စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ မုံရွာခရိုင် ဦးစီးမှူးရုံးမှ ခရိုင်ဦးစီးမှူး၊ ဒု- ခရိုင်ဦးစီးမှူးနှင့်ဝန်ထမ်း (၂)ဦး တို့သည် (၁၇.၈.၂၀၂၂) ရက်နေ့ နေ့လယ် (၁၄:၀၀)နာရီအချိန်တွင်မုံရွာမြို့၊ပွဲစားတန်းလမ်း၊ ဘုရားကြီးရပ်ကွက်ရှိ “ခင်ဌေးဌေးချွန်” ပလတ်စတစ်ပုံး လက်ကားရောင်းဝယ်ရေးသို့ သွားရောက်တွေ့ဆုံခဲ့ပါသည်။
ထိုသို့ တွေ့ဆုံခဲ့ရာတွင် “ခင်ဌေးဌေးချွန်” ပလတ်စတစ်ပုံး လက်ကားရောင်းဝယ်ရေး လုပ်ငန်းရှင် ဒေါ်ခင်ဌေးဌေးချွန်မှ ပလတ်စတစ်ပုံးများ ရောင်းဝယ်ခြင်းလုပ်ငန်း လုပ်ကိုင်ခဲ့သည် မှာ နှစ်ပေါင်း(၃၅)နှစ်ကျော် ရှိပြီဖြစ်ကြောင်း၊ ပုံးများကို မန္တလေးမြို့မှ အဓိကမှာယူတင်သွင်းပြီး သောက်သုံးရေ၊ စားသုံးဆီ ၊ စက်သုံးဆီများ ထည့်ရန်အတွက် ပြန်လည်ဝယ်ယူ ရောင်းချကြ ကြောင်း၊ မုံရွာ၊ ဘုတလင်၊ အရာတော်၊ ချောင်းဦး မြို့များအပြင် ယင်းမာပင်မြို့၊ ပုလဲမြို့၊ ကလေး မြို့၊ ကလေးဝမြို့၊ မော်လိုက်မြို့၊ ဟုမ္မလင်းမြို့များသို့ တင်ပို့ပေးရကြောင်း၊ ပုံးအရွယ်အစားအလိုက် ဈေးနှုန်းများလည်း မတူညီကြောင်း၊ ပုံးအဝါများကိုသောက်သုံးရေနှင့် စားသုံးဆီထည့်ရန်အတွက် ဝယ်ယူကြပြီး (၁၀)ပိဿာဝင်ပုံး တစ်ပုံးလျှင် (၃၃၀၀)ကျပ်ဖြစ်ပြီး (၁၀)ပုံးဈေး (၃၂၀၀၀) ကျပ်၊ (၅)ပိဿာဝင်ပုံး တစ်ပုံးလျှင် (၁၇၀၀) ကျပ်ဖြစ်ပြီး (၁၀)ပုံးဈေး (၁၆၀၀၀)ကျပ်၊ (၃) ပိဿာဝင် ပုံးအဖြူတစ်ပုံးလျှင် (၁၃၀၀)ကျပ်ဖြစ်ပြီး (၁၀)ပုံးဈေး (၁၂၀၀၀)ကျပ်၊ (၂) ပိဿာဝင် တစ်ပုံးလျှင် (၁၀၀၀)ကျပ်ဖြစ်ပြီး (၁၀)ပုံးဈေး(၉၅၀၀)ကျပ်၊ (၁) ပိဿာဝင် တစ်ပုံးလျှင် (၆၀၀) ကျပ် ဖြစ်ပြီး (၁၀)ပုံးဈေး(၅၅၀၀)ကျပ် အသီးသီးရှိကြောင်း၊ ပုံးအပြာများကို စက်သုံးဆီထည့်ရန် ဝယ်ယူကြပြီး (၆)ဂါလံဆံ့ပုံး (၁)ပုံးလျှင် (၄၀၀၀)ကျပ်ဖြစ်ပြီး (၁၀)ပုံးဈေးမှာ (၃၅၀၀၀)ကျပ် ဖြစ်ကြောင်းသိရှိ ရပါသည်။
ယခုအခါတွင် စားသုံးဆီ၊ သိုလှောင်ရန်အတွက် ပုံးများကိုပိုမိုဝယ်ယူကြကြောင်း၊ တစ်နေ့ လျှင် ပုံးအမျိုးအစားအပေါ်မူတည်၍ ပျမ်းမျှအလုံးရေ (၅၀၀)ခန့် အရောင်း အဝယ်ဖြစ်ကြောင်း သိရှိရပြီး ဌာနမှတာဝန်ရှိသူများကလည်း စားသုံးသူများရရှိသည့် အခွင့်အရေးများ၊ စီးပွားရေးလုပ်ငန်းရှင်များဘက်မှ လိုက်နာရမည့်တာဝန်များကို ဆွေးနွေးပြောကြားခဲ့ပြီး လက်ကမ်းစာစောင်များ ဖြန့်ဝေပေးခဲ့ပါသည်။
DOCA(စစ်ကိုင်း)