မွန်ပြည်နယ်၊ ကျိုက်မရောမြို့နယ်၊ မြကုန်းကျေးရွာတွင် ရာသီအလိုက် ဟင်းသီး ဟင်းရွက် မျိုးစုံစိုက်ပျိုးရောင်းချသူ မိသားစု ဝင်ငွေတိုးကာ အဆင်ပြေလျှက်ရှိသည်။ ရာသီပေါ် ဟင်းသီးဟင်းရွက် မျိုးစုံစိုက်ပျိုးရေးလုပ်ကိုင်သူများ အနေဖြင့် မိမိတို့ ခြံမြေ၊ လယ်ယာမြေများပေါ်၌ မီးဖိုချောင်သုံး သီးနှံများဖြစ်သည့် ငရုတ်၊ ချဉ်ပေါင်ရွက်၊ ကန်စွန်းရွက်၊ ကြက်သွန်မိတ်၊ ကျောက်ဖရုံသီး၊ သခွားသီးစသည့် သီးနှံများအား စုံလင်အောင် စနစ်တကျ စိုက်ပျိုးကြပြီး စိုက်ပျိုးသည့်အခါတွင်လည်း ဓာတုဓာတ်ကင်းအောင် Super ဘိုကာရှီ၊ EMဘိုကာရှီ၊ သဘာဝနွားချေး၊ မြေဆွေး၊ မြေသြဇာများကိုသာ စနစ်တကျပြုလုပ်အသုံးချပြီး တူးမြောင်းရေဖြင့် ရေသွယ်စိုက်ပျိုးကာ စားသုံးသူများ အန္တရာယ်မဖြစ်စေရန် စိုက်ပျိုးကြကြောင်း တောင်သူ ဦးသားကြီး ကပြောသည်။
ဟင်းသီးဟင်းရွက်များကို လတ်လတ်ဆတ်ဆတ်ခူး၍ မိမိကျေးရွာဈေးနှင့်မြို့ဈေး များသို့ ဖောက်သည်သွင်းရသည့်အပြင် ရပ်ကွက်အတွင်း၌လည်း ဆိုင်ကယ်ဘေးတွဲယာဉ်ဖြင့် လှည့်လည်ရောင်းချပေးသည့် Mobile ဈေးသည်များကိုပါ ပေါက်ဈေးထက်လျော့ကာ ဖြန့်ပေးရသဖြင့် နေ့စဉ် မိသားစု အပိုဝင်ငွေရရှိလျက်ရှိကြောင်း သိရသည်။
DOCA (မွန်)