အောက်တိုဘာလ၁၃ရက်နေ့တွင် အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်အခမ်းအနားကို ယနေ့နံနက်ပိုင်းက ပုသိမ်မြို့၊ မြို့တော်ခန်းမတွင် ပြုလုပ်ခဲ့ရာ အခမ်းအနားသို့ တိုင်းဒေသကြီးဝန်ကြီးချုပ် ဦးတင်မောင်ဝင်း၊ အစိုးရအဖွဲ့ဝင် ဝန်ကြီးများနှင့် ၎င်းတို့၏ဇနီးများ၊ ဌာနဆိုင်ရာများတက်ရောက်ခဲ့ကြသည်။
ဦးစွာတိုင်းဒေသကြီးဝန်ကြီးချုပ်က ယခုနှစ် ၂၀၂၅ ခုနှစ်အတွက် အပြည်ပြည်ဆိုင်ရာ သဘာဝဘေးအန္တရာယ်ထိခိုက်ဆုံးရှုံးနိုင်ခြေလျှော့ချရေးနေ့အထိမ်းအမှတ် အခမ်းအနားအဖြစ် ကမ္ဘာ့ကုလသမဂ္ဂအဖွဲ့ကြီးက " Fund resilience, not disasters" ဘေးဒဏ်ကြံ့ကြံ့ခံနိုင်ရေး သုံးစွဲဘဏ္ဍာတိုးမြှင့်ပေး ဟူသောဆောင်ပုဒ်ဖြင့် ကျင်းပပြုလုပ်သွားရန် အတည်ပြုသတ်မှတ်ခဲ့ပါကြောင်း၊ တိုင်းဒေသကြီးအနေဖြင့် သဘာဝဘေးဖြစ်ပွားနိုင်သည့် သတင်းများရရှိသည်နှင့်တစ်ပြိုင်နက် တိုင်းဒေသကြီး အစိုးရအဖွဲ့ရုံးတွင် တာဝန်ရှိသူများအား အစည်းအဝေးများခေါ်ယူ ကျင်းပကာ အစိုးရအဖွဲ့ဝင်ဝန်ကြီးများအား မြေပြင်အနီးကပ် ကြီးကြပ်ဆောင်ရွက်နိုင်ရန် တာဝန်ချထားပြီး ကွင်းဆင်းကြီးကြပ် ဆောင်ရွက်ခြင်း၊ ခရိုင်၊ မြို့နယ်သဘာဝဘေးစီမံခန့်ခွဲမှုအဖွဲ့များမှ တာဝန်ရှိသူများမှလည်း ကြိုတင်ပြင်ဆင်မှုနှင့် အရေးပေါ် တုံ့ပြန်မှုကို ဆောလျင်စွာဆောင်ရွက်နိုင်ခဲ့ခြင်းကြောင့် လူနှင့် တိရစ္ဆာန်ထိခိုက်မှုအနည်းဆုံးနှင့် အကောင်းဆုံးရင်ဆိုင်ကျော်လွှား နိုင်ရေးဆောင်ရွက်လျက်ရှိပါကြောင်း၊ ဘေးအန္တရာယ်များအတွက် အရေးပေါ်တုံ့ပြန်ဆောင်ရွက်ရေး၊ ပြန်လည်ထူထောင်ရေးနှင့် ပြန်လည်တည်ဆောက်ရေးတို့တွင် ထိရောက်စွာ စီမံဆောင်ရွက်နိုင်ရန် စနစ်ကျသော၊ ပြည့်စုံသောကြိုတင်ပြင်ဆင်မှုသည် အဓိကဖြစ်ပါကြောင်း၊ ဘေးအန္တရာယ်ကို တုံ့ပြန်ဆောင်ရွက်သည့်အခါ ပထမဦးစွာ ထိခိုက်ဆုံးရှုံးမှုနည်းအောင် ဆောင်ရွက်ရခြင်းဖြစ်သည့်အတွက် ကြိုတင်ပြင်ဆင်သည့်အပိုင်းက ပိုအရေးကြီးပါကြောင်းနှင့် ကြိုတင် ပြင်ဆင်ခြင်းအပိုင်းတွင်လည်း ကြိုတင်သတိပေးစနစ်နှင့် ကြိုတင် ပြင်ဆင်ခြင်းစနစ်က လွန်စွာကောင်းရမည်ဖြစ်ပါကြောင်း၊ အချိန်မီသိ၊ အချိန်မီ ဆောင်ရွက်တုံ့ပြန်နိုင်မှသာ ကျရောက်လာသည့်ဘေးအန္တရာယ်များကို ရင်ဆိုင်နိုင်မည်ဖြစ်ပါကြောင်း၊ ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းများတွင်လည်း လိုအပ်ရင် လိုအပ်သလို မိမိတို့တိုင်း ဒေသကြီးအနေဖြင့် ပူးပေါင်းပါဝင်ဆောင်ရွက်ပေးကြရန်လိုပါကြောင်း၊ ယခုနှစ် အပြည်ပြည်ဆိုင်ရာသဘာဝဘေး အန္တရာယ်ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ် " Fund resilience, not disasters ကြံ့ကြံ့ခံနိုင်ရေး သုံးစွဲဘဏ္ဍာ တိုးမြှင့်ပေး ဆိုသည့် ဆောင်ပုဒ် အတိုင်း မိမိနိုင်ငံ၊ မိမိတိုင်းဒေသကြီးကို ဘေးအန္တရာယ် များမှ လျော့နည်းသက်သာစေပြီး ဘေးဒဏ်တွေကြံ့ကြံ့ခံနိုင်ဖို့ လုပ်ငန်း များလုပ်ကိုင်ဆောင်ရွက်ရာတွင် နိုင်ငံတော်အနေဖြင့် သုံးစွဲသည့်ဘဏ္ဍာငွေများကို တိုးမြှင့်ဆောင်ရွက်ပေးနေသကဲ့သို့ ဌာနဆိုင်ရာများအနေဖြင့်လည်း အကျိုးရှိစွာ သုံးစွဲဆောင်ရွက်ကြရန်လိုပါကြောင်း" တိုက်တွန်း အမှာစကားများ ပြောကြားသည်။
ဆက်လက်၍ တိုင်းဒေသကြီးဝန်ကြီးချုပ်နှင့်ဧည့်သည်တော်များသည် အပြည်ပြည်ဆိုင်ရာ သဘာဝ ဘေး အန္တရာယ်ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်သို့ ကုလသမဂ္ဂအထွေထွေ အတွင်းရေးမှူး ချုပ်က ပေးပို့သောသဝဏ်လွှာ Video Message ၊ ၂၀၂၅ခုနှစ်၊ အပြည်ပြည်ဆိုင်ရာ သဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့အထိမ်းအမှတ်ဗီဒီယိုပြသမှုများကို ကြည့်ရှုအားပေးခဲ့သည်။
ထို့နောက် တိုင်းဒေသကြီးဝန်ကြီးချုပ်က အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံး နိုင်ခြေလျှော့ချရေးနေ့ အထိမ်းအမှတ် အထက်တန်းအဆင့် စာစီစာကုံးပြိုင်ပွဲတွင် ပထမ၊ ဒုတိယ၊ တတိယဆုရရှိသူများနှင့် အထက်တန်းအဆင့်ပန်းချီပြိုင်ပွဲတွင် ပထမ၊ ဒုတိယ၊ တတိယဆုရရှိ သူများအား ဆုများချီးမြှင့်ခဲ့ပြီး စုပေါင်းမှတ်တမ်းတင်ဓာတ်ပုံများရိုက်ကူးခဲ့ကြသည်။ ယင်းနောက် တိုင်းဒေသကြီးဝန်ကြီးချုပ်နှင့် ဧည့်သည်တော်များသည် အပြည်ပြည်ဆိုင်ရာသဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်အဖြစ်ပြသထားသောပြခန်းများအား လှည့်လည် ကြည့်ရှု ခဲ့ကြကြောင်းသိရသည်။
(DOCA) ဧရာဝတီ