တောင်သာမြို့နယ်သည် ပဲမျိုးစုံ၊ ဆီထွက်သီးနှံ၊ ဝါသီးနှံ နှင့်ထန်းလုပ်ငန်းများကို အဓိက စိုက်ပျိုးလုပ်ကိုင်လျက်ရှိရာ မိုးဦးပဲစဉ်းငုံကိုလည်း စိုက်ပျိုးလျက်ရှိကြောင်း သိရှိရသည်။ ဒေသတွင်း စိုက်ပျိုးသောကျေးရွာများမှာ မလည်ရွာနှင့် ကျေးရွာတို့တွင်စိုက်ပျိုးထားရှိကြောင်း၊ မိုးဦးပဲစဉ်းငုံကို (မေလ-ဇွန်လ-ဇူလိုင်လ) များတွင် စတင်စိုက်ပျိုးပြီး ရိတ်သိမ်းထွက်ပေါ်ချိန်မှာ (ဇန်နဝါရီလ-ဖေဖော်ဝါရီလ-မတ်လ) တို့တွင်ရိတ်သိမ်းထွက်ပေါ်ကြောင်း၊ စိုက်ပျိုးချိန်မှရိတ်သိမ်း ချိန်အထိ (၇)လ ခန့်ကြာမြင့်ကြောင်းသိရှိရသည်။
၂၀၂၅-၂၀၂၆ ခုနှစ်၊ အောက်တိုဘာ ဒုတိယပတ်အထိ တောင်သာမြို့နယ်၌ ပဲစဉ်းငုံစိုက်ပျိုးထားပြီး ဧက (၁၈၃၆၁) စိုက်ပျိုးထားရှိကြောင်း၊ မြို့နယ်ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရသည်။ စိုက်ပျိုးရန်ကျန်ရှိသော ဧကများအား ဆက်လက်စိုက်ပျိုး လျက်ရှိ ကြောင်း၊ ကာလတူနှိုင်းယှဉ်ပါက ယခင်နှစ်ထက် ယခုနှစ်တွင် (၈၅)ဧကခန့် ပိုမိုစိုက်ပျိုး ထားကြောင်း၊ စိုက်ပျိုးမှုအနေဖြင့် သက်ကြီးမျိုးရွှေဒင်္ဂါးကို တန်းကြား ၄ ပေခွဲထား၍ စိုက်ကြောင်းများစွဲပြီး အစေ့ချစနစ်ဖြင့် စိုက်ပျိုးကြောင်း၊ တောင်သာမြို့နယ်တွင် ပဲစဉ်းငုံစိုက်ပျိုးရာ၌ တန်းကြားညှပ်၍ မြေပဲ၊ နှမ်း၊ ပဲတို့နှင့် သီးညှပ်စိုက်ပျိုးထားကြောင်းသိရသည်။ ယခင်နှစ် ပဲစဉ်းငုံတစ်ဧက အထွက်နှုန်းမှာ(၈)တင်းခန့် ထွက်ရှိခဲ့ကြောင်း၊ ယခုနှစ်တွင်မိုးအသင့် အတင့် ရွာသွန်းသဖြင့် အပင်များဖြစ်ထွန်းသောကြောင့် ယခင်နှစ်ထက် အထွက်နှုန်းများ ပိုမိုထွက်ရှိနိုင်မည်ဟုခန့်မှန်း ရကြောင်း၊ ပဲစဉ်းငုံသီးနှံသည် ကုန်ကျစရိတ်သက်သာပြီး အကျိုးအမြတ် များစွာရရှိ၍ သီးထပ် သီးညှပ်အနေဖြင့်လည်း စိုက်ပျိုး၍ ဝင်ငွေတိုးသော သီးနှံဖြစ်ကြောင်း ပဲစဉ်းငုံစိုက် တောင်သူ တစ်ဦး၏ ပြောပြချက်အရသိရှိရသည်။ ၂၀၂၅ခုနှစ်၊ အောက်တိုဘာလ ဒုတိယပတ်တွင် တောင်သာမြို့ ရှိပွဲရုံများ၌ ပဲစဉ်းငုံနီတစ်တင်းလျှင် (၇၄၀၀၀) ကျပ်ခန့်ပေါက်ဈေးများဖြင့် ဒေသတွင်းပွဲရုံများတွင် အရောင်းအဝယ်ဖြစ်လျက်ရှိကြောင်း၊ ထိုပွဲရုံများမှတဆင့် မြင်းခြံမြို့၊ မန္တလေးမြို့နှင့် ရန်ကုန်ဘုရင့် နောင်ပွဲရုံများသို့ တင်ပို့ရောင်းချကြောင်းသိရှိရသည်။
DOCA(မန္တလေး)