စစ်ကိုင်းတိုင်းဒေသကြီး၊ ရွှေဘိုခရိုင်၊ ရွှေဘိုမြို့နယ်အတွင်းရှိ စည်ပင်သာယာဈေး၊ အောင်ဇေယျဈေး၊ ကုန်းဘောင်ဈေးတို့တွင် ကချင်ပြည်နယ် မြစ်ကြီးနားမြို့၊ ရွှေကူမြို့၊ ဗန်းမော်မြို့ စသည့် မြို့များအပြင် မန္တလေးမြို့ရှိ သီးနှံ ပွဲရုံများမှ ဒညင်းသီးများ လှိုင်လှိုင်ဝင်ရောက်လာ၍ အရောင်းသွက်လျက်ရှိကြောင်း သိရသည်။
၂၀၂၅ခုနှစ် ဩဂုတ်လ တတိယပတ်တွင် ဒညင်းသီး အလုံးအရွယ်အစားပေါ် မူတည်၍ ဒညင်းသီး တစ်ပိဿာလျှင် (၆၀၀၀)ကျပ်မှ (၈၀၀၀)ကျပ်ထိ ပေါက်ဈေးရှိပြီး ဈေးအတွင်း လက်လီ ပျံကျဈေးသည်များကို ဖောက်သည်ပေးသည့် အပြင်၊ ဆိုင်ကယ်ဖြင့် မြို့တွင်း လှည့်လည် ရောင်းချသော ဈေးသည်များ၊ ရွှေဘိုမြို့ပေါ်ရှိ ထမင်းဆိုင်များအပြင် အသင့်စား စားသောက်ကုန်လုပ်ငန်းများမှ ဝယ်ယူကြပြီး နေ့စဉ် ဝင်ရောက်သမျှ အရောင်းအဝယ် ဖြစ်လျက်ရှိကြောင်း သီးနှံလက္ကားဒိုင်များမှ သတင်းရရှိသည်။
Doca(စစ်ကိုင်း)