မိတ္ထီလာမြို့ရှိပေါက်ချောင်းဈေးတွင် ရာသီစာကင်းမှုံသီး၊ ကဆစ်သီးများ ရောင်းလျက်ရှိကြောင်း သိရသည်။ ကဆစ်သီးမှာစိုက်ခင်းနှင့် သီးသန့်စိုက်ပျိုးမှုနည်းပြီး လယ်/ယာခင်းများအတွင်း မိုးရာသီအလေ့ကျပေါက်ရောက်မှုမှရရှိပြီး ကင်းမှုံသီးမှာလည်း မိုးရာသီတွင်နွယ်ပင်များ၌ လှိုင်လှိုင်သီး လေ့ရှိပါသည်။ ကဆစ်သီးကိုခရမ်းချဉ်သီးနှင့်ရော၍မီးဖုတ်ထောင်းခြင်း၊ ချဉ်ပေါင်၊ အမဲသားတို့နှင့်ရော၍ ချက်ပြုတ်ခြင်းတို့ဖြင့်စားသုံးကြပြီး၊ ကင်းမှုံသီးကိုလည်းမီးဖုတ်ထောင်းခြင်း၊ ကြော်ချက်ခြင်းတို့ဖြင့်ရာသီစာအဖြစ် နှစ်ခြိုက်စွာစားသုံးကြပါတယ်။ ဒီလိုရာသီစာကင်းမှုံသီး၊ ကဆစ်သီးတို့ဟာ မိုးရာသီမှာလှိုင်လှိုင်ပေါ်လေ့ရှိပြီး မိတ္ထီလာမြို့ ပေါက်ချောင်းဈေးမှာတော့ကင်းမှုံသီးတစ်ပိဿာလျှင်(၁၅၀၀)ကျပ်၊ကဆစ်သီး တစ်ပိဿာလျှင်(၂၀၀၀)ကျပ်ရှိပြီး ရမည်းသင်း၊ ပျော်ဘွယ်မြို့များမှဝင်ရောက်ကာ မိတ္ထီလာမြို့၊ မြို့မဈေးကြီးမှတစ်ဆင့် ပြန်လည်ဝယ်ကာရောင်းချကြောင်း ကုန်စိမ်းလက်လီရောင်းချသူများထံမှ သိရှိရပါသည်။
DOCA(မန္တလေး)