၂၀၂၅ ခုနှစ်၏ ပထမ ၈ လတွင် မွေးမြူရေးတိရိစ္ဆာန်ထုတ်ကုန်များတင်ပို့မှုမှ ဝင်ငွေ အမေရိကန် ‌ဒေါ်လာ ၄၁၀.၇ သန်းရရှိခဲ့သည့် ဗီယက်နမ်

             ဗီယက်နမ်သည် ၂၀၂၅ ခုနှစ်၏ ပထမ ၈ လတွင် မွေးမြူရေးတိရိစ္ဆာန်ထုတ်ကုန်များ တင်ပို့ မှုမှတစ်ဆင့် ဝင်ငွေ အမေရိကန်ဒေါ်လာ ၄၁၀.၇ သန်းရရှိခဲ့ပြီး ၂၀၂၄ ခုနှစ် တူညီသည့် ကာလနှင့် နှိုင်းယှဉ်ပါက ၂၄.၅ ရာခိုင်နှုန်းမြင့်တက်လာကြောင်း စိုက်ပျိုးမွေးမြူရေးနှင့် သဘာဝပတ်ဝန်းကျင် ဝန်ကြီးဌာန၏ အဆိုအရ သိရပါသည်။ နို့နှင့် နို့ထွက်ကုန်တင်ပို့မှုမှ တစ်ဆင့်ဝင်ငွေ အမေရိကန် ဒေါ်လာ ၇၄.၈ သန်း (၁၁.၇ ရာခိုင်နှုန်းကျဆင်း)နှင့် အသား၊ အသားနှင့်ဆက်စပ်ထုတ်ကုန်များနှင့် အသားအပြင်ကျန်ရှိသည့် အသုံးဝင်သည့်အစိတ်အပိုင်းများမှ ဝင်ငွေ အမေရိကန်ဒေါ်လာ ၁၃၇.၇ သန်း (၃၀.၄ ရာခိုင်နှုန်းမြင့်တက်) ရရှိခဲ့ကြောင်း သိရပါသည်။ မွေးမြူရေးတိရိစ္ဆာန်ထုတ်ကုန် တင်ပို့မှုဆက်လက်အရှိန်မြှင့်တင်ရန်အတွက် ဝန်ကြီးဌာနသည် ဒေသများအား အကြီးစားမွေးမြူ ရေးလုပ်ကိုင်ရန်နှင့် လှောင်အိမ်များ၊ အအေးခံစနစ်နှင့် အပူထိန်းချုပ်မှုစနစ်များ၊ အလိုအလျှောက် အစာကျွေးစနစ်နှင့် အမှိုက်များကို ဇီဝဂတ်စ်အဖြစ်ပြောင်းလဲအသုံးပြုမှု အစရှိသည့် အဆင့်မြင့် နည်းပညာများကို အသုံးပြုရန် ညွှန်ကြားခဲ့ကြောင်း သိရပါသည်။ ထို့ပြင် စားသုံးသူအတွက် အစားအသောက်လုံခြုံစိတ်ချမှုရှိရေး၊ မူလရင်းမြစ်စစ်ဆေးနိုင်မှုနှင့် စည်းမျဉ်းတင်းကျပ်သော ဈေးကွက်လိုအပ်ချက်နှင့် ကိုက်ညီစေရန်အတွက် VietGap စံနှုန်းသတ်မှတ်ချက်များကိုလိုက်နာ ရန်နှင့် မွေးမြူခြင်းမှစ၍ ပြုပြင်ထုတ်လုပ်ခြင်းနှင့် ဖြန့်ဖြူးခြင်းအထိ ဆက်စပ်နေသည့် တန်ဖိုး ကွင်းဆက်ကို တိုးတက်အောင်ဆောင်ရွက်ရန် တိုက်တွန်းခဲ့ကြောင်း သိရပါသည်။ မွေးမြူရေး သမားများနှင့် လုပ်ငန်းများကိုလည်းအကြီးစားကုန်ကြမ်းပစ္စည်းဇုန်များတည်ထောင်ရန်နှင့် အကြီး စားထုတ်လုပ်နိုင်ရန် တွန်းအားပေးခဲ့ကြောင်း သိရပါသည်။ ပြည်တွင်းအာဏာပိုင်များကို လည်း ဗီယက်နမ်မွေးမြူရေးတိရိစ္ဆာန်ထုတ်ကုန်များအား ပြည်ပသို့ပိုမိုတင်ပို့နိုင်ရန်အတွက် ကုန်သွယ် ရေးမြှင့်တင်မှုများဆောင်ရွက်ရန်၊ ဈေးကွက်တိုးချဲ့ရန်နှင့် တည်ငြိမ်သောရောင်းချမှုနှင့် ယှဉ်ပြိုင် နိုင်စွမ်းရှိရန် တောင်းဆိုခဲ့ကြောင်း သိရပါသည်။ စီမံချက်များတွင် နိုင်ငံတကာမွေးမြူရေး ပွဲတော်များတွင် ပါဝင်ဆင်နွှဲခြင်း၊ ထုတ်ကုန်များပြသရန်နှင့် သွင်းကုန်လုပ်ငန်းရှင်များနှင့် ချိတ်ဆက်ရန်အတွက်ကုန်သွယ်ရေးခရီးစဉ်များသွားရောက်ရန်၊ သယ်ယူပို့ဆောင်ရေးကုန်ကျ စရိတ်များဖြတ်တောက်ရန်အတွက် ထောက်ပံ့ပို့ဆောင်ရေးတိုးတက်ရန်နှင့် စီးပွားရေးလုပ်ငန်း များအား ၎င်းတို့၏ဈေးကွက်တည်ရှိမှုအားကောင်းရန် နိုင်ငံတကာအသိအမှတ်ပြုလက်မှတ်များ ရယူရာတွင် ထောက်ပံ့ပေးရန်တို့ ပါဝင်ကြောင်း သိရပါသည်။

DOCA (ရန်ကုန်)