ရခိုင်ပြည်နယ် ကျောက်ဖြူခရိုင်ဦးစီးမှူး ဦးအေးကျော်၊ လက်ထောက်ညွှန်ကြားရေးမှူးနှင့် ဝန်ထမ်းများသည် ၂၅-၇-၂၀၂၂ရက်နေ့ နေ့လယ် (၃:၀၀)နာရီအချိန်တွင် ကျောက်ဖြူမြို့တွင်းရှိ “7 TOP” ငါးမုန့်ပါပရာလုပ်ငန်းရှင်နှင့် “Snow White” ကိတ်မုန့်/ပေါင်မုန့် လုပ်ငန်းရှင်တို့အား တွေ့ဆုံ၍ ကုန်ပစ္စည်းများထုတ်လုပ်ရာတွင် ဖော်ပြရမည့်ကုန်အညွှန်းအမှတ်အသားများနှင့်စပ်လျဉ်း၍ တွေ့ဆုံဆွေးနွေးခြင်းခဲ့ပါသည်။
ရှေးဦးစွာ ကျောက်ဖြူခရိုင်ဦးစီးမှူးက စားသုံးသူကာကွယ်ရေးဥပဒေ(၂၀၁၉) အရ စီးပွားရေးလုပ်ငန်းရှင်များ၏ တာဝန်များကိုလည်းကောင်း၊ မိမိတို့ ထုတ်လုပ်သည့်ကုန်ပစ္စည်းနှင့်ပတ်သက်၍ သတင်းအချက်အလက်များအား စားသုံးသူများမှ သိရှိနိုင်ရန်အတွက် ပြည့်စုံစွာဖော်ပြရန်လိုအပ်ကြောင်း၊ သို့ဖြစ်ပါ၍ ကုန်ပစ္စည်းများထုတ်လုပ်ရာတွင် ကုန်အညွှန်းအမှတ်အသားများကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာ တစ်ခု(သို့မဟုတ်)တစ်ခုထက်ပို၍ တွဲလျက်ဖြစ်စေ ကုန်စည် အမျိုးအစားအလိုက် ဖော်ပြရန်နှင့် စားသုံးသူများကို ဘေးအန္တရာယ်ဖြစ်စေနိုင်သည့် ဓါတုဆိုးဆေးများ၊ တာရှည်ခံဆေးများ မသုံးစွဲကြရန်နှင့် ကုန်အမှတ်တံဆိပ်မူပိုင်ခွင့်ဆိုင်ရာ ပြဌါန်းထားသော ကုန်အမှတ်တံဆိပ် မူပိုင်ခွင့် ဥပဒေနှင့် မှတ်ပုံတင်ခြင်းဆိုင်ရာ လုပ်ထုံးလုပ်နည်းများ၊ လုပ်ငန်းစဉ်များအားလည်းကောင်း ဆွေးနွေးအသိပညာပေးဆွေးနွေးခဲ့ပါသည်။ ဆက်လက်၍ ၂၀၁၉ စားသုံးသူကာကွယ်ရေးဥပဒေပြဌါန်းချက်များအား သိရှိလိုက်နာဆောင်ရွက်မှုရှိစေရေး အသိပညာပေးလက်ကမ်းစာစောင်များဝေငှပေးခြင်း ဆောင်ရွက်ခဲ့ကြောင်း သတင်းရရှိပါသည်။
DOCA(ရခိုင်)