ခရမ်းအကျွတ်သီးသည် မြန်မာနိုင်ငံအနှံ့အပြားတွင် ပေါက်ရောက်လေ့ရှိပြီး အရွယ်အစား သေးငယ်ကာ အခွံမှာချောမွတ်ပါသည်။ မိုးရာသီတွင် စတင်ပေါ်လေ့ရှိပြီး မေလမှ အောက်တိုဘာလ အတွင်း ခရမ်းအကျွတ်သီး အများဆုံးသီးသောအချိန်ကာလလည်းဖြစ်ပါသည်။ ခရမ်းအကျွတ်သီး အရောင်မှာ အဖြူရောင်နှင့် ခရမ်းရောင်ဟူ၍ နှစ်မျိုးရှိပြီး ခါးသက်သောအရသာရှိသောကြောင့် ခရမ်း အကျွတ်သီးကို ရေနွေးဖျော့ဖျော့တွင် စိမ်၍လည်းကောင်း၊ ဆားရည်စိမ်၍လည်းကောင်း အခါးဓာတ် လျော့အောင်ပြုလုပ်ပြီးမှ စားသုံးလေ့ရှိကြသည်။
မိုးရာသီကာလဈေးများထဲတွင် ရာသီပေါ်ခရမ်းအကျွတ်သီးခရမ်းရောင်ကို အများဆုံးတွေ့ရပြီး မြန်မာလူမျိုးတို့၏နေ့စဉ်ထမင်းဝိုင်းတွင် ငါးပိရည်နှင့်တွဲဖက်၍စားသုံးသော အတို့အမြှုပ်အဖြစ် လည်းကောင်း၊ ယိုးဒယားအစားအစာဖြစ်သော မုန့်ဖတ်ထောင်း၊ သင်္ဘောသီးထောင်းများတွင်လည်း ခရမ်းအကျွတ်သီးကို ထည့်သွင်းအသုံးပြုကြပါသည်။ တောင်ငူမြို့၊ ညောင်ပင်လေးဈေးထဲတွင် ရောင်းချနေသော ခရမ်းအကျွတ်သီးများသည် တောင်ငူမြို့အနီး၊ ရှမ်းဝါးတီးရွာဘက်မှဖြစ်ပြီး ခရမ်း အကျွတ်သီး ၁၀ ကျပ်သားလျှင် ၅၀၀ ကျပ်၊ ၁ ပိဿာလျှင် ၄၀၀၀ ကျပ်ဖြင့်ရောင်းချလျက်ရှိကြောင်း သိရသည်။
DOCA(ပဲခူး)