ကမ္ဘောဒီးယားနိုင်ငံသည် မကြာသေးမီက နောက်ထပ်လေစွမ်းအင်ဆိုင်ရာ စီမံကိန်းနှစ်ခု၏ အတည်ပြုချက်ဖြင့် ၎င်း၏ သန့်ရှင်းသောစွမ်းအင် အသွင်ကူးပြောင်းမှုတွင် အရှိန်အဟုန်ဖြင့်လုပ်ဆောင်လျက်ရှိပြီး နိုင်ငံအတွင်း ပြန်လည်ပြည့်ဖြိုးမြဲစွမ်းအင်အတွက် ခေတ်သစ်ကို အချက်ပြနေသည်။ ကမ္ဘောဒီးယားနိုင်ငံ၊ ဖွံ့ဖြိုးတိုးတက်ရေးကောင်စီ (CDC) မှ ထုတ်ပြန်ချက်များအရ လေစွမ်းအင်ဆိုင်ရာ နောက်ထပ် လေစွမ်းအင်ဆိုင်ရာ ပဏာမခြေလှမ်း နှစ်ခုကို၂၀၂၅ ခုနှစ်၊ သြဂုတ်လတွင် အတည်ပြုခဲ့ကြောင်း သိရသည်။ တပ်ဆင်အင်အား ၃၀၀ မဂ္ဂါဝပ်ရှိ အဆိုပါ စီမံကိန်းနှစ်ခုသည် Mondulkiri ပြည်နယ်တွင်တည်ရှိသည်။ လျှပ်စစ်ဓာတ်အားပေးစက်ရုံ (EDC) ၏ ညွှန်ကြားရေးမှူးချုပ် Prang Chulsa ၏ ပြောကြားချက်အရ Mondulkiri ပြည်နယ်အတွင်း လေအားလျှပ်စစ်ဓာတ်အားပေးစက်ရုံ ၁၅၀ မဂ္ဂါဝပ်ကို ၂၀၂၆ ခုနှစ်တွင် စတင်ဖွင့်လှစ်ရန် စီစဉ်ထားကြောင်း သိရသည်။ Mondulkiri ပြည်နယ်အတွင်းရှိ လေအားလျှပ်စစ်စီမံကိန်းကို ပြင်သစ်ကုမ္ပဏီ Blue Circle မှ စီမံဆောင်ရွက်လျက်ရှိသည်။ လေအားလျှပ်စစ်စီမံကိန်းအသစ် မိတ်ဆက်ခြင်းသည် ရေအားလျှပ်စစ်နှင့် နေရောင်ခြည်စွမ်းအင်ကို အလွန်အမင်းမှီခိုနေရသည့် ကမ္ဘောဒီးယားနိုင်ငံ၏ လက်ရှိ ပြန်လည်ပြည့်ဖြိုးမြဲစွမ်းအင်လိုအပ်ချက်ကို ဖြည့်တင်းရန်အတွက် မဟာဗျူဟာမြောက် လှုပ်ရှားမှု တစ်ခုဖြစ်သည်။ ရေအားလျှပ်စစ်ထုတ်လုပ်မှု အနိမ့်ဆုံးကာလဖြစ်သည့် ခြောက်သွေ့ရာသီတွင် လျှပ်စစ်ဓာတ်အားထုတ်လုပ်နိုင်သောကြောင့် လေအားလျှပ်စစ်သည် အထူးတန်ဖိုးရှိကြောင်း ထုတ်ပြန်ထားသည်။ စွမ်းအင်ဝန်ကြီး Keo Ratanak က လေအားလျှပ်စစ် ပေါင်းစပ်ခြင်းသည် ကမ္ဘောဒီးယားနိုင်ငံ၏ စွမ်းအင်ထောက်ပံ့မှုကို အားကောင်းစေပြီး ၎င်း၏ စီးပွားရေးလျင်မြန်စွာ ကြီးထွားလာမှုအတွက် ပိုမိုအကျိုးပြုစေကာ ရေရှည်တည်တံ့ခိုင်မြဲစေကြောင်း အလေးပေးပြောကြားခဲ့သည်။ လက်ရှိ ကမ္ဘောဒီးယားတွင် စွမ်းအင်အရင်းအမြစ် ၅,၀၀၀ မဂ္ဂါဝပ်ကျော်ရှိပြီး ၆၀ ရာခိုင်နှုန်းခန့်သည် ပြန်လည်ပြည့်ဖြိုးမြဲစွမ်းအင်ဖြစ်သည့် ရေအားလျှပ်စစ်၊ ဇီဝလောင်စာနှင့် နေရောင်ခြည်စွမ်းအင်သုံး ဓာတ်အားပေးစက်ရုံများဖြစ်ကြောင်း သိရှိရပါသည်။
Source: Khmer Times
DOCA(ရန်ကုန်)