မြေပဲမှာ စားသုံးဆီကြိတ်ခွဲခြင်းလုပ်ငန်းများနှင့် စားသောက်ကုန်တို့တွင် အသုံးပြုခြင်း တို့ကြောင့် ပြည်တွင်းစျေးကွက်နှင့်ပြည်ပသို့တင်ပို့သည့်သီးနှံဖြစ်ပြီး အရောင်းသွက်လျက်ရှိကြောင်း သိရပါသည်။ မန္တလေးတိုင်းဒေသကြီးအတွင်း ဆီထွက်သီးနှံမြေပဲအား မိုးနှင့် ဆောင်း ရာသီများတွင် စိုက်ပျိုးပြီး၊ ၂၀၂၄-၂၀၂၅ ခုနှစ်မြေပဲစိုက်ပျိုးမှု ၆၃၈၆၂၆ ဧက၊ရိတ်သိမ်းမှု ၆၃၇၄၄၇ ဧက၊ အထွက် နှုန်း ၄၆.၇၇ တင်း၊ အထွက်စုစုပေါင်း ၂၉၈၁၅၉၉၆ တင်းဖြစ်ကြောင်း သိရပါသည်။ မန္တလေးပွဲစား၊ ကုန်သည်စက်ပိုင်များမဟာကထိန်တော်အသင်းတွင် ၂၀၂၅ ခုနှစ်အောက်တိုဘာလ နောက်ဆုံးပတ် အတွင်းဖြစ်ပေါ်လျက်ရှိသည့်ပေါက်စျေးများမှာ မြေပဲတစ်ပိဿာလျှင် S1 လုံးဆန် ၈၀၀၀ ကျပ်နှင့် ၈၇၀၀ကျပ်၊S1 ဆီဆန် ၇၆၀၀ကျပ်နှင့် ၈၀၀၀ကျပ်၊ အနီလုံးဆန် ၇၇၀၀ ကျပ်နှင့် ၈၄၀၀ကျပ်၊ အနီဆီဆန် ၇၅၀၀ ကျပ်နှင့် ၇၆၀၀ကျပ်တို့ဖြစ်ကြောင်းသိရပါသည်။ယခင်နှစ်ကာလတူ တစ်ပိဿာ စျေးမှာS1 လုံးဆန် ၈၁၀၀ ကျပ်နှင့် ၈၃၀၀ ကျပ်၊S1 လုံးဆန်(မြင်းမူ)၈၄၀၀ ကျပ်နှင့် ၈၅၀၀ကျပ်၊ S1 ဆီဆန် ၇၅၀၀ကျပ်နှင့် ၇၆၅၀ ကျပ်၊S1 ရွေးဆန် ၇၅၀၀ကျပ်နှင့်၈၀၀၀ကျပ်၊အနီလုံးဆန် ၇၆၀၀ ကျပ် နှင့်၈၁၀၀ကျပ်၊အနီဆီဆန် ၆၈၀၀ ကျပ်နှင့် ၆၉၀၀ကျပ်တို့ဖြစ်ကြောင်း သိရှိရပါသည်။ ယခင်နှစ်နှင့် ယခုနှစ်ကာလတူမြေပဲပေါက်စျေးနှိုင်းယှဉ်ပါက ပေါက်စျေးမှာ အနည်းငယ်သာ ကွာခြားကြောင်း သိရှိရပါသည်။
DOCA(မန္တလေး)