မန္တလေးတိုင်းဒေသကြီး၊ကျောက်ဆည်ခရိုင်တွင် ငရုပ်(မိုး)စိုက်ဧက စုစုပေါင်း(၁၆၁၈၁)ဧက စိုက်ပျိုးထားရှိပြီး (၁၂၆၇)ဧက ရိတ်သိမ်းထွက်ရှိလျှက်ရှိပါသည်။တစ်ဧကအထွက်နှုန်းမှာ(၅၅၀)တင်း ထွက်ရှိပြီး ဒေသအလိုက် ငရုပ်မျိုးများကွဲပြားကြပါသည်။အများဆုံးစိုက်ပျိုးသော ငရုပ်မျိုးများမှာ (၆၉၂)မျိုး၊(၉၂၉)မျိုးနှင့်ဒီမွန်မျိုးများ စိုက်ပျိုးကြပါသည်။ငရုပ်သီးအစို တစ်ပိဿာလျှင်(၃၅၀၀/-)ကျပ် ဖြင့်ရောင်းချလျှက်ရှိကြောင်း ၊ ပွဲရုံများမှ စိုက်ခင်းများအထိ လာရောက်ဝယ်ယူသူများရှိသလို အချို့တောင်သူများမှာ ပွဲရုံသို့ ကိုယ်တိုင်သွားရောက်ရောင်းချခြင်းများလည်းရှိပါသည်။ ငရုပ်ပွဲရုံ ပိုင်ရှင်တစ်ဦးအားကွင်းဆင်းမေးမြန်းခဲ့ရာ ငရုပ်အစို တစ်ပိဿာလျှင်(၃၅၀၀/-)ကျပ်ဖြင့်ဝယ်ယူပြီး ငရုပ်အစို အညှာချွေခ တစ်ပိဿာလျှင်(၁၅၀/-)ကျပ်ပေးရကြောင်း၊လူတစ်ဦး တစ်နေ့လျှင် ငရုပ် အချိန်(၁၅)ပိဿာမှ(၂၀)ပိဿာအထိ ပြီးစီးကြောင်း၊ အစိုအချိန်(၂၀)ပိဿာချွေလျှင် ငရုပ်သီးအသန့် (၁၆-၁၇)ပိဿာဝန်းကျင်ခန့်အသားတင်ရရှိကြောင်း၊ ပွဲရုံသို့လာရောက်ချွေသော အလုပ်သမားများ ရှိသလိုအိမ်သို့သယ်ယူ၍ချွေသောသူများလည်းရှိကြောင်း၊ အိမ်မှာနေ၍ အိမ်မှုကိစ္စများလုပ်ရင်းဖြင့် ငရုပ်အညှာချွေကြသောကြောင့်အပိုဝင်ငွေများရရှိပြီးအဆင်ပြေနေကြကြောင်း၊အညှာချွေငရုပ်စိုများ ကိုခြင်းများဖြင့်ထည့်ရကြောင်း၊တစ်ခြင်းလျှင် ငရုပ်အစို(၅)ပိဿာဝင်ဆံ့ကြောင်း၊ Box ကားများဖြင့် တင်ပို့လျှက်ရှိပြီး Box ကားတစ်စီးလျှင် ပိဿာ(၃၀၀၀)ဝင်ဆံ့ပြီး မူဆယ်မြို့သို့ တိုက်ရိုက်တင်ပို့ ရောင်းချလျှက်ရှိကြောင်း ၊ ငရုပ်အစိုစျေးကွက်မှာ စျေးကောင်းများရရှိလျှက်ရှိကြောင်း ကွင်းဆင်း မြေးမြန်းချက်အရသိရှိရပါသည်။
DOCA(မန္တလေး)