ဇူလိုင် ၂၇ ရက် နေ့လယ် (၁၃း၃၀) နာရီတွင် ပြည်ထောင်စုနယ်မြေ၊ နေပြည်တော်၊ ၂၀၂၂-၂၀၂၃ ခုနှစ်၊ မိုးနှောင်းချည်မျှင်ရှည်ဝါစိုက်ပျိုးထုတ်လုပ်မှုတိုးတက်မြင့်မားရေးနည်းပညာပေးသင်တန်းဖွင့်ပွဲနှင့် ဝါမျိုးစေ့ထောက်ပံ့ပေးအပ်ပွဲကို ဥတ္တရခရိုင်၊ ဇေယျာသီရိမြို့နယ်၊ ခေတ်အေးကျေးရွာအုပ်ချုပ်ရေးမှူးရုံး၌ ကျင်းပခဲ့ပါသည်။
သင်တန်းဖွင့်ပွဲအခမ်းအနားတွင် ပြည်ထောင်စုနယ်မြေ၊ နေပြည်တော်ကောင်စီအဖွဲ့ဝင် ဦးဇေယျာလင်းက အဖွင့်အမှာစကားပြောကြားရာ ပြည်ထောင်စုနယ်မြေအတွင်းတွင် ဝါသီးနှံ စိုက်ပျိုးနိုင်သည့် မြို့နယ်များအနေဖြင့် ရေမြေသဘာဝနှင့်ကိုက်ညီသည့် ဝါမျိုးများစိုက်ပျိုးနိုင်ရန် အတွက် စိုက်ပျိုးရေးဦးစီးဌာမှ ပညာရှင်များက လမ်းညွှန်ပြသဆွေးနွေးသွားသည်များကို လေ့လာ မှတ်သား ဆောင်ရွက်သင့်ပါကြောင်း၊ ယခုသင်တန်းသည် ဝါစိုက်တောင်သူများ၏ ဘဝတစ်သက်တာ အတွက် နည်းလမ်းကောင်းများပေးသော သင်တန်းဖြစ်ပါကြောင်း၊ ကျေးလက်နေပြည်သူများဘဝ တိုးတက်မြင့်မားနိုင်ရေးအတွက် နိုင်ငံတော်အနေဖြင့် စိုက်ပျိုးမွေးမြူရေးကဏ္ဍများကို ဖွံ့ဖြိုး တိုးတက်အောင် အဓိကထား ဆောင်ရွက်နေပါကြောင်း၊ သင်တန်းသားများအနေဖြင့် ယခုသင်တန်းမှ ပို့ချပေးသည့် နည်းစနစ်များရော မိမိလက်တွေ့စိုက်ပျိုးနေသည့် နည်းစနစ်များကိုပါ ပေါင်းစပ် ဆောင်ရွက်လျှင် ဝါသီးနှံများ ပိုမိုထွက်ရှိ လာနိုင်ပါကြောင်း၊ စိုက်ပျိုးထွက်ရှိသည့် ဝါများကို တန်ဖိုးမြှင့်ထုတ်ကုန်များအဖြစ် ထုတ်လုပ်နိုင်ရေး ဆောင်ရွက်သွားရန် လိုအပ်ပါကြောင်း၊ သို့မှသာ ဝါစိုက်တောင်သူများဘဝတိုးတက်မြင့်မားလာမည် ဖြစ်ပြီး နောင်လာမည့် မျိုးဆက်သစ်လေးများဘဝ ပိုမိုမြင့်မားနိုင်မည် ဖြစ်ပါကြောင်း ပြောကြား ခဲ့ပါသည်။
သင်တန်းဖွင့်ပွဲအခမ်းအနားသို့ နေပြည်တော်ကောင်စီဝင်အဖွဲ့ဝင်၊ အထွေထွေအုပ်ချုပ်ရေး ဦးစီးဌာန၊ စိုက်ပျိုးရေးဦးစီးဌာန၊ စားသုံးသူရေးရာဦးစီးဌာန၊ ကျန်းမာရေးဦးစီးဌာန၊ ပညာရေးဦးစီး ဌာနမှ တာဝန်ရှိသူများနှင့် သင်တန်းသား(၃၃)ဦး တက်ရောက်ခဲ့ပါသည်။
အဆိုပါ သင်တန်းတွင် စိုက်ပျိုးရေးဦးစီးဌာနက ဝါမျိုးကောင်းမျိုးသန့်များ စိုက်ပျိုးထုတ်လုပ်နိုင်ရေး နည်းစနစ်ကောင်းများဆွေးနွေးခြင်း၊ စားသုံးသူရေးရာဦးစီးဌာနက ဝါသီးနှံနှင့် ဝါဂွမ်းကို အရေးကြီးကုန်စည်အဖြစ် နိုင်ငံတော်မှထုတ်ပြန်ထားခြင်းများအား တောင်သူများထံသို့ အသိပေး ဆွေးနွေးခဲ့ကြကြောင်း သိရပါသည်။
DOCA(ပြည်ထောင်စုနယ်မြေ)