တရုတ်နိုင်ငံဈေးကွက်၌ ဗီယက်နမ် သရက်သီးများ ဝေစုရရှိမှု မြင့်တက်

     ယခုနှစ် ပထမသုံးလပတ်တွင် တရုတ်နိုင်ငံသို့ ဗီယက်နမ်နိုင်ငံ၏ သရက်သီးတင်ပို့မှုသည် ထိုင်း၊ ပီရူးနှင့် ဩစတြေးလျနိုင်ငံတို့ ကဲ့သို့သော အဓိကသရက်သီးတင်ပို့သည့် နိုင်ငံများကို ကျော်ဖြတ်ပြီး တရုတ်သရက်သီး တင်သွင်းမှုဈေးကွက်၏ ၉၇ ရာခိုင်နှုန်း ဝေစုရရှိသည်အထိ စွမ်းဆောင်နိုင်ခဲ့ကြောင်း သိရှိရပါသည်။

    အရည်အသွေးထိန်းသိမ်းထားနိုင်ခြင်း၊ အချိန်နှင့်တစ်ပြေးညီ တင်ပို့နိုင်ခြင်းနှင့် ဈေးနှုန်း ယှဉ်ပြိုင်နိုင်စွမ်းရှိခြင်းတို့ကြောင့် ယခုကဲ့သို့ အောင်မြင်မှုရရှိခဲ့ခြင်းဖြစ်ပါသည်။

     တရုတ်အကောက်ခွန်ဌာန၏ သတင်းအချက်အလက်အရ တရုတ်နိုင်ငံသည် ၂၀၂၅ ခုနှစ် ပထမသုံးလပတ်တွင် နိုင်ငံ ၆ ခုထံမှ ဒေါ်လာ ၂၉ သန်း တန်ဖိုးရှိသော သရက်သီးများ ဝယ်ယူမှု ရှိခဲ့ရာ ယခင်နှစ်ကာလတူထက် ၂၁ ဆ မြင့်တက်ခဲ့ကြောင်း၊ ထိုင်းနှင့် ပီရူးနိုင်ငံတို့မှ တင်ပို့မှု သိသာစွာကျဆင်းခဲ့သော်လည်း ဗီယက်နမ်နိုင်ငံအနေဖြင့် ယခင်နှစ်ထက် တန်ဖိုးအားဖြင့် ၁၄၇ ဆ မြင့်တက်ပြီး ဒေါ်လာ ၂၈ သန်း၊ တန်ချိန်အားဖြင့် ၄၀,၇၀၀ တန်ခန့် တင်ပို့နိုင်ခဲ့ကြောင်း၊ ဗီယက်နမ် နိုင်ငံ၏ သရက်သီးပို့ကုန် ပျမ်းမျှဈေးနှုန်းသည် ၇၂.၆ ရာခိုင်နှုန်းမြင့်တက်ခဲ့ပြီး တရုတ်နိုင်ငံရှိ စားသုံးသူများ အကြိုက်တွေ့လျက်ရှိကြောင်း သိရှိရပါသည်။

     ဗီယက်နမ်နိုင်ငံ၏ ဈေးကွက်လွှမ်းမိုးမှု ကြီးထွားလာရသည့် အဓိကအချက်မှာ ဈေးနှုန်း ယှဉ်ပြိုင်နိုင်စွမ်းရှိခြင်းပင်ဖြစ်ပြီး ကမ္ဘောဒီးယားမှ တင်ပို့သည့်ဈေးနှုန်းများနည်းတူ ဗီယက်နမ် သရက်သီးများကို ပျမ်းမျှအားဖြင့် တစ်တန်လျှင် ဒေါ်လာ ၇၀၀ ခန့်ဖြင့်တင်ပို့လျက်ရှိသဖြင့် ထိုင်း၊ ပီရူးနှင့် ဩစတြေးလျနိုင်ငံများမှတင်ပို့သည့် သရက်သီး တစ်တန်လျှင် ဒေါ်လာ ၆၀၀၀ နှင့် ၁၁၀၀၀ အကြား ဈေးနှုန်းနှင့် နှိုင်းယှဉ်ပါက သိသာစွာသက်သာမှုရှိသည်။ ထို့အပြင် ဗီယက်နမ်နိုင်ငံ၏ ပထဝီအနေအထားအရ တရုတ်နိုင်ငံသို့တင်ပို့ရာတွင် ကုန်ကျစရိတ် သက်သာခြင်း၊ ပို့ဆောင်မှု မြန်ဆန်ခြင်းနှင့် ဈေးကွက်သို့ရောက်ရှိချိန်၌ အသီး၏အရည်အသွေးကို ပိုမိုကောင်းမွန်စွာ ထိန်း သိမ်းနိုင်ခြင်း စသည့် အားသာချက်များရှိနေပါသည်။

    ဈေးနှုန်းအကျိုးအမြတ်အပြင် ဗီယက်နမ်သရက်သီး၏ သဘာဝအနံ့အရသာနှင့် အသား ပါဝင်မှုအပေါ် တရုတ်စားသုံးသူများ ကြိုက်နှစ်သက်လျက်ရှိကြောင်း၊ အထူးသဖြင့် Hoa Loc နှင့် Cat Chu သရက်မျိုးတို့ကို လူကြိုက်များလျက်ရှိပြီး၊ လတ်ဆတ်သစ်သီးအပြင် ပြုပြင်စီမံထားသည့် ထုတ်ကုန် အနေဖြင့်ပါ လူကြိုက်များလျက်ရှိကြောင်း သိရှိရပါသည်။

    ဝယ်လိုအားကြီးမားသည့် တရုတ်၊ တောင်ကိုရီးယား၊ ဂျပန်နှင့် အမေရိကန်ပြည်ထောင်စုတို့ မှ သတ်မှတ်ထားသည့် အစားအစာဘေးအန္တရာယ် ကင်းရှင်းမှုနှင့် နောက်ကြောင်းပြန်ခြေရာခံမှု စသည့် ဈေးကွက်ဝင်ရောက်ခွင့် အချက်အလက်များနှင့် ကိုက်ညီရန်အတွက် လက်ရှိကာလတွင် မဲခေါင်မြစ်ဝကျွန်းပေါ် ဒေသအတွင်း သရက်စိုက်ခင်း ၂၀၀၀ ဟက်တာခန့်ကို  VietGAP နှင့် GlobalGAP အသိအမှတ်ပြု လက်မှတ်ရရှိအောင်ဆောင်ရွက်လျက်ရှိသည်။

    သို့ရာတွင် အဆိုပါအခွင့်အလမ်းများနှင့်အတူ စိန်ခေါ်မှုများလည်း ရှိနေပြီး မေလမှစတင်၍ တရုတ်နိုင်ငံတွင် ပြည်တွင်းသရက်သီးများစတင်ထွက်ရှိမည်ဖြစ်ရာ တင်သွင်းမှုသိသာစွာ ကျဆင်း လာနိုင်ပြီး၊ ဗီယက်နမ်ပြည်တွင်း သရက်သီးဈေးနှုန်းများကို ကျဆင်းစေဖွယ်ရှိသည်။ ၎င်းအခြေ အနေမျိုးတွင် သရက်သီး တစ်ကီလိုဂရမ်လျှင် ဗီယက်နမ်ဒေါင်ငွေ ထောင်ဂဏန်းအဆင့်အထိ ကျဆင်းနိုင်ပြီး ဒေသခံတောင်သူများနှင့် တင်ပို့သူများအား သိသာစွာထိခိုက်စေသဖြင့် တစ်ခု တည်းသော ဈေးကွက်အပေါ်တွင် မှီခိုနေခြင်းသည် ဘေးအန္တရာယ်ရှိကြောင်း ဖော်ပြလျက်ရှိသည်။

     သရက်သီးကဏ္ဍ ရေရှည်တိုးတက်စေရေး ထိန်းသိမ်းနိုင်ရန်အတွက် ကွဲပြားခြားနားသော တင်ပို့မည့်နေရာဒေသများကို ရှာဖွေဖော်ထုတ်ခြင်း၊ ဝယ်လိုအားကြီးမားသည့် ဈေးကွက်များသို့ ချဲ့ထွင်ခြင်း၊ ရိတ်သိမ်းချိန်လွန်ထိန်းသိမ်းမှု နည်းပညာများနှင့် ပြုပြင်စီမံထားသည့် ထုတ်ကုန် လုပ်ငန်းများတွင် ရင်းနှီးမြှုပ်နှံခြင်း စသည်တို့ကို ဆောင်ရွက်ရန်လိုအပ်ကြောင်း၊ VietGAP ၊ GlobalGAP နှင့် အခြားနိုင်ငံတကာအသိ အမှတ်ပြုလက်မှတ်များ ရရှိအောင်ဆောင်ရွက်ခြင်းသည် ဗီယက်နမ်စိုက်ပျိုးရေးထွက်ကုန်များကို နိုင်ငံတကာတွင် ယှဉ်ပြိုင်နိုင်စွမ်း ပိုမိုမြင့်မားလာမည်ဖြစ်ကြောင်းဖြင့် Vietnam Plus သတင်းဌာနက ဖော်ပြထားပါသည်။

Source : Vietnam Plus, May 25, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)