ကျေးလက်ဒေသဖွံ့ဖြိုးရေးနှင့် ကျေးရွာသားများ၏ စီးပွားရေး အခြေအနေကို အထောက် အကူ ဖြစ်စေရန် ပုသိမ်မြို့နယ်အတွင်းရှိ ကျေးရွာများတွင် သံပုရာသီး စိုက်ပျိုးမှုကို တိုးချဲ့ လုပ်ကိုင်လျက်ရှိရာ ဒေသခံများ၏ ဝင်ငွေများ သိသိသာသာ တိုးတက်လာသည်ဟု သိရသည်။
ပုသိမ်မြို့နယ်၏ ရာသီဥတုနှင့် မြေဩဇာကောင်းမွန်မှုတို့ကြောင့် သံပုရာသီးများ အထူး ကောင်းမွန်စွာ ဖြစ်ထွန်းပြီး ဈေးကွက်တွင် ဝယ်လိုအားမြင့်မားနေခြင်းက ကျေးရွာသားများအား စိုက်ပျိုးရေးလုပ်ငန်းကို ပိုမိုအားစိုက်လုပ်ကိုင်စေသည်။ ကျေးရွာအချို့တွင် သံပုရာခြံများကို အစုအဖွဲ့ လိုက် စိုက်ပျိုးလုပ်ကိုင်လာကြပြီး ကျေးလက်ဒေသဖွံ့ဖြိုးရေး လုပ်ငန်းများမှလည်း နည်းပညာနှင့် ငွေကြေးပံ့ပိုးမှုများ ပေးခဲ့သည်။ "အရင်က စပါးတစ်မျိုးတည်းကိုပဲ အားကိုးခဲ့ ရတာ။ အခုတော့ သံပုရာစိုက်ပြီး တစ်နှစ်ကို သိန်းချီဝင်ငွေရနေတယ်" ဟု ဒေသခံ တောင်သူ တစ်ဦးဖြစ်သူက ပြောသည်။
သံပုရာသီးများကို ပုသိမ်မြို့နယ်အတွင်းသာမက အနီးအနားရှိ မြို့ကြီးများသို့ပါ တင်ပို့ရောင်းချ နိုင်ပြီး ဝင်ငွေရရှိမှု ပိုမိုကောင်းမွန်လာခြင်းကြောင့် ကျေးရွာများ၏ လူမှု စီးပွားဘဝများ တဖြည်းဖြည်း ပြောင်းလဲတိုးတက်လာပြီး ကျေးလက်ဒေသဖွံ့ဖြိုးရေးအတွက် သဘာဝအခြေခံ စိုက်ပျိုးရေးလုပ်ငန်း များကို မြှင့်တင်ပေးခြင်းဖြင့် ကျေးရွာသားများ၏ စီးပွားရေး အခွင့်အလမ်းများ ပိုမိုရရှိလာစေကာ သံပုရာသီးစိုက်ပျိုးမှုသည် ကျေးလက်နေပြည်သူများ၏ ဒေသစီးပွားရေးကို အထောက်အကူဖြစ်လာစေနိုင်ပါသည်။
DOCA(ဧရာဝတီ)