ဝါသီးနှံအား မြန်မာနိုင်ငံတွင် မိုးကြိုရာသီ ၊ မိုးရာသီ နှင့် မိုးနှောင်းရာသီများတွင် စိုက်ပျိုး လျက်ရှိရာ မန္တလေးတိုင်းဒေသကြီး ၊ မြစ်သားမြို့နယ်တွင် မိုးကြိုဝါများ စတင်ထွက်ပေါ်လျက်ရှိပါ သည်။ယခင်နှစ်တွင် မိုးကြိုဝါအား(၁၀၁၀)ဧက စိုက်ပျိုးနိုင်ခဲ့သော်လည်း ယခုနှစ်တွင်(၂၁၂၅)ဧက စိုက်ပျိုးနိုင်ခဲ့ကြောင်း၊ ရိတ်ဧက(၂၈၅)ဧကရိတ်သိမ်းပြီးစီးကြောင်း၊တစ်ဧကအထွက်နှုန်းအနေဖြင့် (၄၉၉.၂၁)ပိဿာ၊ အထွက်ထွက်စုစုပေါင်း(၁၄၂၂၇၅) ပိဿာထွက်ရှိကြောင်း၊ သက်ဆိုင်ရာဌာန၏ စာရင်းများအရသိရှိရပါသည်။ မိုးကြိုဝါအား ဖေဖော်ဝါရီလ လယ်မှမတ်လအတွင်းစတင်စိုက်ပျိုးပြီး တောင်သူများမှာ Ra ca နှင့် B 31 မျိုးများကို စိုက်ပျိုးကြပါသည်။ ဝါစိုက်ပျိုးမှုအနေဖြင့် (၁)ဧကလျှင် ပျိုးထုတ်ဝယ်ယူ၍ စိုက်ပျိုးပါက မျိုးစေ့ထုတ် (၂)ထုတ်ကုန်ကြပြီး ယခင်ဝါသီးနှံပေါ်ချိန်၌ ကောက်ယူထားသော မျိုးစေ့အား အသုံးပြုပါက (၅)ပိဿာခန့် ကုန်ကျကြောင်း၊ မျိုးစေ့ (၁)ထုတ် လျှင် (၅၀၀၀၀/-)ကျပ်နှင့် မျိုးစေ့ (၁)ပိဿာလျှင် (၄၀၀၀/-)ကျပ် ကုန်ကျကြောင်း၊ မျိုးစေ့ ထုတ်ဖြင့် စိုက်ပျိုးပါက (၁) ဧကလျှင် (၁၀၀၀၀၀/-)ကျပ် ကုန်ကျပြီး ဝါကောက်ပြီး ရယူထားသော မျိုးစေ့ စိုက်ပျိုးပါက (၁)ဧကလျှင် (၂၀၀၀၀/-)ကျပ် ကုန်ကျပါသည်။ (၁)ဧက ကုန်ကျစရိတ် အနေဖြင့် မျိုးစေ့၊ သွင်းအားစု၊ နွားရှဉ်းခ၊ လုပ်သားခအပါအဝင် စုစုပေါင်း (၉၀၀၀၀၀-၁၀၀၀၀၀၀)ကျပ်အထိ ကုန်ကျကြောင်း၊ ဝါထွက်ရှိမှု အနေဖြင့် ဝါဖြစ်ထွန်းမှုအပေါ်မူတည်ပြီး (၁)ဧကလျှင် (၅၀၀) ပိဿာ အထိ ထွက်ရှိပြီး ဝါစျေးနှုန်းအနေဖြင့် (၁)ပိဿာလျှင် (၃၂၀၀-၃၆၀၀)ကျပ် ရရှိ၍ ဝါအရည်အသွေး ကောင်းပါက (၃၈၀၀-၄၀၀၀/-)ကျပ်အထိ ရရှိခဲ့သဖြင့် အကျိုးအမြတ်အနေဖြင့်(၇၅၀၀၀၀/-) ကျပ် ခန့်မြတ်ကြောင်း၊ မိုးရွာသွန်းမှု အားကောင်းသောကြောင့် ဝါအရည်အသွေး နိမ့်သောကြောင့် ဈေး ကောင်းမရရှိဘဲ အကျိုးအမြတ်နည်းကြောင်း၊ ကုန်သွယ်မှုအနေဖြင့် နီးစပ်ရာ မြို့ပေါ်ပွဲရုံများသို့ တိုက်ရိုက်သွားရောက် ရောင်းချကြကြောင်း၊ ပွဲရုံများမှတစ်ဆင့် မန္တလေး၊ စက်မှု(၁)နှင့် ချည်မျှင် စက်ရုံများ၊ ယက်ကန်းရုံများသို့ ပြန်လည်ရောင်းချကြောင်း ဝါကုန်သည်များထံမှ သိရှိရပါသည်။
DOCA (မန္တလေး)