။
Source : Khmer Times
DOCA(ရန်ကုန်)