အိန္ဒိယ၏ စားအုန်းဆီ တင်သွင်းမှုသည် ၂၀၂၅ ခုနှစ် သြဂုတ်လတွင် ၁၃ လအတွင်း အမြင့် ဆုံးသို့ ရောက်ရှိခဲ့ပြီး ပဲပုပ်ဆီနှင့်နှိုင်းယှဉ်ပါက ဈေးနှုန်းအရယှဉ်ပြိုင်နိုင်မှုရှိခြင်းကြောင့် ပွဲတော် ရာသီမတိုင်မီ ဝယ်ယူမှုပိုမို များပြားလာသည်ဟု စားသုံးဆီလုပ်ငန်းရှင် ၅ ဦး ထံမှသိရကြောင်း The Edge Malaysia သတင်းဌာနက စက်တင်ဘာလ ၂ ရက်နေ့တွင် ဖော်ပြထားပါသည်။
ကမ္ဘာ့ အများဆုံး ဟင်းသီးဟင်းရွက်ဆီဝယ်ယူသူနိုင်ငံဖြစ်သည့် အိန္ဒိယ၏ စားအုန်းဆီ တင်သွင်းမှု မြင့်မားခြင်းသည် ထိပ်တန်းထုတ်လုပ်သူ အင်ဒိုနီးရှားနှင့် မလေးရှားတို့၏ သိုလှောင်မှု လက်ကျန်လျှော့ချရန်နှင့် မလေးရှားစားအုန်းဆီ စံပြုကြိုပွိုင့်ဈေးနှုန်းကို အထောက်အပံ့ပြုရန် မျှော်လင့်ထားသည်။ စားအုန်းဆီတင်သွင်းမှုသည် ၂၀၂၅ ခုနှစ် ဩဂုတ်လတွင် ၁၆ ရာခိုင်နှုန်း မြင့်တက်ခဲ့ပြီး တန်ချိန် ၉၉၃,၀၀၀ ရှိခဲ့ကာ ၂၀၂၄ ခုနှစ် ဇူလိုင်လနောက်ပိုင်း အမြင့်ဆုံးအမှတ် ဖြစ်ကြောင်း ဆီကုန်သည်များက ခန့်မှန်းထားသည်။
သြဂုတ်လတွင် ပဲပုပ်ဆီတင်သွင်းမှုသည် တန်ချိန် ၃၅၅,၀၀၀ ရှိပြီး ယခင်လများထက် ၂၈ ရာခိုင်နှုန်းကျဆင်းခဲ့ပြီး ၆ လအတွင်း အနိမ့်ဆုံးဖြစ်သည်။ နေကြာဆီတင်သွင်းမှုအနေဖြင့် တန်ချိန် ၂၅၅,၀၀၀ ရှိပြီး ၇ လအတွင်း ၂၇ ရာခိုင်နှုန်းအထိ တင်သွင်းမှုမြင့်တက်ခဲ့ကြောင်း ကုန်သည်များ၏ ခန့်မှန်းချက်အရ သိရသည်။ အိန္ဒိယအနေဖြင့် သြဂုတ်လ၌ မုန်ညှင်းဆီတန်ချိန် ၆၀၀၀ ကို ၅ နှစ်အတွင်း ပထမဆုံး အကြိမ်တင်သွင်းခဲ့ကြောင်း ကုန်သည်များက ပြောကြားခဲ့သည်။
စားအုန်းဆီနှင့် ပဲပုပ်ဆီ တင်သွင်းမှု မြင့်မားခြင်းကြောင့် အိန္ဒိယ၏ စုစုပေါင်း စားသုံးဆီ တင်သွင်းမှုသည် သြဂုတ်လတွင် တန်ချိန် ၁ ဒသမ ၆ သန်း ရာခိုင်နှုန်းအားဖြင့် ၃ ဒသမ ၆ ရာခိုင်နှုန်း မြင့်တက်ခဲ့ပြီး ၁၃ လအတွင်း အမြင့်ဆုံးအဆင့်ဖြစ်ကြောင်း ကုန်သည်များက ခန့်မှန်းထားသည်။ အိန္ဒိယ၏ သွင်းကုန်ကိန်းဂဏန်းအချက်အလက်များသည် နီပေါနိုင်ငံ ကုန်းကြောင်းနယ်စပ်များမှ တစ်ဆင့် တင်သွင်းရောက်ရှိလာသော အခွန်ကင်းလွတ်ခွင့်ရတင်သွင်းမှုများ ပါဝင်ခြင်း မရှိဟု ကုန်သည်များက ဆိုသည်။
အိန္ဒိယအခြေစိုက် GGN Research သုတေသနကုမ္ပဏီမှ စီမံခန့်ခွဲရေး မိတ်ဖက်ဆောင် ရွက်သူဖြစ်ပြီး စားသုံးဆီကုန်သည်တစ်ဦးလည်းဖြစ်သည့် Mr. Rajesh Patel က အပူပိုင်းဒေသဆီ တစ်မျိုးဖြစ်သည့် စားအုန်းဆီသည် ပဲပုပ်ဆီထက် စျေးနှုန်းများစွာသက်သာနေသောကြောင့် ပွဲတော်ရာသီမတိုင်မီ လွန်ခဲ့သည့်နှစ်လတွင် စားအုန်းဆီဝယ်ယူမှု တိုးတက်လာသည်ဟု ပြောဆို ခဲ့သည်။
အိန္ဒိယနိုင်ငံတွင် စားသုံးဆီ အထူးသဖြင့် စားအုန်းဆီ ဝယ်လိုအားသည် ပွဲတော်ရာသီ အတွင်း သကြားလုံးများနှင့် ကြော်လှော်ထားသည့်အစားအစာများ စားသုံးမှုများပြားခြင်းကြောင့် မြင့်တက် လေ့ရှိသည်။ အိန္ဒိယ၏ စားအုန်းဆီ တင်သွင်းမှုသည် စက်တင်ဘာလတွင် တန်ချိန် ၉၀၀,၀၀၀ အထက်၌ ဆက်လက်ရှိနေနိုင်ဖွယ်ရှိပြီး ပဲပုပ်ဆီတင်သွင်းမှုမှာ တန်ချိန် ၄၅၀,၀၀၀ ကျော်အထိ ရှိနိုင်ကြောင်း မွန်ဘိုင်းအခြေစိုက် ကုန်သည်တစ်ဦးက ပြောကြားခဲ့သည်။
အိန္ဒိယသည် အင်ဒိုနီးရှားနှင့် မလေးရှားနိုင်ငံတို့မှ စားအုန်းဆီများကို အဓိကဝယ်ယူ တင် သွင်းနေပြီး အာဂျင်တီးနား၊ ဘရာဇီး၊ ရုရှားနှင့် ယူကရိန်းတို့မှ ပဲပုပ်ဆီနှင့် နေကြာဆီများကို တင်သွင်းသည်။ နီပေါနိုင်ငံထံမှ စားသုံးဆီတင်သွင်းမှုသည် ဩဂုတ်လတွင် တန်ချိန် ၉၅,၀၀၀ ရှိခဲ့ပြီး ဇူလိုင်လ၌ တန်ချိန် ၈၆,၀၀၀ ရှိခဲ့ကြောင်း GGN သုတေသနအဖွဲ့က ခန့်မှန်းထားသည်ကို The Edge Malaysia သတင်းဌာန၏ ဖော်ပြချက်များအရ သိရှိရပါသည်။
Source: The Edge Malaysia, 2nd Sep 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)