ကမ္ဘာ့ဟင်းသီးဟင်းရွက်ဆီ အများဆုံးတင်သွင်းသည့် အိန္ဒိယနိုင်ငံသည် အစားအသောက် ဈေးနှုန်းများ ကျဆင်းစေရန်နှင့် ပြည်တွင်း ဆီသန့်စင်မှုလုပ်ငန်းများကို ကူညီပံပိုးနိုင်ရန်အတွက် စားသုံးဆီကြမ်းများ တင်သွင်းမှုအပေါ်တွင် ကောက်ခံလျက်ရှိသည့် အခြေခံအကောက်ခွန်ကို ထက်ဝက်လျှော့ချလျက် ၁၀ ရာခိုင်နှုန်းသို့ ပြောင်းလဲသတ်မှတ်လိုက်ကြောင်း အိန္ဒိယ အစိုးရက မေလ ၃၁ ရက်နေ့တွင် ပြောဆိုထားသည်။
ယခုလျှော့ချကောက်ခံမည့် အခွန်နှုန်းထား၌ စားအုန်းဆီကြမ်း၊ ပဲပုပ်ဆီကြမ်းနှင့် နေကြာ ဆီကြမ်းတို့ အကျုံးဝင်မှုရှိသည်။ အိန္ဒိယ၏ စားသုံးဆီအပေါ် အခွန်စည်းကြပ်မှုတွင် အကောက်ခွန် အပြင် စိုက်ပျိုးရေး အခြေခံအဆောက်အအုံနှင့် ဖွံ့ဖြိုးတိုးတက်ရေးဆိုင်ရာ အခကြေးငွေနှင့် လူမှု ဖူလုံရေး အခကြေးငွေတို့ ပါ၀င်သောကြောင့် ယင်းစားသုံးဆီ ၃ မျိုး အပေါ် ကျသင့်သည့် စုစုပေါင်း သွင်းကုန်အခွန်သည် ယခင်က ၂၇.၅ ရာခိုင်နှုန်းရှိရာမှ ယခု ၁၆.၅ ရာခိုင်နှုန်းသို့ ထိရောက်စွာ လျှော့ချနိုင်မည်ဖြစ်သည်။
အကောက်ခွန်နှုန်းထား လျှော့ချမှုကြောင့် ပြည်တွင်းဈေးနှုန်း ကျဆင်းသွားမည်ဖြစ်ရာ ဟင်းသီးဟင်းရွက်ဆီ သန့်စင်သည့် လုပ်ငန်းများနှင့် စားသုံးသူများ နှစ်ဦးနှစ်ဖက်အတွက် ကောင်းမွန်မှုရှိသည့် အခြေအနေဖြစ်သည်ဟု အိန္ဒိယဆီကြိတ်ခွဲထုတ်လုပ်သူများအသင်း (Solvent Extractors' Association) မှ အမှုဆောင်ဒါရိုက်တာ Mr. BV Mehta က ပြောကြားခဲ့သည်။
အိန္ဒိယအစိုးရအနေဖြင့် သန့်စင်ပြီး စားအုန်းဆီ၊ သန့်စင်ပြီး ပဲပုပ်ဆီ သို့မဟုတ် သန့်စင်ပြီး နေကြာဆီ တင်သွင်းမှုတို့အပေါ် ကောက်ခံသည့် အခွန်ကို ပြောင်းလဲမှုမရှိပဲ ၃၅.၇၅ ရာခိုင်နှုန်း အတိုင်းထားရှိသည်။ သန့်စင်ပြီးစားသုံးဆီနှင့် ဆီကြမ်းများအကြား ကောက်ခံသည့်သွင်းကုန်အခွန် ကွာဟချက်သည် ၁၉.၂၅ ရာခိုင်နှုန်းအထိ မြင့်တက်လာသည့်အတွက် တင်သွင်းသူများအနေဖြင့် သန့်စင်ပြီး ဆီချောများအစား စားသုံးဆီကြမ်းများကို တင်သွင်းလာစေပြီး ပြည်တွင်း ဆီသန့်စင်မှု လုပ်ငန်းကို မြှင့်တင်ရန် တွန်းအားပေးမည်ဖြစ်ကြောင်း Mr. BV Mehta က ထပ်မံပြောကြား ခဲ့သည်။
အိန္ဒိယသည် ပြည်တွင်းဟင်းသီးဟင်းရွက်ဆီ လိုအပ်ချက်၏ ၇၀ ရာခိုင်နှုန်းကျော်ကို ပြည်ပ မှ တင်သွင်းခြင်းအားဖြင့် ဖြည့်ဆည်းပေးလျက်ရှိကြောင်း၊ စားအုန်းဆီကို အင်ဒိုနီးရှား၊ မလေးရှား နှင့် ထိုင်းနိုင်ငံတို့မှ အဓိကဝယ်ယူတင်သွင်းကြပြီး ပဲပုပ်ဆီနှင့် နေကြာဆီ တို့ကို အာဂျင်တီးနား၊ ဘရာဇီး၊ ရုရှားနှင့် ယူကရိန်းတို့မှ ဝယ်ယူတင်သွင်းကြောင်း သိရှိရသည်။
အိန္ဒိယ ဟင်းသီးဟင်းရွက်ဆီလုပ်ငန်းဆိုင်ရာ အကျိုးဆောင်ကုမ္ပဏီတစ်ခုဖြစ်သည့် Sunvin Group မှ အမှုဆောင်အရာရှိချုပ် Mr. Sandeep Bajoria က စားသုံးဆီကြမ်းများပေါ်တွင် ကောက်ခံလျက်ရှိသည့် အခြေခံသွင်းကုန်အခွန်လျှော့ချသတ်မှတ်ခြင်းသည် ပြည်တွင်း စားသုံးဆီ စျေးနှုန်းများ ကျဆင်းစေပြီး မကြာသေးမီလများအတွင်း ကျဆင်းခဲ့သည့် လက်လီဝယ်လိုအားကို ပြန်လည်ရှင်သန်လာစေမည်ဟု ပြောကြားခဲ့ကြောင်း The Edge Malaysia သတင်းဌာန၏ ဖော်ပြချက်ကို တင်ပြအပ်ပါသည်။
Source: The Edge Malaysia, 31 May 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)