ကမ္ဘောဒီးယား ဖွံ့ဖြိုးတိုးတက်ရေးကောင်စီ (CDC) ၏ ၆-၅-၂၀၂၅ ရက်နေ့က ထုတ်ပြန်ခဲ့ သည့် အစီရင်ခံစာတွင် ကမ္ဘောဒီးယားသည် ၂၀၂၅ ခုနှစ် ပထမလေးလတွင် ပုံသေ ရင်းနှီးမြှုပ်နှံမှု ကန်ဒေါ်လာ ၃.၄ ဘီလီယံရရှိခဲ့ပြီး ၂၀၂၄ ခုနှစ် အလားတူကာလနှင့် နှိုင်းယှဉ်ပါက ၃၄ ရာခိုင်နှုန်း တိုးလာခဲ့သည်။ ကမ္ဘောဒီးယားနိုင်ငံသည် ၂၀၂၅ ခုနှစ်၊ ဇန်နဝါရီမှ ဧပြီလအတွင်း ရင်းနှီးမြှုပ်နှံမှု စီမံကိန်း ၂၃၁ ခုကို အတည်ပြုခဲ့ပြီး ၂၀၂၄ ခုနှစ် အလားတူကာလတွင် စီမံကိန်း ၁၂၈ ခုထက် ၈၀ ရာခိုင်နှုန်းတိုးကာ အလုပ်အကိုင် ၁၅၉,၀၀၀ ခန့် ဖန်တီးပေးခဲ့သည်ဟု အစီရင်ခံစာတွင် ဖော်ပြထားသည်။ ထင်ရှားသော စီမံကိန်းများတွင် ဂိုထောင်စက်ကိရိယာများ ထုတ်လုပ်သည့် စက်ရုံ၊ ကားတာယာစက်ရုံ၊ ကားတပ်ဆင်သည့်စက်ရုံ၊ လျှပ်စစ်သုံးဘီး တပ်ဆင်သည့်စက်ရုံ၊ ဆေးဘက်ဆိုင်ရာ ကိရိယာများ ထုတ်လုပ်သည့် စက်ရုံ၊ ဆိုလာပြားထုတ်လုပ်သည့် စက်ရုံ၊ သတ္တုနှင့်အလူမီနီယံ ပြုပြင်ထုတ်လုပ်သည့် စက်ရုံများ၊ ဆိပ်ကမ်းနှင့် ခရီးသွား အပန်းဖြေစခန်း တို့ပါဝင်သည်။ တရုတ်နိုင်ငံသည် ကမ္ဘောဒီးယားနိုင်ငံ၏ ထိပ်တန်းနိုင်ငံခြား ရင်းနှီးမြှုပ်နှံသူ အဖြစ်ဆက်လက်ရပ်တည်နေကြောင်း CDC က အစီရင်ခံစာတွင် ဖော်ပြထားသည်။ ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၏ ပြောရေးဆိုခွင့်ရှိသူ Penn Sovicheat က ဒေသတွင်းဘက်စုံစီးပွားရေးပူးပေါင်းဆောင်ရွက်မှု (RCEP) သဘော တူညီချက်နှင့် တရုတ်၊ တောင်ကိုရီးယား၊ အာရပ်စော်ဘွားများ ပြည်ထောင်စုတို့နှင့် ကမ္ဘောဒီးယား နှစ်နိုင်ငံ လွတ်လပ်စွာ ကုန်သွယ်မှု သဘောတူညီချက် (FTAs) တို့သည် နိုင်ငံခြား တိုက်ရိုက် ရင်းနှီးမြှုပ်နှံမှုကို ဆွဲဆောင်ရန် အဓိက အချက်ဖြစ်ကြောင်း ပြောကြားခဲ့သည်။ ရင်းနှီးမြှုပ်နှံမှုအသစ်များသည် အရင်းအနှီးအသစ်များ၊ နည်းပညာများနှင့် ကမ္ဘောဒီးယား ပြည်သူများအတွက် အလုပ်အကိုင်အခွင့်အလမ်းသစ်များ ဆောင်ကြဉ်းပေးမည်ဟု Penn Sovicheat ကဆက်လက်ပြောကြားခဲ့သည်။
Source: Khmer Times
DOCA(ရန်ကုန်)