သခွားသီးကို ရေရရှိသောဒေသများတွင် တစ်နှစ်ပတ်လုံးစိုက်ပျိုးနိုင်ပြီး အဓိကအားဖြင့် ရာသီဥတု နှစ်မျိုးကို အခြေခံပြီးစိုက်ပျိုးကြပါသည်။ မိုးသခွားကို မိုးဦးကျချိန်မေလမှ ဇွန်လလောက်အထိ စိုက်ပျိုးကြပြီး မိုးရေကိုအားပြုနိုင်သောကြောင့် ရေသွင်းစရာမလိုဘဲ စိုက်ပျိုးနိုင်ပါသည်။ ဆောင်းသခွား ကို စက်တင်ဘာလမှ အောက်တိုဘာလအထိ စိုက်ပျိုးကြပြီး ဆောင်းရာသီ အအေးဒဏ်ကိုခံနိုင်သော သခွားမျိုးများကိုသာ ရွေးချယ် စိုက်ပျိုးကြပါသည်။
ပဲခူးတိုင်းဒေသကြီး၊ တောင်ငူခရိုင်၊ အုတ်တွင်းမြို့နယ်၊ ဝတီးအုပ်စု၊ ညောင်ပင်ကျေးရွာတွင် သခွားပင်များ စီးပွားဖြစ်စိုက်ပျိုးလျက်ရှိနေကာ ဒေသခံတောင်သူများက အုတ်တွင်းမြို့ပေါ်နှင့် တောင်ငူမြို့ပေါ်ရှိ ကုန်စိမ်းပွဲရုံများသို့ သခွားသီးများတင်ပို့ရောင်းချလျက်ရှိနေပါသည်။ ပွဲရုံဈေးအဖြစ် သခွားသီး ၁ ပိဿာလျှင် ၁၀၀၀ ကျပ်ဖြင့် ရောင်းချလျက်ရှိနေပြီး ယခုအောက်တိုဘာလတွင် သခွားဈေးများ အရောင်းသွက်လျက် ရှိကြောင်းသိရသည်။
DOCA(ပဲခူး)