ဖိလစ်ပိုင်နိုင်ငံ၏ ပြည်တွင်းအသားတင်ထုတ်ကုန် (GDP) သည် ၂၀၂၅ ခုနှစ် ပထမသုံးလပတ်တွင် ယခင်နှစ်ထက် ၅.၄ ရာခိုင်နှုန်း တိုးတက်လာခဲ့ကြောင်း ဖိလစ်ပိုင်စာရင်းအင်းအာဏာပိုင်အဖွဲ့ (PSA) က မေလ ၈ ရက်နေ့က ပြောကြားခဲ့သည်။ သတင်းစာရှင်းလင်းပွဲတစ်ခုတွင် PSA အကြီးအကဲ Dennis Mapa က ပထမသုံးလပတ်တိုးတက်မှုအတွက် အဓိကပံ့ပိုးသူများမှာ လက်လီလက်ကား ရောင်းဝယ်မှု၊ မော်တော်ကားနှင့်ဆိုင်ကယ်ပြုပြင်ခြင်း၊ ငွေကြေးနှင့် အာမခံလုပ်ငန်းများနှင့် ထုတ်လုပ်မှုလုပ်ငန်းတို့ ဖြစ်ကြောင်းပြောကြားခဲ့သည်။ ဝယ်လိုအားဘက်တွင်၊ အိမ်ထောင်စု နောက်ဆုံးစားသုံးမှုအသုံးစရိတ်သည် ၂၀၂၅ ခုနှစ် ပထမသုံးလပတ်တွင် ၅.၃ ရာခိုင်နှုန်း တိုးတက်ခဲ့ သည်။ စီးပွားရေး၊ စီမံကိန်းနှင့် ဖွံ့ဖြိုးတိုးတက်ရေးဌာန လက်ထောက်အတွင်းဝန် Rosemarie Edillon က ပထမသုံးလပတ် GDP သည် "တည်ငြိမ်သော တိုးတက်မှု၏ လက္ခဏာ" ဟု ပြောကြားခဲ့သည်။ ဖိလစ်ပိုင်နိုင်ငံ၏ GDP သည် ယခုနှစ်တွင် ၆ ရာခိုင်နှုန်းနှင့် ၂၀၂၆ ခုနှစ်တွင် ၆.၁ ရာခိုင်နှုန်း တိုးလာမည်ဟု အာရှဖွံ့ဖြိုးရေးဘဏ်က ခန့်မှန်းထားသည်။ မနီလာအခြေစိုက် ဘဏ်သည် အမေရိကန်အစိုးရထံမှ အခွန်စည်းကြပ်မှုအသစ်များ ဧပြီလ ၂ ရက်မကြေငြာမီတွင် ၎င်း၏ တိုးတက်မှု ခန့်မှန်းချက်များကို အပြီးသတ်ခဲ့ကြောင်း ရှင်းလင်းစွာ ပြောကြားခဲ့ပြီး အခြေခံခန့်မှန်းချက်များသည် ယခင်ထားရှိခဲ့သည့် အခွန်အခများကိုသာ ထင်ဟပ်စေကြောင်းပြောကြားခဲ့သည်။
Source : Xinhua
DOCA(ရန်ကုန်)