စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်၊ ဒု-ခရိုင်ဦးစီးမှူး ဒေါ်မွန်မွန်စိုး၊ ပခုက္ကူမြို့နယ် တာဝန်ခံ ဦးဇော်မင်းဦးနှင့် ဝန်ထမ်းများသည်(၁၀.၈.၂၀၂၂)ရက်နေ့၊ နံနက်(၁၁:၃၀)အချိန်တွင် ပခုက္ကူ မြို့ပေါ်ရှိ ပဲကြော်လုပ်ငန်းများသို့ စားအုန်းဆီသုံးစွဲမှု ပမာဏများနှင့် ပဲကြော်လုပ်ငန်း ဆောင်ရွက်ပုံ အဆင့်ဆင့်အား ကွင်းဆင်းမေးမြန်းခဲ့ပါသည်။
"ဓူဝံ"ပဲကြော်လုပ်ငန်းရှင် ဦးကြွယ်ဌေးအား ပဲကြော်လုပ်ငန်းဆောင်ရွက်ပုံအဆင့်ဆင့်ကို မေးမြန်းရာ မိမိအနေဖြင့် အကြော်စက်ကြီး(၃)လုံးဖြင့် လုပ်ငန်းဆောင်ရွက်နေပါကြောင်း၊ ပဲကြီး၊ ထောပတ်ပဲနှင့် ကုလားပဲကို ကြော်ပါကြောင်း၊ ပဲကြီးကို ကြော်ရန် ပထမအနေဖြင့် ပဲကို လက်ဖြင့် အခွံချွတ်ရပြီး အချိန်(၈)နာရီကြာအောင်စိမ်ထားရပါကြောင်း၊ (ထောပတ်ပဲကို စက်ဖြင့် အခွံချွတ် ပါကြောင်း)ရေစိမ်ထားသည့် ပဲကိုရေထဲမှဆယ်ယူ၍ ရေစစ်ပြီး ကော်မှုန့်(ပီလောပီနံမှုန့်)ဖြင့် မွှေစက်ထဲသို့ထည့်၍ မွှေပါကြောင်း၊ နယ်ပြီးသားပဲများကို ကြော်စက်ထဲသို့ထည့်၍ (၁၅)မိနစ်ခန့် ကြော်ရပါကြောင်း၊ ကြော်ပြီးလျှင် ဆီစစ်သည့်စက်ထဲသို့ ထည့်၍စစ်ရပါကြောင်း၊ ဆီစစ်ပြီးလျှင် ပိဿာချိန်(၃၀)ခန့်ဆံ့သည့် အိတ်ထဲသို့ထည့် ပါကြောင်း၊"ဓူဝံ" ပဲကြော်အမှတ်တံဆိပ်ဖြင့် ရောင်းသည်မှာ နည်းပါကြောင်း၊ တစ်နေ့လျှင် ပဲကြော်ပိဿာချိန် (၁၈၀၀)ခန့်ကြော်ရပြီး ယခုအချိန် တွင် စားအုန်း ဆီဈေး တစ်ပိဿာ(၈၇၀၀)ကျပ်ဖြင့် ကြော်ရသည့်အတွက် ပဲကြော်တစ်ပိဿာလျှင် (၆၇၀၀)ကျပ်ဖြင့် ရောင်းချပါကြောင်း၊ ရန်ကုန်၊ မန္တလေး၊ မုံရွာမြို့များမှ အော်ဒါအမှာကို အဓိကထား တင်ပို့ရပါကြောင်း၊ စားအုန်းဆီကိုရည်ညွှန်းဈေးဖြင့် ရမည်ဆိုပါကစားသုံးသူများ အပေါ်ဈေးနှုန်း ချိုသာစွာရောင်းချ ပေးနိုင်မည်ဖြစ်ပြီး လုပ်သားများအနေဖြင့်အလုပ်အကိုင် အခွင့်အလမ်းများ ရှိနိုင်ပါကြောင်း၊ ဆီဈေးနှုန်းကြီးမြင့်သောကြောင့် လုပ်ငန်းဆိုင်းငံ့ရမည်ဆိုလျှင် အလုပ်သမားများအနေဖြင့် အဆင်မပြေ မှုများဖြစ် ပေါ်လာနိုင်ကြောင်း၊ မိမိလုပ်ငန်းတွင် အမျိုးသား(၁၅)ဦး၊ အမျိုးသမီး(၅)ဦး စုစုပေါင်း(၂၀)ဦး ရှိပါကြောင်း၊ လုပ်အားခအနေဖြင့် အမျိုးသား(၁၀၀၀၀)ကျပ်၊ အမျိုးသမီး(၄၀၀၀)ကျပ်ပေးပါကြောင်း၊ ယခုအချိန်ထိလုပ်ငန်း လည်ပတ်နေပါကြောင်း၊ စားအုန်းဆီ ဈေးအား ဆက်လက်မြင့်တက်နေပါက လုပ်ငန်းလည်ပတ်ရန် ခက်ခဲမည်ဖြစ်ပါကြောင်း လုပ်ငန်းရှင်၏ ပြောကြားချက်အရသိရှိရပါသည်။
DOCA(မကွေး)