စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။
ယခုအခါ ကန့်ဘလူမြို့ပေါ်၊ နတ်ပေးကျေးရွာနှင့် အခြားသောကျေးရွာများတွင် ခရမ်းကြွပ် သီးနှင့်သခွားသီးများကို စိုက်ပျိုးကြကြောင်း၊ ခရမ်းကြွပ်သီးနှင့် သခွားသီးများကို ကန့်ဘလူမြို့မ ဈေးတွင်ရောင်းချကြောင်း၊ ၂၀၂၅ ခုနှစ်၊ ဇူလိုင်လ တတိယပတ်အတွင်း ခရမ်းကြွပ်သီး(၁)ပိဿာ လျှင်(၃၈၀၀)ကျပ်၊ ခရမ်းကြွပ်သီး(၂၅)ကျပ်သားလျှင်(၁၀၀၀)ကျပ်နှင့် သခွားသီး အကြီး(၁)လုံးလျှင် (၈၀၀)ကျပ်၊ သခွားသီးအလတ်(၁)လုံးလျှင် (၅၀၀)ကျပ်၊ သခွားသီးအသေး(၁)လုံးလျှင် (၃၀၀)ကျပ် ဖြင့်ရောင်းချကြောင်း၊ ခရမ်းကြွပ်သီးနှင့် သခွားသီးကို ငပိရည်နဲ့တွဲဖက်၍ အတို့အမြှုပ်အဖြစ်စားသုံး ကြကြောင်း၊ ထမင်းဆိုင်များမှ နေ့စဉ်ဝယ်ယူကြသဖြင့် အရောင်းအဝယ်သွက်လျက်ရှိပါကြောင်းနှင့် မန်ကျည်းပင်များကို အခြားသီးပင်များကဲ့သို့ ခြံဖွဲ့၍စိုက်ပျိုးခြင်းမရှိသော်လည်း ကန့်ဘလူမြို့နယ် နေရာအနှံ့အပြားတွင် အများအပြား လေ့ကျပေါက်ရောက်ပြီး မန်ကျည်းပင်သည် အေးမြသော အရိပ်ကိုပေးသည့်အပြင် အရွက်၊ အသီး၊ အခေါက် တစ်ပင်လုံးနီးပါး လူတို့အတွက်အသုံးဝင်ခြင်း၊ လယ်တော၊ ယာတောများနှင့် မိမိတို့အိမ်တွင် စားသုံး၍ပိုလျှံသည့် မန်ကျည်းသီး စိမ်းများကို ကန့်ဘလူမြို့မဈေးတွင်လာရောက် ရောင်းချကြောင်း သိရသည်။
၂၀၂၅ ခုနှစ်၊ ဇူလိုင်လ တတိယပတ်အတွင်း မန်ကျည်းသီးစိမ်း တစ်ပြည်လျှင် (၆၀၀၀)ကျပ်၊ မန်ကျည်းသီးစိမ်း(၁)ဘူးလျှင် (၈၀၀)ကျပ်နှင့် မန်ကျည်းသီးစိမ်း (၁)ပုံလျှင် (၅၀၀) ကျပ်ဖြင့် ရောင်းချ ကြောင်း၊ ရာသီစာတစ်ခုဖြစ်သည့် မန်ကျည်းသီးစိမ်းအား အိမ်ရှင်မများ ဟင်းချက်ရာတွင်လည်း ကောင်း၊ ထမင်းဆိုင်များတွင်လည်း အသုံးပြုကြသဖြင့်အရောင်းအဝယ်သွက်လျက်ရှိကြောင်း မြို့မ ဈေးရှိကုန်စိမ်းရောင်းချသူတစ်ဦးထံမှ သိရှိရပါသည်။
DOCA(စစ်ကိုင်း)