ဆန်တင်ပို့မှုရည်မှန်းချက်ပြည့်မီရန် ထိုင်းမျှော်လင့်

ယခုနှစ်၏ပထမ ၃ လပတ်ကာလတွင်တင်ပို့မှုကျဆင်းခဲ့သော်လည်း အမေရိကန်သို့ ရောင်းချမှုမြင့်တက်ခဲ့သောကြောင့် ထိုင်းအစိုးရသည် ယခုနှစ်အတွက် ဆန်တင်ပို့မှုရည်မှန်းချက် ဖြစ်သည့် မက်ထရစ်တန် ၇.၅ သန်း ရရှိရန်မျှော်လင့်လျှက်ရှိကြောင်း ထိုင်းနိုင်ငံစီးပွားကူးသန်း ဝန်ကြီးဌာနမှ တာဝန်ရှိသူတစ်ဦးက မေလ ၄ ရက်နေ့က ပြောကြားခဲ့ပါသည်။ ဝန်ကြီးဌာနသည် တရုတ်အပါအဝင် အစိုးရချင်းသဘောတူညီချက်များဖြင့် ဆန်တင်ပို့မှုများ ဆက်လက်ပြုလုပ် သွားမည်ဖြစ်ပြီး အာဖရိကဈေးကွက်များသို့ တင်ပို့ရန်အတွက် တွန်းအားပေးဆောင်ရွက်သွား မည်ဟု ဝန်ကြီးဌာန၏ နိုင်ငံခြားကုန်သွယ်ရေးဦးစီးဌာန၏ အကြီးအကဲ Arada Fuangtong က သတင်းထောက်များကို ပြောကြားခဲ့ပါသည်။ အမေရိကန်၏ အကောက်ခွန်သစ်များ မချမှတ်မီ ထိုင်းဆန်တင်ပို့ရာအကြီးမားဆုံးဈေးကွက်ဖြစ်သည့်အမေရိကန်သို့ ထိုင်းစံပယ်ဆန်မွှေးတင်ပို့မှု မြင့်တက်ခဲ့ကြောင်း သိရပါသည်။ အိန္ဒိယနိုင်ငံက ဆန်တင်ပို့မှုပြန်လည်စတင်ပြီးနောက် ကမ္ဘာ့ ဒုတိယအကြီးမားဆုံးဆန်တင်ပို့သူဖြစ်သည့် ထိုင်းနိုင်ငံသည် ယခုနှစ်၏ ပထမ ၃ လပတ်ကာလ တွင် ယခင်နှစ် တူညီသည့်ကာလထက် ၃၀ ရာခိုင်နှုန်းကျဆင်းခဲ့ကြောင်း သိရပါသည်။ လွန်ခဲ့သည့်လတွင် ထိုင်းဆန်တင်ပို့သူများအသင်းက ယခုနှစ်အတွက် ဆန်တင်ပို့မှုသည် ရည်မှန်းချက်ဖြစ်သည့် တန်ချိန် ၇.၅ သန်းအောက်ကျဆင်းနိုင်ကြောင်း ပြောကြားခဲ့ပါသည်။ အမေရိကန်-တရုတ်ကုန်သွယ်ရေးတင်းမာမှုအရှိန်မြင့်တက်လာသော်လည်း ထိုင်းနိုင်ငံကုန်သွယ် ရေးမူဝါဒနှင့် မဟာဗျူဟာရုံး၏အဆိုအရ တိရိစ္ဆာန်အစာနှင့် ဆန်ပါဝင်သည့် များစွာသော ထိုင်းထုတ်ကုန်များသည် အမေရိကတွင် ပိုမိုကြီးမားသောဈေးကွက်ဝေစုကိုရရှိနိုင်ကြောင်း သိရပါသည်။

Reference; Bangkok Post

DOCA(ရန်ကုန်)