စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးအနေဖြင့် မြင်းခြံမြို့ရှိ MSME လုပ်ငန်းများဖွံ့ဖြိုးတိုးတက်ရေး၊ ထုတ်ကုန်များလုံခြုံစိတ်ချရမှုရှိစေရေး၊ ဥပဒေများနှင့်အညီ ထုတ်လုပ်နိုင်စေရေးအတွက် ဈေးကွက်စောင့်ကြည့် စစ်ဆေးခြင်းများကို(၇.၅.၂၀၂၅) ရက်နေ့၊ နံနက်(၀၉:၀၀) နာရီအချိန်တွင် စဉ်ဆက်မပြတ်ဆောင်ရွက်လျက်ရှိရာ ခရိုင်ဦးစီးမှူး ဦးသန်းစိုးနှင့် ဝန်ထမ်းများသည် မြင်းခြံမြို့၊ လယ်သစ်ကျေးရွာရှိ ဖြိုးလင်းအမှတ်တံဆိပ် ပဲကြော်လုပ်ငန်းခွင်သို့ ကွင်းဆင်းခြင်း လုပ်ငန်းဆောင်ရွက်ခဲ့ကြောင်း သိရသည်။
ဖြိုးလင်းအမှတ်တံဆိပ်ပဲကြော်လုပ်ငန်းသည် တစ်ရက်လျှင် ပဲကြီး တစ်တင်းခွဲအိတ်(၁၂) အိတ် အသုံးပြုရကြောင်း၊ပဲကြီးကို မုံရွာမြို့မှ အများဆုံးဝယ်ယူပြီး အိမ်အရောက် တစ်ပိဿာလျှင် (၅၂၀၀)ကျပ် ကျသင့်ပါကြောင်း၊ သာကူမှုန့်(၁)အိတ်လျှင် (၅)သောင်းကျသင့်ကုန်ကျပါကြောင်း၊ ဆီပိဿာချိန်(၄၀)ပိဿာ ကုန်ကျပါကြောင်း၊ ပဲကြီးကို လက်ညှစ်နှင့် စက်ခွဲဟူ၍ နှစ်မျိုးအသုံးပြု ပါကြောင်း၊လက်ညှစ်လုပ်သားခအနေဖြင့် တစ်ပြည်ကို (၄၀၀)ကျပ်ပေးရပြီး နေ့စဉ် တစ်တင်းခွဲ ရေစိမ်ပြီးပြုလုပ်ပါကြောင်း၊ ပဲခွံကိုလည်း ရွာမှတောင်သူဦးကြီးများမှ နွားစာအဖြစ် တစ်ပိဿာ (၁၀၀၀/၁၃၀၀)ကျပ်ဖြင့်ရောင်းချရပါကြောင်း၊ လုပ်သားအနေဖြင့် (၁၂)ယောက်ခန့်ရှိပြီး ကြော်သော လုပ်သားခ(၁၅၀၀၀)ကျပ်ထိပေးရပါကြောင်း၊ ဖြန့်ဖြူးမှုအနေဖြင့် နောင်ချို၊ တောင်ကြီး၊ နေပြည်တော်၊ ကျောက်ဆည်မြို့၊ လားရှိုးမြို့နှင့်ဒေသတွင်း ဖြန့်ဖြူးပါကြောင်း သိရသည်။ ခရိုင်ဦး စီးမှူးမှ MSME လုပ်ငန်းများဖွံဖြိုးတိုးတက်ရေးကို အားပေး ဆောင်ရွက်လျက်ရှိပါကြောင်း၊ လုပ်ငန်း သုံးစားအုန်းဆီများကိုလည်း လုပ်ငန်းခွင်များတွင် မှန်ကန်စွာ သုံးစွဲရမည်ဖြစ်ပါကြောင်း၊ လုပ်ငန်းရှင်များအနေဖြင့် ကုန်ကြမ်းပစ္စည်းများသည် အရည်အသွေး ကောင်းမွန်မှုရှိရန်၊ မိမိတို့ထုတ်လုပ်သော ကုန်ပစ္စည်းများကို သန့်ရှင်းသပ်ရပ်စွာဖြင့် ထုတ်လုပ်၍ ကျန်းမာရေးနှင့်ညီညွတ်ရန် အထူးအလေးထားလုပ်ဆောင်ရမည်ဖြစ်ပါကြောင်း၊ ကုန်စည်နှင့်သက်ဆိုင်သည့် ထည့်သွင်းဖော်ပြရမည့် ကုန်အညွှန်းအမှတ်အသားများ ပြည့်စုံစွာပါရှိရမည်ဖြစ်ပါကြောင်း၊ စားသုံးသူများဘေး အန္တရာယ်ကင်းရှင်းစွာစားသုံးနိုင်စေရေးနှင့် သက်ဆိုင်ရာဌာနများ၏ ပြဌာန်းချက်များကိုလည်း လိုက်နာဆောင်ရွက်ရန်လိုအပ်ပါကြောင်း အသိပညာပေး၍ ဈေးကွက် စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်း သိရသည်။
DOCA(မန္တလေး)