စစ်ကိုင်းတိုင်းဒေသကြီး၊ ကလေးခရိုင်၊ ကလေးမြို့၊ ချမ်းမြေ့အောင်စည်ရပ်ကွက်ရှိ စားအုန်းဆီရောင်းချသည့် လုပ်ငန်းရှင် အိအိခိုင်ဆီဆိုင်သို့ ( ၉.၈.၂၀၂၂ ) ရက်နေ့၊ နံနက် ( ၁၀:၃၀ ) နာရီအချိန်တွင် ခရိုင်ဦးစီးမှူး ဒေါ်သန်းသန်းဝင်းမှ ဦးဆောင်၍ ဝန်ထမ်း ( ၃ ) ဦး သွားရောက် တွေ့ဆုံဆွေးနွေးခဲ့ပါသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီကို ဖွဲ့စည်းကာပြည်ပမှ တင်သွင်းလာသည့် စားသုံးဆီများ သတ်မှတ်အရည်အသွေး စံချိန်စံညွှန်းများနှင့် ပြည့်မီစေရေး၊ စားသုံးသူပြည်သူများ ကျန်းမာရေးနှင့် ညီညွတ်သော စားသုံးဆီများကို သုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်စေရေးတို့အတွက် ကြီးကြပ်ထိန်းကျောင်း ဆောင်ရွက်လျက်ရှိပါသည်။
စားအုန်းဆီရောင်းချသည့် လုပ်ငန်းရှင်“အိအိခိုင်”ဆီဆိုင်အနေဖြင့် မိမိတို့ခွဲတမ်းရရှိသည့် ဆီများ ရောက်ရှိပြီးဖြစ်ပါကြောင်းနှင့် ဆီများကို ဈေးနှုန်းမြှင့်တင်ရောင်းချမှုမရှိဘဲ အခြေခံသတ်မှတ် ဈေးနှုန်းများဖြင့်သာ ရောင်းချလျက်ရှိပါကြောင်းနှင့် စားသုံးသူပြည်သူများအနေဖြင့်လည်း အလွယ် တကူ ဝယ်ယူစားသောက် နိုင်ရန်အတွက် မိမိအနေဖြင့်လည်း လက်လီ/ လက္ကား ဖြန့်ဖြူးရောင်းချ ပေးလျက်ရှိပါကြောင်း ဖြေကြားခဲ့ပါသည်။
စားသုံးဆီရောင်းချသည့်လုပ်ငန်းရှင်များအနေဖြင့် ပြန်လည်ဖြန့်ဖြူးရောင်းချရာတွင် ဒေသအရောက် အခြေခံလက်ကား ဈေးနှုန်းများအပေါ် ( ၂ ) ရာခိုင်နှုန်း အမြတ်ထက် မပိုစေသော ဈေးနှုန်းဖြင့်ဖြန့်ဖြူးရောင်းချရန်နှင့် စားအုန်းဆီများအား ဈေးနှုန်းမြှင့်တင်ရောင်းချခြင်းများ မပြုလုပ်ကြရန် ခရိုင်ဦးစီးမှူးမှ အသိပေးဆွေးနွေးခဲ့ကြောင်း သတင်းရရှိပါသည်။
DOCA(စစ်ကိုင်း)